Шарқий Украина: оғир қуроллар чекинтирилмаган

Украина ҳукумати ва бўлгинчи исёнкорлар оғир қуролларни жабҳа чизиғидан чекинтириш амалларини ўз вақтида бажаришгани йўқ. Маълумки, келишувга биноан улар бу ҳаракатни душанба куни амалга оширишлари керак эди.

Ҳукуматнинг билдиришича, токи Дебалцево атрофида жанглар давом этар экан, улар қуролларни чекинтиришмайди.

Олмония, Украина ва Россия раҳбарлари инқирозни тун бўйи телефонда муҳокама қилишган.

Сешанба куни эрталаб Олмониянинг билдиришича, улар кузатувчиларга кенгроқ имконият яратиш бўйича "конкрет чораларга" келишишган, бироқ бу чоралар тафсилотини бергани йўқ.

Оташкесимни кузатиш вазифаси юкланган Оврўпада Хавфсизлик ва Ҳамкорлик бўйича Ташкилотнинг кузатувчилари Дебалцево шаҳарчасига етиб боришга ҳаракат қилишмоқда, бироқ ҳозирга қадар исёнкорлар тарафидан у ерга қўйилмаган.

"Олмон канцлери ва Украина Президенти Россия Президентига даъват қилиб, исёнкорларни оташкесимга риоя қилишга ундаш бўйича ўз таъсирини ўтказишга чақиришган", - деб айтди Олмония сўзчиси Штефен Зельберт.

Умуман олганда, якшанба кунидан бошлаб оташкесим кенг маънода татбиқ этилмоқда, бироқ исёкорларнинг айтишича, бу келишимдан улар қуршаб олган Дебалцево шаҳарчаси истиснодир.

Расмийларнинг билдиришича, шарқий Украинада инқироз ўтган апрел ойида бошланганидан бери у 5,400 кишининг умрига зомин бўлган.