Украина: бўлгинчилар қўшинларини олиб чиқишга рози

Украина шарқида оташкесимни таъминлаш бўйича қўшма гуруҳнинг Россия вакилига кўра, бўлгинчилар фронт жабҳасидан оғир техника қуролларини олиб чиқишга рози бўлганлар.

Генерал Александр Ленцовнинг айтишича, Луганск ва Донецк халқ республикалари раҳбарлари бу борадаги ҳужжатни имзолашган. Жабҳаларни қуроллардан тозалаш якшанба куни бошланиб, икки ҳафта давом этади.

Минск тинчлик келишувининг асосий бандларидан бири оғир артиллерия қуролларини олиб чиқиб кетиш ҳисобланади. Жанглар тўхтамагани боис, келишув ортга сурилган эди.

Киевдаги ОҲҲТ кузатувчиларига кўра, баъзи ҳудудларда отишмалар ҳамон давом этаётган бўлсада, тинчлик битими бўйича анча илгари силжиш бор.

Шанба куни кечқурун Луганск яқинида томонлар асирларни алмашганлар. Бўлгинчилар 52 жангчиси учун 139 украиналик аскарларни қайтарган.

Алмашилган асирларнинг кўплари ярадорлардир.

Бироқ иккала томонда яна қанча асир ушлаб турилгани номаълум.

Украина президенти ёрдамчиси Юрий Бирюков Дебалцеводаги охирги жангларда армия 179 кишини йўқотганини қайд этган.

Янги санкциялар

АҚШ Давлат котиби Жон Керри Украинадаги жангларни янгидан ўт олдиришга алоқадорлиги учун Россия "жиддий жазолар"га юз тутиши мумкинлигидан огоҳлантирди.

Лондондаги сафари пайти жаноб Керри Президент Обама яқин кунларда янги санкциялар ва Киевга қурол етказишни бошлаш бўйича бир қарорга келишини айтган. Вашингтон Оврўполик ҳамкорлари билан бу борада маслаҳатлашмоқда.

"Навбатдаги санкциялар шундоғам қийинчиликларни бошдан кечираётган Россия иқтисодига янги муаммоларни келтириб чиқаради", дейди у. Керри жаноблари Британия Ташқи Ишлар вазири Филипп Хэммонд билан музокаралар олдидан "Америка Россия билан ўйин ўйнамоқчи эмаслиги, бироқ Москванинг Украинадаги воқеаларга алоқадор ҳаракатлари чегарадан чиқиб кетган"лигини билдирган.

12 февралда Минскда Украина инқирозига чек қўйиш, ўт очишни тўхтатиш бўйича тинчлик битимига эришилган бўлсада, Дебалцевода жанглар шиддати кучайиб кетган. Кўплаб қурбонлар берилган.

Можаро томонлари бир-бирларини оташкесимга амал қилмаётганликда айблаганлар.

Украина ва Ғарб Россияни бўлгинчиларга қурол етказиб беришда ва жанг ҳаракатларида тўғридан-тўғри қатнашаётганликда айблайди. Москва бу иддаоларни қатъиян рад этади.

23 феврал қуролли кучларнинг байрами маросимида жаноб Путин Россияга ҳеч ким босим ўтказа олмаслигини таъкидлаган.

Президент Петр Порошенко Фейсбукдаги саҳифасида барча украиналикларни 23 феврални ватан ҳимоячилари куни сифатида байрам қилишдек "кўп йиллик одат"дан воз кечишга чақирган.

Украинада шанба ва якшанба кунлари Майдон қурбонлари хотирланган.

Хабарларга кўра, Харковдаги юришда портлаш содир этилган, қурбонлар борлиги айтилмоқда.

Украина Хавфсизлик Хизмати билдиришича, камида икки киши ҳалок бўлган, 11 таси жароҳатланган.

Харковда аксилтеррор амалиётлар эълон қилинган.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02