Украина парламенти иттифоқларга қўшилмаслик мақомини бекор қилди
Сурат манбаси, Getty
Бу Украина ҳар қандай иттифоқ, хусусан, НАТОга аъзо бўлиб кириши учун йўл очилганини англатади.
Ушбу мақомни ёқлаб Украина Олий Радасидаги 303 депутат овоз берган.
Бу парламентдаги конституцион кўпчиликни англатади.
"Бу давлатимизнинг ҳар қандай ҳарбий иттифоққа кириши мумкинлигини англатади. Бу бизни Оврўпо ва Овроатлантика маконига етаклайди", деб айтган Украина Ташқи ишлар вазири Павел Кримкин.
Украина шарқидаги исёнчиларни Россия дастаклаётгани манзарасида Президент Пётр Порошенко мамлакатининг НАТО аъзолигига эришиши учун курашишга ваъда берган.
2014 йил мартида Қримни аннексия қилган Россия Донецк ва Луганскдаги жангариларни қурол-яроғ билан таъминлаб келаётганини рад этади.
Шунга қарамасдан, бу дастак Оврўпо Иттифоқи ва Америка Қўшма Штатларининг Россияга қарши жазо чоралари киритилишига сабаб бўлган.
Иттифоқларга қўшилмаслик мақомини 2010 йилда Украина Россия босими остида қабул қилган эди.
Украина парламентининг сўнгги қарори борасида баёнот эълон қилган НАТО бу қарорни ҳурмат қилишини айтган.
НАТОга аъзо бўлиб киришни истаган мамлакатнинг ичик можаролари ёки ҳудудий баҳслари бўлмаслиги талаб қилинади.
Бу ҳақда эслатган Россия Ташқи ишлар вазири Сергей Лавров, Олий Рада қарори тарангликни янада кучайтиради, деб айтган.
"Бу контрпродуктив, фақат қарама-қаршиликни кучайтиради, бундай қонунларни қабул қилиш билан Украина давлати ичидаги чуқур инқирозни ҳал этиш мумкин, деган иллюзияни пайдо қилади", деб айтган Россия ташқи ишлар вазири.
НАТОга аъзо бўлиб кириш учун мамлакатда референдум ўтказиш ҳам талаб қилинади.
Би-би-си Ўзбек хизмати билан Whatsapp орқали боғланишни истасангиз телефонимиз - +44 7858 860002
