Sunday Igboho linked with Boko Haram Sponsor: Ẹgbẹ́ Ilana omo Oodua ní ìjọba ń gbìyànjú láti dẹ́rù ba ẹ̀yà Yoruba ni

Agbarijọpọ awọn ẹgbẹ to n ja fun idasilẹ orilẹ-ede Yoruba, Ilana Omo Oodua (IOO) ti ṣapejuwe ẹsun igbesunmọmi ti ijọba Naijiria fi kan Sunday Adeyemo Igboho, gẹgẹ bi ọrọ oponu ati nkan to pa ni lẹẹrin.

Wọn ni igbiyanju lati tabuku ijijagbara awọn eeyan Yoruba labẹ ofin ni igbesẹ ijọba Naijiria.

Ọjọ Ẹti ni Agbẹjọro Agba ni Naijiria, to tun jẹ Minisita fun eto idajọ, Abubakar Malami, sọ pe Sunday Igboho ni ibaṣepọ pẹlu awọn to n ṣagbatẹru igbesunmọmi ni Naijiria. Bakan naa lo sọ pe aṣofin agba kan lo n ko owo fun Igboho lati maa gbesunmọmi.

Lara ẹsun igbesunmọmi ti wọn fi kan Igboho ni pe o fi owo ranṣẹ si ẹnikan to jẹ alabarin ọkunrin kan, Saurajo Abubakar Muhammad, ti wọn ran lọ si ẹwọn nilu Dubai nitori igbesunmọmi.

Ṣugbọn ninu atẹjade ti Akọwe ẹgbẹ Ilana Omo Oodua, Ọgbẹni Maxwell Adeleye, fi sita ni lori ẹsun naa, o ni ẹsun naa ko lẹsẹ nilẹ rara, to si jẹ ọna lati dẹru ba ijijagbara awọn ọmọ Yoruba.

"A ti ka atẹjade ti Malami fi sita fun ijọba Naijiria, a si ri i pe ko si ibi kan ninu atẹjade naa to fihan pe Sunday Igboho ni nkan ṣe pẹlu igbesunmọmi."

O ni nkan ti awọn ri ka ni pe Igboho fi miliọnu mejila ati ẹgbẹrun lọna ẹgbkẹrin din aadọta Naira ranṣẹ si Abdullahi Usman, to jẹ ọrẹ ẹni ti wọn ju si ẹwọn fun igbesunmọmi.

Ẹgbẹ IOO sọ pe oniṣowo ọkọ ni Sunday Igboho, to si ma n ni nkan ṣe pẹlu awọn to n ṣẹ owo Naira si ti ilẹ okeere, gẹgẹ bi awọn oniṣowo ṣe ma n ṣe.

Ẹgbẹ naa sọ pe nkan to pani lẹrin ni ẹsun yii.

Lori ti aṣofin ti wọn lo n fi owo ran Igboho lọwọ, ẹgbẹ IOO sọ pe ọdun 2013 ni ọrọ fifi owo ranṣẹ laarin aṣofin naa ati ileeṣẹ Sunday Igboho, Adesun International Concept Ltd, ti waye, ṣaaju ki ipolongo idasilẹ Yoruba Nation to o bẹrẹ ni ọdun 2019.

Wọn ni gẹgẹ bi oniṣowo ọkọ, ẹnikẹni lo le ra ọja lọwọ rẹ.

Ọgbẹni Adeleye gba Abubakar Malami ni imọran pe ko lo okun ati agbara rẹ lati fi ṣe eto bi awọn eniyan Gusu yoo ṣe ni orilẹ-ede ti wọn.