Дин ва дунё: Қуръони Карим яна ёқилди – Islom dini, dunyo, yangiliklar

Дин ва дунё: Қуръони Карим яна ёқилди - Ислом динининг муқаддас китоби сўнгги икки ҳафта ичида Швецияда кетма-кет икки бор таҳқирланди.

Қуръон нусхасига бундан аввал 28 август куни жанубий Мальмё шаҳрида ўт қўйилган.

Кеча 10 сентябрь куни пойтахт Стокгольмда бу иш яна такрорланган.

Бу гал ҳам Даниянинг "Қаттиққўллар" ирқчи гуруҳи Қуръони Карим нусхасини ёққан.

Туркиянинг "Анадолу" ахборот агентлиги ёзишича, муқаддас китоб Швеция пойтахтининг Ринкебю мавзесида таҳқирланган.

Ринкебю пойтахт Стокгольмнинг мусулмонлар зич яшовчи мавзеъларидан бири бўлади.

Маълум бўлишича, гуруҳ бу ишга яна ўз ихтиёрича қўл урган.

Қуръонни ёқиш учун аввалига полициядан изн сўраган, рад жавобини олган.

Аммо, шунга қарамай, барибир ўз режасини амалга оширган, Қуръонга ўт қўйган.

Ижтимоий тармоқда билдиришича, Исломофоб гуруҳ Ринкебюга маҳаллий вақт билан эрта тонгда келган.

Кейин гуруҳ аъзоси Қуръони Карим нусхасига бензин сепган ва ёққан.

Бирор киши муносабат билдиришидан аввал сатҳни тезликда тарк этишган.

Мальмёдагиси эса, тўқнашувларга айланиб кетган.

Расмус Палуда тарафдорларининг Қуръони Каримни ёқиш амалига қарши юзлаб одам кўчага чиққан, улар полиция билан тўқнашишган.

Зўравонликлар бир неча соат давом этган, намойишчилар машиналарга ўт қўйишган, дўконларнинг ташқи ойналарини синдиришган.

Полиция кучлари ўша куннинг ўзида вазиятни назорат остига олишга муваффақ бўлган.

Расмус Палуданинг ўзи Қуръон нусхасини ёқиш жараёнида ҳозир бўлмаган.

Швед полицияси уни ўша куни мамлакатга киритмаган, чегарадан ортга қайтарган.

Унинг Швецияга киришини икки йилга тақиқлаган.

Аммо Палуданинг тарафдорлари кўзлаган ишларидан ортга қайтишмаган, Қуръон нусхасини барибир ёқишганди.

Расмус Палуда шу йил бошида Даниянинг ўзида бир ойга қамалиб ҳам чиққан. У ирқчилик дохил қатор айбловларда айбланган.

Бунга ўта ўнг қанот ёки миллатчи сиёсатчининг партияси ижтимоий тармоқлардаги акаунтларида жойлаган Исломга қарши видеолари сабаб бўлган.

28 август кунги ҳодиса ортидан, Туркия ва Исломий Ҳамкорлик Ташкилоти Қуръон нусхасининг ёқилишини кескин қоралаб чиққан, буни "провакация"га тенглаштирган.

Туркия Ташқи ишлар вазирлиги "бу - ҳамжиҳатлик, уйғунлик маданияти ва Европа қадриятларига берилган жиддий зарба" эканини айтган.

Исломий Ҳамкорлик Ташкилоти бунинг, "экстремизм ва диний нафрат қўзғатишга қарши глобал миқёсда олиб борилаётган саъй-ҳаракатларга зид" эканини таъкидлаган.

Шунинг баробарида, ташкилот Швециядаги мусулмон жамоасини "зўравонликлардан тийилиш ва оғир-босиқлик"ка чақириб қолганди.

Исломий ҳамкорлик ташкилоти дунё бўйлаб исломофобия ҳолларини кузатиш ваколатига эга ташкилот саналади.

Мальмёдаги ҳодисадан кун ўтиб, Норвегиядан ҳам худди шунга ўхшаш хабар олинган.

Пойтахт Ослода аксилисломий руҳдаги намойишчи Қуръон саҳифаларини йиртиб, уни таҳқирлаган.

Исломга қарши намойиш Норвегияда ҳам тўқнашувларга айланиб кетган.

У "Норвегиянинг исломийлашувига чек қўйинг" гуруҳи томонидан уюштирилганди.

Қуръонни ёқиш тарафдорлари бундан аввал ўз амалларини "зўравонликни тарғиб этадиган Исломга қарши норозилик ифодаси" сифатида изоҳлашган.

"Исломнинг радикал унсурларига улар ҳаётларини назорат қилмасликларини кўрсатмоқчи" эканликларини иддао қилишган.

Худди шу манзарада агар муқаддас Қуръонга дахл қилинса, бу амал Ислом дунёси ва Ғарб ўртасидаги адоватни янада кучайтириб юбориши эҳтимолига оид жиддий хавотирлар ҳам йўқ эмас.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek