Masrii: Saanduuqawwan reeffaa waggoota 2,500'f awwaalaman argaman
Madda suuraa, EPA
Saanduqawwan 27 kan mukaa irraa hojjatamanii baroota 2,500 oliif lafa jalatti awwaalamanii turan qorattoota Masriin argamuun ibsame.
Arkiyoolijistoonni kunneen akka jedhaniitti, saanduqawwan reeffaa kunneenis bakka Saqqaaraa jedhamuufi Kaabaa magaalaa Kaayirootti argamuutti kan argaman.
Isaan keessaayis saanduqawwan 13 jalqaba baatii kanaarratti kan argaman yoo ta'u, kan hafan 14 ammoo itti aansee kan argamaniidha jedhan qondaaltoonni biyyatti.
Argannoon kunis isa guddaadha jechuun qondaaltoonni ibsaniiru.
Suuraawwan bakkichaa gadhiifaman akka mul'isanittis saanduqawwan argaman kunneen kan haalluu adda addaatiin dibamanii haala gaariin eegaman yoo ta'u, muraasni ammoo faayaaleedha.
Saaqqaaraan bara 3,000 dura lafa awwalchaa ta'un kan tajaajileefi amma akka qabeenyaa Addnyaatti UNESCO'n kan galmaa'eedha.
Madda suuraa, EPA
"Qorannoon jalqabaa saanduqawwan reeffaa kunneen kan cufamaniifi erga awaalamanii takkaa saaqamanii kan hinbeekne ta'u mulliseera'' jedhan Ministirri qabeenyawwan durii Masrii.
'Icciitiiwwan dabalataa'
Ibsa Ministirri Qabeenyawwan durii biyyattii Kaalid at-Amaanii baasaniin, jalqaba hanga ofii isaa qaamaan bakkichatti argamee hubatanitti argannoo kana ibsuu hinbarbaannee ture.
Erga eddoo qorannichaatti argamuun hubataniin booda hojjattoota dirree sanarra boollaa gadi fageenya meetira 11 keessa haala rakkisaan hojjataa jiran galateeffatan.
Madda suuraa, EPA
Hojjattoonni ka'umsa awwaalcha sanaa hanga adda baasaniitti hojiin qotuu ittuma fufee jiraachuun himameera.
Madda suuraa, EPA
Ministirichis guyyoota dhufan muraasa keessatti 'Icciitiiwwan dabalataa' adda baasuuf abdii qabaachuu himaniiru.
Madda suuraa, Egyptian Ministry of Tourism and Antiquities
Saanduqawwan mukarraa hojjataman kanneen birattis meeshaaleen durii harkaan hojjatamaniifi faayyeeffaman illeen argamusaanii himameera.
Madda suuraa, Egyptian Ministry of Tourism and Antiquities
Kana duras baatii Muddee keessaa qorattoonni reeffa bineensootaa gogan argachuunsaanii ni yaadatama. Kunis, yeroo jalqabaatiif ummatatti ifa ta'e.
Reeffa bineensotaa goganii argaman keessaa kan simbiroottaa, bofaa, qocaafi kkf ni argamu.
Madda suuraa, Reuters
Saqqaaraan Magaalaa Kaayiroo irraa fageenya kiloometira 30 irratti kan argamuudha. Bakki kunis dirree lafa qorannoo ta'uun tajaajiluudha.
