Янгиликлар. Ўзбекистон ва Дунё: Яланғоч қилиниб, хўрланган ва гуруҳ бўлиб зўрланган, Қуръонга оёқ қўйилди, Россия қўрқдими ёки қўрқитди? Video Dunyo Islom dini Ayollar Yangiliklar

Дунёда гап...

Алоқадор мавзулар

Кун тартибида аёллар

Ҳиндистоннинг Манипур штатида юз берган ҳодиса сарлавҳаларга чиқди.

Оломон томонидан икки аёлнинг яланғоч қилиниб, одамлар кўз ўнгида таҳқирланиши бутун Ҳиндистонни ларзага келтирди:

Полициянинг маълум қилишича, гуруҳ бўлиб зўрлаш бўйича иш очилган, бир эркак ҳибсга олинган ва қолганлари ҳам тезда қўлга олинади.

Манипур Ҳиндистоннинг сўнгги ойларда қақшатқич этник тўқнашувлар марказида қолган штати бўлади.

Бош вазир Нарендра Моди бутун Ҳиндистонни зил титратган ана шу ҳодиса манзарасида илк бор Манипурни тилга олган.

Моди бу воқеа "Ҳиндистонни уятга қўйгани"ни айтган.

"Айбдорлар жазодан қутилиб қолмасликлари"ни ҳам ваъда қилган.

Бирмага чегарадош Манипурда кўпчилик бўлган Мейтей ва Kуки қабилалари вакиллари тўқнашишган.

Этник тўқнашувлар икки ойдан сал кўпроқ вақт давомида камида 130 кишининг умрига зомин бўлган, 60 минг одам дарбадарликка юз тутган.

Куки бўлган икки аёл эса, Мейтей қабиласига мансуб эркакларнинг ҳужумига учраган.

Полициянинг айтишича, зўравонлик 4 май куни юз берган.

Аммо мудҳиш воқеа акс этган видео шу ҳафта чоршанба куни ижтимоий тармоқларда тармоқларда тарқалиб кетган ва шундан сўнг бутун Ҳиндистонда сарлавҳаларга чиққан.

Федерал ҳукумат барча ижтимоий тармоқ ширкатларидан видеони ўз платформаларидан ўчиришни сўраган.

Хотин-қизларга нисбатан жинсий зўравонликлар Ҳиндистоннинг энг долзарб ва оғриқли муаммоларидан бири бўлади.

Қуръонга оёқ қўйилди, уёғи-чи?

Стокгольмда Қуръоннинг устма-уст таҳқирланиши ортидан Ироқ ва Швеция ўртасидаги танглик янада кучайди.

Ироқ ҳукумати швед элчисидан Бағдодни тарк этишини сўради, ўзининг Швециядаги дипломатик вакилини ҳам чақириб олди, швед компаниялари билан бизнесини ҳам тўхтатди.

Швед полицияси асли ироқлик насронийга Қуръонни ёқишга иккинчи бор рухсат бергани хабари ортидан юзлаб ироқлик Швециянинг пойтахт Бағдоддаги элчихонасига бостириб кирган, унга ўт қўйган.

Ўтган ой Стокгольмдаги Жомеъ масжиди ташқарисида Қуръонга ўт қўйган Салван Момика бу гал уни ёқмаган, аммо Ироқ элчихонаси ёнида Ислом динининг муқаддас китобига оёқ қўйган.

Мусулмонлар Қуръони Каримни Аллоҳнинг каломи сифатида кўришади, унга қасддан етказилган ҳар қандай зиён ва кўрсатилган ҳурматсизликни ўзлари учун ҳақорат сифатида қабул қилишади.

Аммо Швеция суди шахснинг йиғилишлар ҳуқуқи эканини айтиб, полиция томонидан бунга ўхшаш норозилик акцияларига қўйилган тақиқни бекор қилган.

Швеция Ташқи ишлар вазирлиги Бағдоддаги элчихоналарига қилинган босқинни "қаттиқ қоралашлари"ни баён қилди.

Бағдоддаги барча ходимлари соғ-омон эканини ҳам айтди.

Ироқ ҳукумати ҳам бу ишни қаттиқ қоралади, швед элчихонасига ҳужум билан алоқадорликда 20 кишининг ҳибсга олинганини билдирди.

Аммо расмий Бағдод Швеция ҳукуматини Момика яна Қуръонга ўт қўйса, улар билан дипломатик алоқаларини узиши билан огоҳлантирди.

Эрон, Туркия, Қатар ва Саудия Арабистони Қуръоннинг яна бир бор таҳқирланиши, АҚШ, Буюк Британия ва Европа Иттифоқи эса, Бағдоддаги швед элчихонасига босқинни қоралаб чиқишди.

Салван Момиканинг ўтган ойги иши Ўзбекистон Президенти Шавкат Мирзиёевнинг ҳам эътиборидан четда қолмаган.

Шавкат Мирзиёев Қуръони Каримнинг ёқиб юборилишини "ёвуз ҳаракат", деб атаган ва кескин қоралаган.

У бу ҳақда президентликка номзод экан, тошкентлик сайловчилар билан учрашуви чоғида тўхталиб ўтган.

Ўзбекистон президенти турли миллат ва халқларнинг диний қадриятларига нисбатан ҳурматсизлик кўрсатишга мутлақо қарши эканликларини баён қилган.

"Ер юзидаги миллионлаб инсонларнинг дину диёнати, эзгу ҳиссиётларини ҳақорат қиладиган бундай ҳолатларга асло йўл қўйиб бўлмаслиги"ни таъкидлаган.

Ўзбекистон минтақанинг энг йирик мусулмон давлати бўлади.

Воқеаларнинг сўнгги ривожи манзарасида Қуръонни таҳқирлаш ва Муҳаммад (С.А.В) шахсини ҳақорат қилиш халқаро қонунлар билан тақиқланиши ҳамда жазоланиши керак, деган даъватлар ҳам янграган.

Бу каби талаб билан Исломий Ҳамкорлик Ташкилоти чиққан.

Нима бўлди?

Расмий Москва Молдовани огоҳлантирди.

"НАТОга яқинлашиш буткул суверенитетни йўқотишга олиб келиши"ни айтди.

Расмий Кишиневга бундай огоҳлик билан Россия Ташқи ишлар вазирлигининг расмий вакили чиқди.

"Умид қиламизки, Молдова сиёсий бомонди НАТОга яқинлашув нафақат хавфсизликни кучайтирмаслиги, балкида суверенитетни ҳам тўлиқ йўқотишга олиб келишини барибир тушунади", - деб айтди Мария Захарова.

Захарованинг таъкидлашича, Россия "Конституциясида белгиланган "нейтрал" мақомига қарамай, Молдовани ҳам иттифоққа тортиш билан НАТОни кенгайтиришга қаратилган иғвогарона сиёсатнинг давом этаётгани борасида ўзининг мавқеини бир неча бор баён қилган".

"Биз Кишинёв ва Евро-Атлантика тузилмалари ўртасида ўзаро ҳамкорликнинг изчил ривожланиб бораётганини қайд этиб турибмиз. Ҳозир ғарбпараст кучлар қўлида бўлган ҳукумат миллий манфаатлари ва фуқароларининг фикрларига зид сиёсат олиб бормоқда", - дея қўшимча қилган у.

Россия Ташқи ишлар вазирлиги расмий вакиласининг сўзларига кўра, Молдова фуқароларининг 60 фоиздан ортиғи унинг НАТОга киришига қарши.

Аммо Россия томонининг хабарида, шундай деркан, Мария Захарова тилга олган рақамларнинг манбаси очиқланмаган.

Путин эса, НАТОнинг шарққа кенгайишининг олдини олиш, иттифоқни ўз чегараларидан узоқлаштириш ва Ғарб коллективизмини заифлаштириш мақсадида Украинага қўшин киритишгача борган ва уруш, қарийб икки йилдирки, ҳануз тинмаган.

Украинанинг НАТОга кириш истаги эса, ҳалича амалга ошмаган.

Масала НАТОнинг куни-кеча бўлиб ўтган саммити чоғида ҳам кун тартибидаги энг муҳим масалалардан бири бўлган.

Аммо сўнгги саммит ортидан ҳам Украинанинг иттифоққа аниқ қачон аъзо бўлиши муддати ноаён қолган.

Украина президенти буни "абсурд", деб аташгача борган.

Аммо аксарият таҳлилчиларга кўра, Россиянинг худди шу босқини Путин режасининг зиддига ишлаган, уруш боис расмий Киевнинг энг яқин иттифоқчиларига айланган НАТО ва Ғарб шу баҳона Россиянинг чегараларига янада яқинлашган, Украина эса, амалда иттифоққа кириб бўлган.

Кремлнинг империячилик амбицияси фонида Молдова Украина ва Қозоғистон билан бирга Путин ва Россиянинг кейинги нишонидаги учта давлатдан бири сифатида кўрилади.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek