Меркел ва Олланд Украина инқирозини Москвада муҳокама қилади

Франция Президенти Франсуа Олланд ва Олмония канцлери Ангела Меркел Украина шарқидаги инқирозга барҳам беришни муҳокама қилиш учун Москвага ташриф буюради.

Уларнинг Президент Путин билан музокараларида янги тинчлик режаси тақдим этилиши кутилмоқда.

Пайшанба куни икки давлат раҳбарларининг Киевга шошилинч ташрифлари ва Президент Порошенко билан тинчлик режасини муҳокамаси қарийб беш соат давом этган. Учрашув тафсилотлари ҳозирча маълум эмас.

Порошенконинг айтишича, Меркел хоним ва Олланд жаноблари билан учрашув "оташкесимга келишга умид уйғотади".

Киевдаги музокаралардан олдин Россия Президенти ёрдамчиси Юрий Ушаков Путин илгари сурган Украина инқирозига барҳам бериш режаси инобатга олиниши кераклигини айтган.

Бироқ Украина томонига кўра, янги режа музокаралар вакиллари иштирокида тузилган ва Путиннинг ҳеч қандай ҳужжатини кўзда тутмайди.

Украина Президенти сайтида чоп этилган хабарга биноан, "томонлар Донецк ва Луганскдаги инқирозни тинч йўл билан ечишни қувватладилар, ҳамда режа Россияга маъқул келишидан умид билдирдилар".

Киевда бўлган АҚШ Давлат котиби Жон Керрининг сўзларига кўра, Вашингтон ҳам инқирозни дипломатик йўл билан ечилиш тарафдори, лекин Россия тажовузкорлигига кўз юмиб бўлмайди.

Москва бўлгинчиларни қурол билан таъминлаб қолмай, Донецк ва Луганцкдаги жангларда исёнчилар қаторида доимий армияси иштирок этаётгани ҳақида Украина билан Ғарб айбловларини инкор этиб келади.

БМТга кўра, Украина шарқида апрел ойидан буён давом этаётган қарама қаршиликлар натижасида қурбонлар сони 5400 дан ошган.

Охирги ҳафталарда жанглар шиддати кучайиб кетган.

АҚШ вице президенти Жо Байден Брюсселда ОИ раҳбарлари билан учрашган. Вашингтон россияпараст бўлгинчиларга қарши курашда Киевга қурол етказиб бериш лозим демоқда.

Шу билан бирга, НАТОнинг Украинага қадами қон тўкишларни ошириши мумкинлигини ҳам тан олган.

Хавфсизлик кенгашининг Мюнхенда очиладиган йиллик анжуманида Украина инқирозини ҳал этиш бош масала бўлиши кутилмоқда.

Ўт очишни тўхтатиш умиди

Президент Олланд ива Меркел жума куни кечқурун Президент Путин билан учрашиб, тинчлик режасини муҳокама қилади.

Киевдаги музокаралардан олдин жаноб Олланд ўзи ва Меркел Украина ҳудудий бирлигига асосланган ва ҳамма учун фойдали бўлган тинчлик режасини илгари суришларини билдирган.

Шу билан бирга у дипломатия ниҳоясиз давом этмаслигидан ҳам огоҳлантирган.

Россия оммавий ахборот воситаларига кўра, янги тинчлик режаси Донецк ва Луганскдаги россияпараст бўлгинчиларга бир қадар автономия бериш ва улар талаб қилаётган ўт очишни тўхтатиш чегарасини белгилашни кўзда тутиши мумкин.

Кремл матбуот котиби Песков тафсилотларини очиқламаган ҳолда, жаноб Путин "Украинадаги фуқаролар урушига чек қўйиш"ни оврўполик ҳамкасблари билан муҳокама қилишини билдирди.

2014 йил сентябрида эришилган Минск келишуви ўт очишни тўхтатиш, оғир артиллерия қуролларини олиб чиқиш, асирларни алмашиш ҳамда Украина ва Россия чегарасида халқаро кузатувни таъминлаш шартларини ўз ичига олади.

Би-би-сининг Москвадаги мухбири Сара Райнсфорднинг хабар беришича, Украина инқирози бошланган ўтган йилдан буён Москвага илк бор ташриф буюраётган Меркел хоним Путин билан музокараларга умид билан қараётганини кўрсатади.

Бу шунингдек, АҚШ Киевга қурол етказиб берар экан, Москва бўлгинчиларга дастакни янада кўпайтириши ва Оврўпонинг қоқ юрагида хавфли урушни аланга олдиришидан хавотирларни англатади.

Пайшанба куни Киевда Украина Бош вазири билан учрашувдан сўнг матбуот анжумани берган АҚШ Давлат котиби Жон Керри Обама ҳамма вариантларни, жумладан Киевни бўлгинчиларга қарши мудофаа қуроллари билан таъминлаш чораларини кўриб чиқаётганини эслатган.

АҚШ ҳозирда Украина армиясига зирҳли кийимлар ва тунда кўриш воситалари етказиб беради.

Ўз навбатида Россия Ташқи Ишлар вазирлиги АҚШнинг Украинага қурол етказиб бериш ҳаракатлари Россия- Америка муносабатларига улкан зарар етказишини таъкидлади.

Шунингдек, бир қанча оврўполик мулозимлар Украинага Америка учувчи қуролларнинг етказилиши оқибатларидан хавотир изҳор этганлар.

Қрим аннексиясидан сўнг ўтган йилнинг апрел ойида Украина шарқида бошланган бўҳрон орқасидан 1,2 миллионга яқин украиналиклар уйларини ташлаб чиққанлар.

Би-би-си Ўзбек хизмати билан Whatsapp орқали боғланишни истасангиз телефонимиз: 44 7858 860002