မာမိုဟန် ဆင်း သို့ အမှတ်ရခြင်း

ရှက်တတ်တဲ့ နိုင်ငံရေးသမားတစ်ဦး ဘယ်လောက်အထိ နိုင်ငံရေးခရီးပေါက်မလဲဆိုတာ စိတ်ကူးယဉ်ကြည့်ဖို့ ခက်ပါတယ်။ ဒါပေမဲ့ အဲဒီနိုင်ငံရေးသမားဟာ မာမိုဟန် ဆင်းဆိုရင်တော့ ယုံရမှာပါ။

အိန္ဒိယဝန်ကြီးချုပ်ဟောင်း မာမိုဟန် ဆင်း ကြာသပတေးနေ့မှာ ကွယ်လွန်သွားချိန်ကစလို့ သူ့အကြောင်း အများကြီး ပြောခဲ့ဆိုခဲ့ကြပြီးပါပြီ။

အိန္ဒိယနိုင်ငံသမိုင်းလမ်းကြောင်းကို ပြောင်းလဲစေခဲ့သူ၊ လူသန်းပေါင်းများစွာရဲ့ ဘဝအပေါ် သက်ရောက်မှုရှိစေခဲ့သူ၊ ကြင်နာပြီး စကားကိုလေသံအေးအေးနဲ့ပြောတတ်သူ နိုင်ငံရေးသမားအဖြစ် သူ့ကို မှတ်မိကြပါတယ်။

သူ့ရဲ့ နိုင်ငံတော်ဈာပနကို စနေနေ့မှာ ကျင်းပခဲ့ပြီး အိန္ဒိယအစိုးရကတော့ ဝမ်းနည်းပူဆွေးအောက်မေ့မှုအဖြစ် ခုနစ်ရက်သတ်မှတ်ထားပါတယ်။

ဝန်ကြီးချုပ်သက်တမ်းနှစ်ကြိမ်၊ အိန္ဒိယဗဟိုဘဏ်အုပ်ချုပ်ရေးမှူးနဲ့ ပြည်ထောင်စုအဆင့် ဘဏ္ဍာရေးဝန်ကြီး တာဝန်တွေယူခဲ့သူ အောင်မြင်ထင်ရှားတဲ့နိုင်ငံရေးသမားဖြစ်ခဲ့ပေမဲ့ ဆင်းဟာ သူနဲ့သက်တူရွယ်တူအဆင့်တူ နိုင်ငံရေးသမားတွေလို တောက်ကြွားတဲ့ နိုင်ငံရေးသမားမဖြစ်ခဲ့ပါဘူး။

ဝန်ကြီးချုပ်အဖြစ် ပထမသက်တမ်းမှာ သူဟာ တွေ့ဆုံမေးမြန်းခန်းတွေ လုပ်၊ သတင်းစာရှင်းလင်းပွဲတွေ တက်ရောက်ခဲ့ပေမဲ့ သူ့အစိုးရရဲ့ အရှုပ်တော်ပုံသတင်းတွေထွက်တဲ့အချိန်နဲ့ သူ့အစိုးရအဖွဲ့ဝင်ဝန်ကြီးတွေ အကျင့်ပျက်ခြစားမှုစွပ်စွဲချက်တွေနဲ့ ရင်ဆိုင်နေရချိန်မှာတော့ သူဟာ နှုတ်ဆိတ်နေခဲ့ပါတယ်။

သူ့ရဲ့ လူကြီးလူကောင်းဆန်ဆန်နည်းလမ်းတွေနဲ့ပတ်သက်လို့ စိတ်ပျက်သံတွေရှိသလို လေးစားခံရတာတွေလည်း ရှိခဲ့ပါတယ်။

