Láàrín Adeleke àti Oyetola, ta ló ń parọ́ lórí ọ̀rọ̀ N76 bílíọ̀nù, gbèsè owó oṣù òṣìṣẹ́ Osun?
Oríṣun àwòrán, @Ibrahimmaurufg1
Ọrọ gbese owo oṣu oṣiṣẹ kun ara ohun to n fa awueyewuye laarin ijọba ana ati ijọba to wa lode lọwọ ni ipinlẹ Ọṣun bayii.
Gomina ana ni ipinlẹ Ọṣun, Adegboyega Oyetọla ti fesi si ọrọ ti ijọba gomina Aadeleke sọ pe gbese owo oṣu oṣiṣẹ ati awọn oṣiṣẹfẹyinti to to biliọnu marundinlọgọrun naira, (N75billion) loun fi silẹ.
Gomina Oyetọla ni irọ nlanla ni ọrọ nitori pe ohun ko jẹ gbese oṣu kan ṣoṣo bayii ni gbogbo saa ọdun mẹrin ti oun lo nipo.
Ninu atẹjade kan ti agbẹnusọ fun Oyetọla, Ismail Omipidan fi sita, O ni gbese ti wọn n sọ yoo jẹ gbese ti gomina ijẹta, iyẹn Rauf Arẹgbẹṣọla jẹ awọn oṣiṣẹ.
Bi o tilẹ jẹ wi pe nigba naa, gomina Oyetọla ni olori awọn oṣiṣẹ ni ọfiisi gomina lasiko iṣejọba Arẹgbẹṣọla, gomina Oyetọla ni aijẹ oṣiṣẹ ni gbese oun lo mu ki ọrọ iyanṣọlodi oṣiṣẹ di ohun ti ko waye ni saa oun.
“Pẹlu iye owo ti wọn gbe jade, o fihan pe a ko san owo oṣu fun odindi ọdun kan niyẹn, ṣe iyẹn ṣeeṣe rara? Awọn ẹgbẹ oṣiṣẹ gan lee jẹri sii pe a ko jẹ gbese oṣu kan bayii lasiko saa wa, bẹẹ ni a ko si ya owo kankan ni banki.”
Gbèsè tí iye rẹ̀ tó ₦76b ni Oyetola fi sílẹ̀ fùn wa – Ìjọ̀ba Osun
Ijọba ipinlẹ Osun ti fẹsun kan ijọba Gboyega Oyetola to ṣẹṣẹ kuro lori alefa pe gbese ti iye rẹ to biliọnu mẹrindinlọgọrin naira lo fi silẹ de oun.
Agbẹnusọ gomina ipinlẹ naa, Olawale Rasheed, sọ pe akọwe agba ileeṣẹ eto iṣuna, Bimpe Ogunlumade lo fi ọrọ naa lede lasiko to n sọrọ lori ibi ti eto iṣuna ipinlẹ naa de duro.
O ni awọn gbese naa jẹ awọn owo oṣu, owo ifẹyinti atawọn owo mii to yẹ ki ijọba ana ti san lasiko to wa lori oye.
Oríṣun àwòrán, other
O ni “Ijọba Osun ti ṣawari gbese gọbọi kan to jẹ owo oṣu, owo ifẹyintin, atawọn owo mii to yẹ ki ijọba ana ti san ṣaaju, eyii ti iye rẹ to biliọnu mẹrindinlọgọrin naira.”
“Awari yii lodi si ọrọ ti gomina ana sọ ṣaaju pe biliọnu mẹrinla naira ni oun fi silẹ silẹ de ijọba tuntun, atawọn ọrọ mii to sọ, eyii to jẹ irọ nla gbaa.”
Gẹgẹ bii ọrọ ti akọwe agba ipinlẹ naa sọ, bi isọri awọn gbese naa ṣe lọ ree:
- Gbese owo oṣu: ₦29,875,191,128.64
- Gbese owo ifẹyinti: ₦45,375,237,693.40
- Gbese owo Group Life Assurance Scheme: ₦554,644,028.97
Apapọ iye gbese naa: ₦75,805,072,851.01
O pari ọrọ rẹ pe “A fẹ ki gbogbo araalu mọ pe kii ṣe iye gbogbo gbese ti ijọba ana jẹ silẹ fun wa ree o, a oo maa bu yin gbọ nipa awọn gbese to ku to ba di lọla.”
Ẹwẹ, lasiko ti gomina ana, Gboyega Oyetola n gbe ọpa aṣẹ ipinlẹ naa silẹ, lara awọn nnkan to sọ ni pe oun ko jẹ awọn oṣiṣẹ kankan lowo, bẹẹ naa ni oun fi owo ti iye rẹ to biliọnu mẹrinla naira kalẹ fun ijọba tuntun to n bọ.
