Италиянинг Benetton ширкати поп ва имом, Обама ва Ху Жинтаони нега ўпиштирди?

Ватиканнинг кескин қаршилиги ортидан Италиянинг "Бенеттон" кийим-кечак ширкати Рим Папаси Бенедикт XVI ва мусулмонларнинг нуфузли "Ал-Азҳар" масжиди имоми Аҳмад ал-Тойиб ўпишиб турган рекламасидан воз кечишга мажбур бўлди.

Аён бўлишича, икки дин пешвосини оғиз-бурун ўпиштирган ушбу реклама глобал ташвиқот кампаниясининг бир қисми бўлган.

Рим Папаси ва Миср имомидан ташқари, ширкат ўз рекламаларида дунёнинг етакчи сиёсий раҳбарларини ҳам бир-бирларига бўса ҳадя этдирган.

АҚШ Президенти Барак Обама Хитой Президенти Ху Жинтао, Франция Президенти Николас Саркози Олмония канцлери Ангела Меркел билан ўпишиб турган тасвирлар шулар жумласидандир.

Ақлни шоширувчи рекламалар

Ватикан воизи Федерико Ломабардининг баён қилишича, "Илоҳий Ота аксининг тужжорий мақсадларни кўзлаган рекламаларда суиистеъмол этилиши умуман тоқат қилиб бўлмайдиган ҳолдир".

"Бу - Рим Папасига ўта ҳурматсизлик, ибодатчиларнинг ҳис-туйғуларини таҳқирлаш, рекламаларнинг қутқуга солиш йўли билан эътиборни тортиб, инсонга кўрсатилиши лозим бўлган энг оддий ҳурматни қанчалик оёқ-ости қилишининг яққол мисолидир", дейилади уларнинг баёнотида.

Жаноб Ломабардига кўра, ҳозир Ватикан "Илоҳий Ота тасвирига лозим даражада ҳурмат кўрсатилишини таъминлаш чоралари устида бош қотирмоқда".

Рим Папаси ва "Ал-Азҳар" имоми ўпишиб турган реклама тахтаси шу чоршанба куни тонгда Ватикан яқинида ўрнатилган, аммо сўнгроқ олиб ташланганди.

"Биз папа ва имомнинг бу тариқа акс этдирилган тасвирлари кимнингдир дилини оғритган бўлса, бунинг учун узр сўраймиз", деб Ватикан ўзлари учун кечирим сўрашни ҳам унутмаган.

Аммо "Бенеттон" ширкатининг иддао қилишича, мақсадлари фақатгина "шу йўл билан барча кўринишдаги адоват ҳолларига барҳам бериш бўлган".

Айни ўринда шуни ҳам таъкидлаб ўтиш жоизки, бу - Италия ширкатининг ўз рекламалари билан илк бор кишиларнинг ҳушларини бошларидан учириши эмас.

Бундан олдин "Бенеттон" ўз кийим-кечакларини реклама қилиш учун ғижжиллашиб турган маҳбуслар, руҳонийсини ўпаётган роҳиба ва ОИТС хасталигидан жон бераётган эркак қиёфаларидан ҳам фойдаланган.