သူဟာ မလိုအပ်ဘဲ နိုင်ငံရေးအရ ရန်သူများအောင် မလုပ်ဖို့ ဂရုစိုက်တတ်တယ်၊ မစားရ ဝခမန်းကတိတွေ မပေးတတ်ဘူး၊ ရလဒ်ကိုပဲ အာရုံစိုက်ခဲ့တယ်လို့ သူ့ကို လေးစားသူတွေက ပြောခဲ့ကြပါတယ်။

သူ့လုပ်ရပ်တွေနဲ့ပတ်သက်လို့ အကောင်းဆုံးဥပမာကတော့ သူ ဘဏ္ဍာရေးဝန်ကြီးအဖြစ် တာဝန်ထမ်းဆောင်စဉ်မှာ ဈေးကွက်လိုလားတဲ့ ပြုပြင်ပြောင်းလဲမှုတွေကြောင့် အိန္ဒိယရဲ့စီးပွားရေးဟာ ကမ္ဘာကြီးကို လမ်းပေါက်သွားတာပဲ ဖြစ်ပါတယ်။

''မာမိုဟန် ဆင်း အမှားလုပ်မယ်၊ အကျင့်ပျက်မယ်လို့ အိန္ဒိယမှာ ဘယ်သူကမှ ထင်မှာမဟုတ်ဘူး။ သူက အင်မတန်ကို သတိထားတတ်တာ၊ ဥပဒေရဲ့ မှန်ကန်တဲ့ဘက်ခြမ်းမှာပဲ အမြဲနေချင်ခဲ့တာ'' လို့ ကွန်ဂရက်ပါတီက လုပ်ဖော်ကိုင်ဖက်ဟောင်း ကာပီ ဆီဘယ်က ပြောခဲ့ဖူးပါတယ်။

ဒါပေမဲ့ သူ့ပြိုင်ဘက်တွေကတော့ သူဟာ လူ တစ်ဘီလျံကျော်ရှိတဲ့နိုင်ငံရဲ့ ဝန်ကြီးချုပ်တစ်ဦးအဖြစ် မပြောနဲ့ဦး၊ နိုင်ငံရေးသမားတစ်ဦးမှာတောင် မရှိသင့်တဲ့ ပြတ်သားမှုမျိုးမရှိဘူးဆိုပြီး လှောင်ပြောင်ကြပါတယ်။

အသံပြာပြီး အသက်မရှူဘဲပြောသလိုဖြစ်နေတတ်ပြီး များသောအားဖြင့် ပင်ပန်းလို့ အသံမထွက်တော့သလိုဖြစ်နေတတ်တဲ့ သူ့အသံကြောင်ကြောင့်လည်း လှောင်ပြောင်ခံရတတ်ပါတယ်။

ဒါပေမဲ့ အသံကျယ်ကျယ်၊ ဩဇာသံရှိမှသာ နိုင်ငံရေးသမားစံနှုန်းနဲ့ညီတယ်လို့ သတ်မှတ်ထားတဲ့ နိုင်ငံရေးလောကမှာ သူ့ရဲ့ အဲဒီအသံကိုပဲ နားလည်ပေးနိုင်တဲ့အသံမျိုး၊ အောက်ခြေကို နားလည်တဲ့အသံမျိုးလို့ မှတ်ယူတာမျိုးလည်းရှိကြပါတယ်။

သူ့ပါတီက နိုင်ငံရေးသမားတွေအပါအဝင် ခေတ်ပြိုင်တွေက နိုင်ငံရေးအရ အနိုင်ရရှိဖို့အတွက် အကျင့်ပြင်တာတွေရှိကြပေမဲ့ မီဒီယာနဲ့ထိတွေ့ရမှာ ရှက်ကြောက်တတ်တဲ့၊ ဟိတ်ဟန်မလုပ်တတ်တဲ့၊ အတွင်းစွဲနိုင်ငံရေးသမားပုံရိပ်ဟာ ဆင်းမှာ အမြဲလိုလိုရှိခဲ့ပါတယ်။

ဒါပေမဲ့ အဲဒီလို ဂုဏ်သိက္ခာရှိမှုနဲ့ပဲ သူဟာ အခြေအနေတိုင်းကို ကိုင်တွယ်ခဲ့တာဖြစ်ပါတယ်။ ခက်ခဲတဲ့အခြေအနေတွေကိုလည်း အလားတူပုံစံနဲ့ပဲ ကိုင်တွယ်ခဲ့လို့ သူ့ကို အမှတ်ရနေကြတာပဲဖြစ်ပါတယ်။

အခုအချိန်မှာ ပါကစ္စတန်နိုင်ငံထဲမှာရှိနေတဲ့ နေရာတစ်ခုက ဆင်းရဲတဲ့မိသားစုမှာ မွေးဖွားခဲ့တဲ့ ဆင်းဟာ အိန္ဒိယရဲ့ ပထမဆုံး ဆစ်ခ်ဘာသာဝင် ဝန်ကြီးချုပ်ဖြစ်ပါတယ်။

မကျော်လွှားနိုင်လောက်ဘူးလို့ မှတ်ယူရတဲ့အထိ ခက်ခဲတာတွေကို ကျော်ဖြတ်ပြီး ကိမ်းဘရစ်နဲ့ အောက်စ်ဖို့ဒ်တက္ကသိုလ်ဆင်း ဘောဂဗေဒပညာရှင်ဖြစ်ခဲ့တဲ့ သူ့ ပုဂ္ဂိုလ်ရေးဖြစ်ရပ်နဲ့ ရိုးသားပြီး သူတစ်ပါးကို အလေးထားတဲ့ ခေါင်းဆောင်အဖြစ်ကြောင့် သူဟာ အိန္ဒိယလူလတ်တန်းစားရဲ့ သူရဲကောင်းဖြစ်နေပါပြီ။

ဒါပေမဲ့ ဆစ်ခ်ဘာသာဝင် ၃,၀၀၀ ခန့် အသတ်ခံခဲ့ရတဲ့ ၁၉၈၄ အဓိကရုဏ်းအတွက် ၂၀၀၅ ခုနှစ်က လွှတ်တော်တွင်း သူ တောင်းပန်စကားဆိုတဲ့အခါ လူတိုင်းအံ့ဩသွားကြပါတယ်။

အဲဒီအချိန်တုန်းက ဝန်ကြီးချုပ် အင်ဒီယာဂန္ဓီကို သူ့ရဲ့ဆစ်ခ်သက်တော်စောင့်တွေက လုပ်ကြံပြီးနောက် ဖြစ်ပေါ်ခဲ့တဲ့အဓိကရုဏ်းနဲ့ဆက်စပ်ပြီး ကွန်ဂရက်ပါတီမတ်များစွာလည်း စွပ်စွဲခံခဲ့ရပါတယ်။

အိန္ဒိယနိုင်ငံမြောက်ပိုင်း အမ်ရစ်ဆာက ဆစ်ခ်ဘာသာဝင်တွေရဲ့ ဘုရားကျောင်းထဲမှာ ခိုအောင်းနေတဲ့ ခွဲထွက်ရေးသမားတွေကို စစ်ရေးအရ နှိမ်နင်းဖို့ အင်ဒီယာဂန္ဓီက အမိန့်ပေးခဲ့တာကြောင့် လုပ်ကြံခဲ့တာဖြစ်တယ်လို့ သက်တော်စောင့်တစ်ဦးက နောက်ပိုင်းမှာ ဝန်ခံခဲ့ပါတယ်။

ကွန်ဂရက်ပါတီက နိုင်ငံရေးသမားတွေအပါအဝင် ဘယ်ဝန်ကြီးချုပ်ကမှ တောင်းပန်စကားပြောဆိုခဲ့တာမရှိခဲ့တဲ့အတွက် ဒါဟာ ရဲရင့်တဲ့ လုပ်ဆောင်ချက်ဖြစ်ခဲ့ပါတယ်။ ဒါပေမဲ့ ဒီလိုတောင်းပန်တာကြောင့် ဆစ်ခ်အသိုင်းအဝိုင်းနဲ့ ပါတီပေါင်းစုံက နိုင်ငံရေးသမားတွေအတွက် စိတ်သက်သာစရာဖြစ်စေခဲ့ပြီး သတ္တိရှိတဲ့လုပ်ရပ်အတွက် သူ့အပေါ် လူသူလေးစားမှုပိုခဲ့ကြပါတယ်။

နှစ်အနည်းငယ်အကြာ ၂၀၀၈ ခုနှစ်မှာ အမေရိကန်ပြည်ထောင်စုနဲ့ ပြောစမှတ်တွင်တဲ့ လက်မှတ်ရေးထိုးမှုကို လုပ်ဆောင်ခဲ့တာကြောင့် အနေအေးပေမဲ့ ထိရောက်တဲ့ သူ့ခေါင်းဆောင်မှုကို ချီးကျူးစရာတွေရှိခဲ့ပါတယ်။ လက်မှတ်ရေးထိုးမှုကြောင့် အိန္ဒိယရဲ့ ဆယ်စုနှစ်များစွာကြာ နျူကလီးယားအထီးကျန်တာ အဆုံးသတ်ပြီး ၁၉၇၄ ခုနှစ်မှာ နျူစမ်းသပ်မှုပြီးနောက် ပထမဆုံးအကြိမ်အဖြစ် နျူနည်းပညာနဲ့ လောင်စာတွေ ရရှိခဲ့ပါတယ်။

သဘောတူညီချက်ကို အတိုက်အခံနိုင်ငံရေသမားတွေနဲ့ ဆင်းရဲ့မဟာမိတ်တွေကတောင် ဝေဖန်ခဲ့ကြပြီး အိန္ဒိယရဲ့ နိုင်ငံခြားရေးမူဝါဒမှာ အလျှော့ပေးရတာတွေရှိလာနိုင်တယ်လို့ ပြောဆိုခဲ့ကြပါတယ်။ ဒါပေမဲ့ ဆင်းဟာ သူ့အစိုးရကိုရော သဘောတူညီချက်ကို ပါ မျက်နှာမပျက်အောင် လုပ်ဆောင်နိုင်ခဲ့ပါတယ်။

၂၀၀၈-၂၀၀၉ မှာ ကမ္ဘာလုံးဆိုင်ရာဘဏ္ဍာရေးအကျပ်အတည်းကြုံခဲ့ပေမဲ့ ဆင်းရဲ့ မူဝါဒတွေကြောင့် အိန္ဒိယဟာ အထိမနာခဲ့ပါဘူး။

၂၀၀၉ ခုနှစ်မှာ ဆင်းဟာ သူ့ပါတီကို အကြီးအကျယ်အောင်ပွဲခံနိုင်ဖို့ ဦးဆောင်ပေးနိုင်ခဲ့ပြီး ဝန်ကြီးချုပ်အဖြစ် ဒုတိယသက်တမ်းမှာ မေတ္တာတရားကြီးတဲ့ ခေါင်းဆောင်ဆိုတဲ့ သူ့ပုံရိပ်ကို ပိုမိုခိုင်မာအောင် လုပ်နိုင်ခဲ့ပါတယ်။ တစ်နည်းပြောရရင်လည်း ခေါင်းဆောင်တွေဟာ မေတ္တာတရားကြီးလို့ရတယ်ဆိုတဲ့ အတွေးအမြင်ကို ဖော်ထုတ်ခဲ့ပါတယ်။

လူများစွာအတွက်တော့ သူဟာ သီလလုံသူဖြစ်ပြီး လူမြင်ကွင်းထွက်ရတာကို သိပ်သဘောမကျတဲ့၊ ကြီးကြီးကျယ်ကျယ်အပြောတွေမရှိတဲ့ ခပ်လျှိုလျှိုဝန်ကြီးချုပ်ဖြစ်ပေမဲ့ နိုင်ငံအနာဂတ်အတွက်ဆိုရင် ရဲရင့်တဲ့ ဆုံးဖြတ်ချက်တွေ ချမှတ်ဖို့ မကြောက်သူတစ်ဦးဖြစ်ခဲ့ပါတယ်။

အဲဒီနောက်မှာပဲ အခြေအနေတွေ ဆိုးရွားလာခဲ့ပါတယ်။

ပထမဆုံးအနေနဲ့ ဓနသဟာယ အားကစားပြိုင်ပွဲတွေ ကျင်းပတာ၊ အဲဒီနောက် ကျောက်မီးသွေးတွင်းတွေကို တရားမဝင်ချထားပေးမှုအပါအဝင် အကျင့်ပျက်ခြစားမှုစွဲချက်တွေကို ကွန်ဂရက်ပါတီနဲ့ ဆင်းအစိုးရ ရင်ဆိုင်လာရပါတယ်။ တချို့သော စွပ်စွဲချက်တွေဟာ မမှန်မကန် ချဲ့ကားပြောဆိုထားတယ်ဆိုတာ နောက်ပိုင်းမှာ သိလာရပါတယ်။ အဲဒီကာလက ကိစ္စတချို့ဆိုရင် အခုထိ တရားရုံးမှာ ရင်ဆိုင်နေရဆဲပါ။

ဒါပေမဲ့ ဆင်းမှာ ဖိအားတချို့ရှိလာပါပြီ။ သူဝန်ကြီးချုပ်အဖြစ် တာဝန်ထမ်းဆောင်ချိန်အတွင်း သူဟာ အိန္ဒိယရဲ့ အဓိကပြိုင်ဘက် အိမ်နီးချင်း ပါကစ္စတန်နဲ့ ရင်ကြားစေ့နိုင်ရေးအတွက် အကြိမ်ကြိမ်ကြိုးစားခဲ့ပြီး ဆယ်စုနှစ်များစွာကြာ ဆိုးရွားနေတဲ့ဆက်ဆံရေးကို ပြန်ကောင်းဖို့ ကြိုးပမ်းခဲ့ပါတယ်။

၂၀၀၈ ခုနှစ်မှာ ပါကစ္စတန်အခြေစိုက် အကြမ်းဖက်အုပ်စုတစ်စုဦးဆောင်တဲ့ မွမ်ဘိုင်းမြို့က တိုက်ခိုက်မှုမှာ လူ ၁၇၁ ဦးသေဆုံးခဲ့ပြီးတဲ့နောက်မှာတော့ ဆင်းရဲ့ ချဉ်းကပ်မှုကို ပြင်းပြင်းထန်ထန်မေးခွန်းထုတ်တာတွေရှိလာပါတယ်။

အိန္ဒိယနိုင်ငံသမိုင်းတစ်လျှောက် သွေးမြေကျမှုအများဆုံးတစ်ခုဖြစ်တဲ့ နာရီ ၆၀ ကြာ စီးနင်းမှုကြောင့် အစိုးရဟာ အကြမ်းဖက်မှုနဲ့ပတ်သက်လို့ ကိုင်တွယ်တာ ပျော့ပျောင်းလို့ ဒီလိုအကြမ်းဖက်မှုဖြစ်တာလို့ အတိုက်အခံတွေက ပြစ်တင်ခဲ့ပြီးနောက် စွပ်စွဲချက်မျိုးစုံရှိလာပါတယ်။

နောက်ပိုင်းနှစ်တွေမှာတော့ ဆင်းချမှတ်ခဲ့တဲ့ ဆုံးဖြတ်ချက်တွေဟာ ဆိုးရွားတဲ့ သက်ရောက်မှုတွေရှိခဲ့ပါတယ်။

၂၀၁၁ ခုနှစ်မှာ လူမှုတက်ကြွလှုပ်ရှားသူ အန်နာ ဟာဇာရီ ဦးဆောင်တဲ့ ခြစားမှုတိုက်ဖျက်ရေးလှုပ်ရှားမှုကြောင့် ဆင်းအစိုးရ တုန်လှုပ်ခဲ့ရပါတယ်။ အသက် ၇၂ နှစ်အရွယ် ချိနဲ့နဲ့ ဆင်းဟာ ပြင်းထန်တဲ့ ခြစားမှုတိုက်ဖျက်ရေးဥပဒေ အတည်ပြုပေးဖို့ တောင်းဆိုတဲ့အခါ လူလတ်တန်းစားတွေရဲ့ သူရဲကောင်းဖြစ်ခဲ့ရပါတယ်။

လူလတ်တန်းစားတွေရဲ့ သူရဲကောင်းဖြစ်တဲ့ ဆင်းဟာ ဟာဇာရီရဲ့ တောင်းဆိုမှုတွေကို အမြင်ကျယ်ကျယ်နဲ့ ဖြေရှင်းပေးဖို့ မျှော်လင့်ခံခဲ့ရပါတယ်။ ဒါပေမဲ့ ဆင်းဟာ လှုပ်ရှားမှုကို နှိမ်နင်းဖို့ ကြိုးပမ်းပြီး ဟာဇာရီကို ဖမ်းဆီးစေပြီး သူ့အဖွဲ့ကို ဖျက်သိမ်းခဲ့ပါတယ်။

ဒီလိုလုပ်ဆောင်တာကြောင့် သူ့ကို မီဒီယာနဲ့ ပြည်သူတွေက ဆန့်ကျင်လာခဲ့ပါတယ်။ သူ့ရဲ့ အပြောနည်းနည်း အလုပ်များများလုပ်ပြတဲ့ ပုံစံကို လေးစားခဲ့သူတွေတောင် သူ့ကို အထင်မှားခဲ့တာလို့ ယူဆလာကြပြီး သူ့ရဲ့ အေးဆေးတည်ငြိမ်တဲ့ နည်းလမ်းတွေကို သိပ်အကောင်းမမြင်နိုင်တော့ပါဘူး။

နောက်တစ်နှစ်မှာတော့ ဒေလီမှာ မိန်းကလေးတစ်ဦးကို အုပ်စုဖွဲ့လိင်ပိုင်းအနိုင်ကျင့်ပြီး သတ်ဖြတ်ခဲ့မှုနဲ့ပတ်သက်လို့ ဆင်းဟာ တစ်ပတ်ကျော်ကြာ မှတ်ချက်တစ်စုံတရာမပေးခဲ့တာကြောင့် အဲဒီလိုထင်မြင်မှုတွေ ပိုမိုကြီးမားလာခဲ့ပါတယ်။

အခြေအနေပိုဆိုးသွားစေတာက အိန္ဒိယရဲ့စီးပွားရေးတိုးတက်မှု နှေးကွေးတာပါပဲ။ ခြစားမှုကြီးထွားလာပြီး အလုပ်အကိုင်ဖန်တီးပေးနိုင်မှု လျော့ကျသွားတာက အများပြည်သူ မကျေနပ်မှု ပိုတိုးလာခဲ့ပါတယ်။ ပြီးတော့ ဆင်းရဲ့ ခပ်လျှိုလျှိုနေတတ်တဲ့ ပုံစံဟာ တစ်ချိန်က အပြုသဘောရှုမြင်ခံခဲ့ရပေမဲ့ အခုအချိန်မှာတော့ ပျော့ညံ့မှု၊ လျစ်လျူရှုတတ်မှုနဲ့ မာနကြီးမှုလို့ ထင်မြင်လာကြပါပြီ။

