Фелдмаршал Сиси Мусулмон Биродарларни йўқотишга онт ичди

Мисрдаги президент сайловлари фаворити ва армиянинг собиқ раҳбари Абдул Фаттоҳ Ал-Сиси, агар ғолиб чиқса тақиқдаги Мусулмон Биродарларни “бутунлай йўқ қилишга” қасам ичган.

У Миср телеканалига берган илк интервьюсида ўзига қарши уюштирилган икки суиқасддан омон чиққанини билдирди.

Сиси жаноблари Мисрда илк бор демократик йўл билан сайлаган президент Муҳаммад Мурсинини ўтган йилнинг июль ойида қудратдан ағдарганди.

Унинг 26-27 май кунлари бўлиб ўтадиган президентлик сайловларида ютиб чиқиши кутилмоқда.

Жаноб Сиси президент Мурсини тахтдан ағдарганда сиёсий амбициялари борлигини рад этган ва уни ўтган йили қўллаган Мусулмон Биродарлар ташкилотини қатағон қила бошлаганди.

Фелдмаршал Сиси қарорининг ўзгаришига ички ва ташқи таҳдидлар сабаб бўлганини айтган.

“Ватани, халқи ва унинг келажагини ҳимоя қилиши учун, олдинга чиқа олишга қурби бор ҳар ким чиқиши лозим”, - деган Сиси.

Ҳарбийлардан чиққан Сиси ўзининг армия томонидан қўйилган номзод деб билмаслигини таъкидлайди. Унга кўра ҳарбийлар Мисрни бошқаришда иштирок этмайди.

Сиси шунингдек, норозилик акциялари ўтказиш ҳуқуқини кескин чекловчи янги қонунни қўллашини билдирди.

Сайловда ғалаба қозонган тақдирда Сиси ҳарбий доирадан чиққан навбатдаги президент бўлади. У 50 чи йиллардан бошлаб ҳарбийлардан сиёсатга келган Миср раҳбарлари қаторини тўлдиради.

Ушбу рўйхатда фақатгина Муҳаммад Мурси истисно бўлган эди.

Инсон ҳуқуқларини ҳимоя қилувчиларга кўра, ҳарбийларнинг дастагига эга Миср ҳукуматида мустақил ОАВ ва сиёсий рақибларга нисбатан адоват кучаймоқда.

Мурси тахтдан ағдарилгач, мингдан ошиқ одам ўлдирилди, Мусулмон Биродарларнинг бир неча минг тарафдорлари ҳукумат томонидан ҳибсга олинди ва ушбу ташкилот ноқонуний дея эътироф этилди.