Ysgrifennu a gwerthuso theatrGwella dealltwriaeth o adolygu drama

Mae’r cyflwyniad yn cynnwys y wybodaeth bod dwy ddrama yn y cynhyrchiad, enwau’r dramodwyr ynghyd â manylion am y cwmni theatr ac ymhle y cafodd y cynhyrchiad ei lwyfannu.

Mae’r adolygydd yn gwybod llawer am y deunydd sy’n gyffredin rhwng y ddwy ddrama sef yr awdur Kate Roberts, ac mae’n cynnig manylion am gyd-destun y dramâu. Mae’n disgrifio’r thema gyffredin sy’n rhedeg drwy’r ddau gynhyrchiad sef ‘newid’. Yn y ddrama gyntaf mae’r newid yn dilyn marwolaeth gŵr Kate Roberts sy’n arwain at gyfeiriad newydd yng ngwaith yr awdur. Yn yr ail ddrama, sy’n addasiad o gasgliad adnabyddus Kate Roberts o straeon byrion, Te yn y Grug, y newid ydy diwedd plentyndod.

Mae Elinor Gwynn yn sôn am y set bren syml sy’n cynnig cefndir i’r golygfeydd dan do ac awyr agored. Mae hefyd yn disgrifio defnydd effeithiol o effeithiau sain, ee sain y wasg argraffu yn y cefndir.

Mae Elinor Gwynn yn dweud nad oes unrhyw dystiolaeth gadarn fod Kate Roberts wedi cael perthynas agos gyda Daisy Wagner fel y dangosir yn Cyfaill. Mae’n sôn ei bod wedi darllen deunydd cefndir ar y pwnc, ee bywgraffiad o Kate Roberts, sy’n cefnogi ei sylw’n dda. Mae hefyd yn sôn am ymateb y gynulleidfa i’r dramâu a gafodd eu perfformio gyda’i gilydd. Roedd yr ail yn fwy doniol ac roedd y deunydd gwreiddiol yn fwy adnabyddus a oedd yn golygu ei fod yn fwy difyr i’r gynulleidfa.

Does dim manylion am y cast tan ddiwedd yr adolygiad. Yn ddelfrydol dylai’r adolygydd fod wedi sôn am y cast yn ei sylwadau agoriadol. Ond mae’r adolygydd yn sôn am un aelod o’r cast yn benodol am ei pherfformiad rhagorol fel Begw yn Te yn y Grug.

Roedd yr adolygiad hwn yn dda. Roedd yn cynnwys barn gytbwys am gryfderau a gwendidau’r dramâu gyda’r adolygydd yn cynnwys digon o enghreifftiau o’r cynyrchiadau. Hefyd roedd ganddi wybodaeth dda am y deunydd gwreiddiol a oedd yn ysbrydoliaeth i’r ddrama gan gynnig dehongliad manwl yn hytrach nag un arwynebol yn unig.