ဒါပေမဲ့ ဆင်းဟာ သူ့ကိုယ်သူ ခုခံကာကွယ်ရှင်းပြတာတွေမလုပ်ခဲ့ဘဲ ဝေဖန်မှုတွေကို အေးဆေးသက်သာစွာ ရင်ဆိုင်ခဲ့ပါတယ်။

၂၀၁၄ ခုနှစ် အထိပါပဲ။ သူဟာ တတိယသက်တမ်းထမ်းဆောင်မှာမဟုတ်ဘူးလို့ ဆင်းဟာ ရှားရှားပါးပါးပြုလုပ်တဲ့ သတင်းစာရှင်းလင်းပွဲမှာ ပြောဆိုခဲ့ပါတယ်။

ဒါပေမဲ့ သူဟာ အရှုပ်တွေကို ရှင်းဖို့ လုပ်ခဲ့ပါသေးတယ်။ "သမိုင်းက ကျွန်တော့်ကို ခေတ်ပြိုင်မီဒီယာတွေ၊ လွှတ်တော်ထဲက အတိုက်အခံပါတီတွေထက် ပိုမိုအကောင်းမြင်စွာ ဆက်ဆံမယ်လို့ ရိုးရိုးသားသားယုံကြည်ပါတယ်" လို့ သူက သူ့သက်တမ်းအတွင်း အကြီးမားဆုံး အောင်မြင်မှုတွေက တင်ပြရင်း ပြောဆိုခဲ့ပါတယ်။

သူ မှန်ကန်ခဲ့ပါတယ်။

ကွန်ဂရက်စ်ပါတီရော ဆင်းပါ ထိခိုက်နစ်နာမှုတွေက အဖတ်မဆယ်နိုင်ခဲ့တာမို့ အထွေထွေရွေးကောက်ပွဲမှာ ဘီဂျေပီပါတီကို ရှုံးနိမ့်ခဲ့ပါတယ်။ ပြဿနာတွေရှိခဲ့ပေမဲ့ ကြင်နာတတ်ပြီး အမျှော်အမြင်ရှိတဲ့ ခေါင်းဆောင်ဆိုတဲ့ ပုံရိပ်ဟာ ဆင်းနဲ့အတူ အမြဲရှိခဲ့ပါတယ်။

ဝန်ကြီးချုပ်သက်တမ်းမှာ အငြင်းပွားစရာတွေရှိခဲ့ပေမဲ့ သူဟာ ဂုဏ်သိက္ခာရှိရှိနေခဲ့ပါတယ်။

သူ့မူဝါဒတွေဟာ လူလတ်တန်းစားနဲ့ လူဆင်းရဲတွေကို အဓိကထားခဲ့ပြီး အစိုးရဝန်ထမ်းတွေ လစာတိုးရေးကို အတည်ပြုခဲ့ပါတယ်။

ငွေကြေးမဖောင်းပွအောင် ထိန်းချုပ်နိုင်ခဲ့ပြီး ပညာရေးနဲ့ အလုပ်အကိုင်ဆိုင်ရာတွေမှာ ပြောစမှတ်တွင်တဲ့ မူဝါဒတွေကို အကောင်အထည်ဖော်ခဲ့ပါတယ်။

နိုင်ငံရေးဒုက္ခသုက္ခတွေကနေ သူ့ကို ဆွဲထုတ်ဖို့၊ သူ့ ဝန်ကြီးချုပ်သက်တမ်းအတွင်း မအောင်မြင်မှုတွေက သူ့ကို ကာကွယ်ပေးဖို့ မလုံလောက်ခဲ့ပါဘူး။

ဒါပေမဲ့ သူ့ရဲ့ ရှက်ကြောက်မှုတွေအတွက်ဆိုရင် သူဟာ ဆုံးဖြတ်ချက်ပြတ်သားတဲ့ ခေါင်းဆောင်တစ်ဦးဖြစ်ခဲ့ပါတယ်။