Sikiru Ayinde Barrister: Kwam 1 ní Agbajelola ló ṣe olùlànà fún àwọn olórin Fuji òde òní

Gbajugbaja olorin Fuji ati Mayegun ilẹ Yoruba, Wasiu Ayinde, ti ọpọ eeyan mọ si K1, ti kan sara si ẹni to da orin fuji silẹ, Sikiru Ayinde Barrister.

Wasiu lo gboṣuba kare naa fun Barrister nibi ayẹyẹ iranti ọdun kẹwaa to jade laye, eyii to waye ni Ikoyi, ni ipinlẹ Eko.

Nibi ayẹyẹ naa ti ọpọ ẹbi, ọrẹ ati ojulumọ Barrister peju si ni Kwam 1 ti sọ pe orin fuji ni Barrister duro fun ni igba aye rẹ.

O ni "oni yii ni a n ṣiṣọ loju eegun ohun ti Barrister fi gbogbo aye rẹ ṣe, to si tun jiya le lori fun gbogbo agbaye lati mọ pe orin Fuji ti wa orisun rẹ̀ ri."

Kwam 1 ṣalaye pe "a le fi orin Fuji we orin Reggae laye atijọ, ṣugbọn lode oni, orin Fuji gangan ni ohun ti wọn mọ wa fun kaakiri agbaye."

Wasiu sọ pe Barrister lo ṣe olulana fun awọn olorin Fuji bi oun, ati pe Barrister ko ku, nitori ohun to ti ṣe silẹ ṣi n fọhun sibẹ.

Lẹyin naa lo ki awọn ẹbi Barrister ku oriire pe wọn gbẹyin ologbe ọhun, paapaa lori ipa to fi silẹ ko to fi aye silẹ.

Ọjọ kẹsan an, oṣu Keji, ọdun 1948 ni wọn bi Sikiru Ayinde Barrister si idile Salawu Balogun ni ilu Ibadan.

Barrister gbe awọn orin to le ni aadọrin jade, bẹẹ naa lo tun gba ọpọlọpọ ami ẹyẹ ko to dagbere faye lọdun 2010.