Порошенко: биз Россия билан урушаяпмиз

Украина Президенти Пётр Порошенко Би-би-си билан суҳбатда мамлакати Россия билан тўғридан-тўғри уруш ҳолатида эканлигини айтди.

Россия шу вақтгача Украина шарқидаги можарога алоқаси борлигини қатъиян рад этиб келади.

Президент Порошенко суҳбат мобайнида куни кеча яна икки Россия аскари Украина ҳудуда ушланганлигини айтди.

Россия мудофа вазирлиги эса Луганск вилоятида ушланган бу икки аскар қўлга олинган вақти Россия қуролли кучлари сафларида бўлмаганликларини билдирган.

Жаноб Порошенко эса аскарларнинг ушлангани, Россия аралашувининг яна бир далили, деб айтди.

Пётр Порошенко: Келинг очиқчасига айтайлик. Биз Россия дастаклаётган бўлгинчилар билан курашмаяпмиз. Бу Россия билан ҳақиқий уруш. Биз икки Россия аскарини қўлга олдик. Бир неча ҳафта ва ойлар аввал эса дастлаб 20 ва кейинчалик 60 нафар Россия махсус кучлари аскарини қўлга олгандик. Бу тўғридан-тўғри урушнинг навбатдаги далили. Кечаги рўзномалардан бирида "Россия аскари" иборасини қўштирноқ ичида ёзаётганликларига гувоҳ бўлдим. Лекин улар бу ерга уришиш учун келган махсус кучларнинг ҳақиқий зобитлари. Киевга келиб ўз кўзингиз билан кўришингиз мумкин. Қўштирноқ ичига олишнинг ҳожати йўқ. Биз яна қандай далилларни жаҳонга намойиш этишимиз керак? Майли, жаҳон бизга ишонади. Лекин Россияга булар уларнинг аскарлари, уларнинг қўшинлари, уларнинг уруши ва ҳамлалари эканлигининг яна қандай далилларини келтиришимиз керак?

Би-би-си: Агарда сиз Ғарбдан умид қилаётган қўлловингизга эришмасангиз, Украинанинг келгуси ҳаракатлари қандай бўлади?

Пётр Порошенко: Биз курашамиз. Бизнинг мақсадимиз тинчлик. Тинчлик учун эса икки нарса керак. Биринчидан, мамлакат мустақиллигининг муҳим унсури бўлган чегаралар Россия аскарлари ва қурол-яроғи учун ёпиқ бўлиши керак. Россиянинг ҳамма ҳарбий бўлинмалари Россияга олиб чиқиб кетилиши керак. Ана шулар бўлмаса бизда ҳеч қандай ички муаммо, фуқаролар уруши бўлмасди. Бизда тинчлик ва барқарорлик ўрнатиларди.

Би-би-си: Сиз Владимир Путинга ишонасизми?

Пётр Порошенко: (Пауза. - таҳр.) Ишонаманми? Даргумон...

Би-би-си: Агар унга ишонмасангиз музокарларни қандай олиб борасиз?

Пётр Порошенко: Менда танлов йўқ. Мен бизнинг ҳудудларимизни озод қилишга ҳарбий йўл билан эришиш мумкин деб ўйламайман.

Би-би-си: Демак сиз ҳарбий йўл билан ҳудудларни қайтаришга уринмайсиз?

Пётр Порошенко: Йўқ. Мен тинчликпарвар президентман. Мен тинчликни сақлаш учун ҳамма нарсани қилаяпман. Шунинг учун биз шу йил 12 феврал куни Минскда 10 соат узлуксиз музокара ўтказдик. Ўтган йили сентябрда ҳам музокараларнинг икки даврасини ўтказдик. Биз Минск битими шартларининг ҳаммасини имзоладик ва уларга риоя қилишга тайёрмиз. Россиядан ҳам шуни талаб қиламиз. Албатта мамлакатлар уруш ҳолатида бўлса уларнинг ўртасида ишончга умид қилиш қийин. Лекин менга боғлиқ ҳамма нарсани қилмоқдаман.

Би-би-си: Янги ҳамлалардан хавфсирамоқдасизми?

Пётр Порошенко: Мен ҳеч нимадан қўрқаётганим йўқ. Лекин улар ҳужум тайёрламоқдалар, деб ўйлайман. Мен бу ҳужумларга тайёр бўлишимиз керак, деб ўйлайман. Биз уларни ҳужумга гижгижлаш учун ҳеч қандай баҳона бераётганмиз йўқ. Шунинг учун бутун масъулият уларнинг гарданида. Биз Минскда берилган ваъдаларнинг ҳаммасига, жумладан оташкесим шартига мутлақо риоя қиламиз. Лекин Россия ва у қўллаб-қувватлаётган террорчилар бундай қилмаяптилар. Бунинг ўрнига улар қўшинларни юборишмоқда, украиналикларни ўлдиришмоқда ва вазиятни ёмонлаштиришмоқда.

Би-би-си: Бу урушда ўғиллари ҳалок бўлаётган аскар онасига нима деган бўлардингиз? Масалан фақатгина камбағалларниннг ўғиллари ҳалок бўаётгани, казоларнинг фарзандлари тинчгина уйда ўтиришгани ва мамлакатда ҳеч нима ўзгармаётганини айтаётган одамга қандай жавоб берган бўлардингиз?

Пётр Порошенко: Бу фожеа, нафақат оналар учун, балки бутун мамлакат учун. 1800 аскарнинг оиласи учун фожеа. 7000 ҳалок бўлган инсон оилалари учун фожеа. Бу ерда гап камбағаллар ва бойлар ўртасидаги муносабат ҳақида кетаётгани йўқ. Бу тажовуз оқибати, менинг мамлакатимга қарши тажовуз оқибати. Ва биз бу тажовуз учун масъул бўлган шахснинг жавобгарлиги ҳақида гапиришимиз керак. Ва менинг ишончим комилки, бу тажовузни тўхтатиш ва қурбонлар сонининг ортишининг олдини олиш учун мен қўлдан келган ишни қилмоқдаман.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

Instagram – BBC UZBEK

Twitter – BBC UZBEK

Odnoklassniki – BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio