Янгиликлар: Қуръони Карим, муқаддас китоблар ёқилсинми? Turkiya Islom dini Dunyo Yangiliklar

Халқ ўз сўзини айтди. Қуръони Карим яна ёқилди, " ҳужум"га тутилди. Туркия байроғи ҳам бир четда қолмади.

Алоқадор мавзулар

Устма-уст эътироз

Туркия Ташқи ишлар вазирлиги сўнгги икки ҳафтанинг ўзида Даниянинг Анқарадаги элчисини устма-уст икки бор чақирди.

Расмий чорловнинг сўнггиси ўтган жума кунига тўғри келди.

Вазирликка кўра, Дания элчисини Қуръон ва Туркия байроғига уюштирилган "ҳужумлар"ни кескин қоралашларини билдириш, бундан ўз норозиликларини расман изҳор этиш чақирилган.

"Барча огоҳлантиришларимизга қарамай, сўз эркинлиги талқинида қилинаётган бу каби қабиҳ ҳужумларга йўл қўйиб бўлмайди", - дейилган Туркия Ташқи ишлар вазирлигининг бу хусусдаги расмий баёнотида.

Аммо, шундай деркан, вазирлик айнан қандай "ҳужумлар"ни назарда тутаётганига аниқлик киритмаган.

Туркия бундан икки ҳафта бурун ҳам Даниянинг Анқарадаги элчисини ўз ҳузурларига чақиртирган.

Бунга Даниядаги ўта ўнгчи гуруҳнинг Копенгагендаги турк элчихонаси олдида Қуръон нусхаси ва Туркия байроғига ўт қўйиши сабаб бўлганди.

"Биз, шубҳасиз, Европада сўнгги пайтларда хавотирли даражада кучайган Исломофобия ва ксенофобиянинг яққол мисоли бўлган бу қабиҳ ҳужум ҳамда шунга ўхшаш нафрат заминидаги жиноятларга қарши икки ва кўп томонлама платформаларда ўз саъй-ҳаракатларимизни давом эттирамиз", - деб айтган вазирлик.

Сўнгги ойларда Европанинг қатор давлатларида Туркиянинг элчихонаси олдида бу каби амалларнинг сони ортган.

Шу йил январь ойида Туркия Ташқи ишлар вазирлиги Норвегия элчисини ўз ҳузурига чақириб, пойтахт Ослода Қуръоннинг ёқилишини тўхтатиб қолган.

Бундан аввал эса, Қуръон нусхасига намойишкорона ўт қўйилган намойиш Данияда бўлиб ўтган.

Президент муносабати

Стокгольмдаги Туркия элчихонаси яқинида Қуръоннинг ёқилишига эса, президент Режеп Таййип Эрдоғаннинг шахсан ўзи муносабат билдирган.

Даниялик ўнг қанот сиёсатчи Расмус Палудан Қуръон нусхасини ёқиш баробарида Ислом ва президент Эрдоғаннинг ўзига ҳам қарши чиққанди.

Туркия президенти Швециянинг НАТОга киришига савол остида қолдирган, бу ҳодисадан кейин расмий Стокгольм иттифоққа киришда ўзларининг қўлловларига орқа қилмаса ҳам бўлаверишини айтган.

Туркиянинг ўзида эса, юзлаб намойишчи Қуръон нусхасининг ёқилишига жавобан Истанбулдаги консуллиги ташқарисида Швеция давлат байроғига ўт қўйишган.

Туркия Ташқи ишлар вазири бу воқеалар ортидан расман ўз норозиликларини изҳор этиш учун Швецияники ортидан Дания элчисини ҳам ўз ҳузурига чақиртирганди.

Туркия эса, дунёнинг НАТОга аъзо ягона мусулмон давлати бўлади.

У аъзо давлат ўлароқ Швециянинг НАТОга киришига вето қўйиш ҳуқуқига эга ва тегишли ҳужжутларни ҳали-ҳануз ратификация қилмаган.

Швеция билан бир вақтда НАТОга кириш учун ариза топширган Финландия эса, яқинда иттифоққа қабул қилинган.

Бу Европа давлатлари ҳукуматлари эса, бу каби амалларни "на-да қўллашлари ва на-да уларда иштирок этишлари"ни айтишаркан, "сўз эркинлиги ўз мамлакатларида конституцион ҳуқуқ эканлиги"ни таъкидлашган.

Халқ фикри

Воқеаларнинг бу каби ривожи манзарасида Швецияда ўтказилган оммавий сўров эса, аҳолисининг кўпчилиги Қуръон ва бошқа муқаддас китобларни ёқиш тақиқланишини хоҳлашларини кўрсатган.

Бу ҳақда Туркиянинг қатор етакчи нашрлари ҳам хабар беришган.

Худди шу хабарлардан маълум бўлишича, бу каби истакда бўлган швецияликларнинг сони 51 фоизга ортган.

Муқаддас китобларни сўз эркинлиги остида ёқилишига тарафдорлик қилганлар фоизи эса, 34% ни ташкил этган.

Қолганлар эса, бу хусусда бирор бир фикр билдиришни маъқул, деб топмаганликлари айтилган.

Хабарларга кўра, сўров Швециянинг Sifo тадқиқот маркази томонидан шу йилнинг 14-16 март кунлари ўтказилган, унда тасодифий танланган 1370 кишининг фикри ўрганилган.

Сўнгги Қуръон нусхасини ёқиш амалларига ҳам қатор исломий ташкилотлар ва араб давлатлари ўзларининг муносабатларини билдириб чиқишган.

Толибон муваққат ҳукумати жавобгарлар "қаттиқ жазоланиши" кераклигини айтган бўлса, Покистон Толибон ҳаракати айбдорларни "ўлдириш" билан таҳдид қилишгача борган.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002