Америка қўналғаларида Эбола текшируви бошланди

Нью-Йоркнинг Жон Кеннеди номидаги аэропортида дунё бўйлаб 4000 инсон умрига зомин бўлган Эбола вирусини юқтирганларни аниқлаш ишлари бошланган.

Шу пайтгача Эбола энг кўп одам ўлимига олиб келган Африканинг уч мамлакати - Либерия, Сьерра-Леоне ва Гвинеядан АҚШга учиб борган йўловчиларнинг тана ҳароратлари текшириб кўрилади, улар билан савол-жавоб ўтказилади.

Бундай текширув ишлари эрта-индин Нью-Йоркнинг яна бир аэропорти, Атланта, Вашингтон ва Чикаго ҳаво қўналғаларида бошланади.

Жаҳон Соғликни сақлаш ташкилоти маълумотларига кўра, дунё бўйлаб Эбола вирусини юқтирган ёки юқтиришда гумонланган инсонларнинг сони 8399ни ташкил этган.

Асосан Ғарбий Африка мамлакатларида 4033 киши ушбу ҳалокатли вирус оқибатида ҳаётдан кўз юмган.

9 октябр куни Эбола вирусини юқтирган бемор Техас штатида вафот этган.

Томас Данкан бу вирусдан ўлган АҚШдаги биринчи одам бўлган.

У Америкага учиб боришидан олдин Эбола вирусини Либерияда юқтирган.

Даллас шифхонасида Томас Данкан тўла ихоталанган эди.

Айни пайтда Биританиядаги айрим аэропортларда йўловчиларни Эбола вирусига текшириш бошланиши эълон қилинган.

Марокаш ҳукумати футбол бўйича Африка кубоги ўйинларини қолдириш таклифи билан чиққан.

2015 йилнинг 17 январидан 8 февралигача Африка Мамлакатлари кубоги мусобақаларини Марокашда ўтказиш режалаштирилган, бироқ мезбон мамлакат Эбола вируси тарқалиши муносабати билан футбол ўйинларини ўтказмасликни афзал демоқда.

Либерияда кейинги ҳафтага мўлжалланган сенат сайловини ҳам ортга суришга қарор қилинган.

Эбола вируси дунёда энг мудҳиш касалликлардан биридир, бироқ у гриппга ўхшаб ҳаво орқали тарқалмайди.

Шифокорларнинг айтишича уни юқтирмаслик учун бешта амални бажариш керак.

1. Совун ва сув

Қўлингизни муттасил равишда совун билан тоза сувда ювиб туринг ҳамда қуруқ сочиқ билан артинг. Қўл бериб саломлашишдан ҳам воз кечиб туришга тўғри келади. Эбола вируси касал инсоннинг бадан суюқликлари орқали тарқалади. Тер ҳам буларнинг сирасига киради.

2. Тега кўрманг

Агарда кимнидур Эболага чалинган деб гумонсирасангиз, унга тега кўрманг. Бу ҳолат айниқса касал яқинларингизга нисбатан шафқатсиз туюлса-да, лозимдир, чунки айтилгандек Эбола вируси бадан суюқликлари - теру сийдик, қону мишиқ, нажосату туфук, кўзёшу маний орқали ўтади.

Касал инсоннинг иситмаси чиқиб, мушаклари ва суяклари оғрийди, томоғи қақрайди, у қуса бошлайди, унинг ичи кетади. Бундайларни мумкин қадар тезроқ шифокорларга етказиш лозим.

3. Жасадларга ҳам тегманг

Агарда кимдир Эбола касаллигидан ўлган бўлса, унинг ҳам жасадига тега кўрманг. Жасаднинг ҳам суюқликлари орқали Эболани юқтириш мумкин. Буларни мутахассислар кўриши лозим.

4. Эбола тарқалган мавзеларда ҳайвон гўштини еманг

Эбола касаллиги авваламбор ҳайвонлардан инсонларга тарқалган, шунинг учун Эбола тарқалган ерларда овдан келган гўштни ейиш таъқиқланади.

5. Саросимага тушманг

Миш-мишларнинг тарқалиши қўрқувни кучайтиради. Шифокорлардан қўрқманг, улар касалликни тарқатиш учун эмас, балки ёрдам бериш учун тайинланган. "Иссиқ-совуқ" қабилидаги сарқитлар ҳам касалликнинг тарқалишига олиб келади.