Янгиликлар: Ослода Қуръонни ёқиш режаси чиппакка чиқди – Туркия мушакларини барибир кўрсатиб қўйдими? Янги тафсилотлар Video Turkiya Islom dini Dunyo Yangiliklar

Норвегия нимадан қўрқди? Норвегия полицияси бугун, жума кунига режаланган Исломга қарши намойишни тақиқлади.

Алоқадор мавзулар

Намойишнинг пойтахт Ослодаги Туркия элчихонаси қаршисида ўтказилиши кўзда тутилган.

Унда ҳам худди Швецияда бўлгани каби мусулмонларнинг муқаддас китоби - Қуръони Каримнинг ёқилиши айтилганди.

Худди шунга ўхшаш намойиш Данияда ҳам бўлиб ўтганди.

Хабарларга кўра, кеча, пайшанба куни Туркия Ташқи ишлар вазирлиги Норвегия элчисини чақирган.

Вазирлик Ослода режаланаётган намойиш юзасидан ўз норозилигини изҳор этган.

Орадан бир неча соат ўтар-ўтмай, Норвегия полицияси режадаги намойишни тақиқлагани хабари олинган.

"Қуръонни ёқиш Норвегияда сиёсий қарашларни ифодалашнинг қонуний йўл бўлиб қолаверади. Лекин намойиш хавфсизлик нуқтаи назаридан ўтказилмайди", - деб айтган Норвегия полицияси.

Улар ўз баёнотларида ўзлари қўлга киритган разведка маълумотларига таянганликларини таъкидлашган.

"Рейтер" ахборот агентлигининг хабар беришича, расмий Анқара пайшанба куни эрталаб аксилисломий гуруҳнинг "иғвогарона" режасини кескин қоралаган.

Туркия Ташқи ишлар вазирлигидаги манба вазирлик намойишни тўхтатишни сўраганини айтган.

Норвегия Ташқи ишлар вазирлигининг маълум қилишича, Туркия томони ўз элчилари билан учрашув чоғида режадаги намойиш масаласини кўтарган.

"Элчимиз сўз эркинлиги Норвегияда конституцион ҳуқуқ эканига тўхталиб, Норвегия ҳукумати бу намойишни на-да қўллаши ва на-да унда иштирок этишини ҳам қўшимча қилган", - деб билдирган вазирлик воизи.

Полиция эса, жамоат хавфсизлигига хавф бўлган тақдирдагина, намойишларни тақиқлаши мумкин.

Янгиликлар: Эрдоған ўз сўзини айтди, Қуръоннинг ёқилиши энди Швецияга қимматга тушадими?

Стокгольмдаги Туркия элчихонаси яқинида Қуръоннинг ёқилишига президент Режеп Таййип Эрдоғаннинг шахсан ўзи эътибор қаратди. Бунинг оқибати нима бўлишини айтди. Туркия бундан аввал жавобгарларни жазолашга ҳам чақирганди.

Президент Эрдоғаннинг баён қилишича, бу ҳодиса ортидан Швеция энди НАТОга киришда ўзларининг қўлловига орқа қилмаса ҳам бўлади.

"Швеция НАТОга киришда биздан дастак кутмасин. Мамлакатимиз элчихонаси қаршисида бундай шармандаликни қилганлар ўз аризалари борасида бизнинг хайрихоҳлигимизга ортиқ умид қила олмасликлари аниқ", - деди Туркия раҳбари.

Швеция ва Финландия эса, Россиянинг Украинага босқини ортидан, НАТОга кириш учун ариза беришган.

Аммо қондирилиши учун уларнинг аризасини иттифоққа аъзо 30 давлатнинг барчаси бирдек маъқуллаши лозим.

Туркия эса, дунёнинг НАТОга аъзо ягона мусулмон давлати бўлади.

У аъзо давлат сифатида икковлоннинг НАТОга киришига вето қўйиш ҳуқуқига эга ва тегишли ҳужжатларни ҳали-ҳануз ратификация ҳам қилмаган.

Даниялик ўнг қанот сиёсатчи Расмус Палудан шу шанба куни Қуръони Карим нусхасини ёққан, Ислом ва президент Эрдоғанга ҳам қарши чиққанди.

Хабарларга кўра, Туркия Ташқи ишлар вазири юз берган мазкур воқеълик юзасидан расман ўз норозилигини изҳор этиш учун Швецияники ортидан Дания элчисини ҳам ўз ҳузурига чақирган.

Қатор исломий ташкилотлар ва араб давлатларидан кейин Қуръоннинг ёқилишига Покистон Толибон ҳаракати ҳам ўзининг муносабатини билдириб чиққан.

Олинаётган хабарларга кўра, ҳаракат Қуръонга ўт қўйилишини қоралаган, бунга жавобан аниқ чоралар кўришга чақирган ва айбдорларни "ўлдириш" билан таҳдид қилган.

Якшанба куни бу ҳодисага Афғонистондан Толибон муваққат ҳукумати ҳам расман ўз муносабатини билдирган.

Афғонистон муваққат ташқи ишлар вазирлиги буни "қаттиқ" қоралаган.

Вазирлик ўзининг баёнотида бу ишга жавобгарлар ҳам "қаттиқ жазоланиши" кераклигини айтган.

Швециядан эса, бунга ўхшаш "Ислом динини таҳқирловчи, ваҳшиёна ва гиж-гижловчи амалларнинг олдини олиши"ни сўраган.

Тарихча ўрнида

Расмус Палудан яна Қуръонни ёқди, Ислом ва Эрдоғанга қарши чиқди. Туркия кескин кетди. Рамзан Қодиров ҳам жим турмади

Туркия ва Швеция ўртасидаги алоқалар кескинлашди.

Расмус Палудан яна Қуръонга ўт қўйди, Ислом ва Эрдоғанга қарши чиқди.

Расмий Анқара жавобгарларни жазолашга чақирмоқда. Саудия Арабистони, Ислом дунёси ҳам ўз жавобини узоқ куттирмади...

Расмус Палудан

Расмус Палудан муҳожирликка қарши ўта ўнг қанот мавқеидаги сиёсатчи бўлади.

У Даниянинг ўта ўнг қанот "Hard Line" партиясига етакчилик қилади. Швеция фуқаролигига ҳам эга.

Бундан аввал ҳам қатор намойишлар ўтказган, ўша намойишлар чоғида ҳам Қуръони Каримни ёққан.

Бу гал эса, Расмус Палудан бу ишни Туркиянинг Швециядаги элчихонаси яқинида қилган.

Воқеаларнинг Стокгольмдаги сўнгги ривожи НАТОга кириши учун Швецияга Туркиянинг қўллови ўта зарур бўлган бир пайтга тўғри келган.

Қуръоннинг ёқилиши

Ҳодиса шанба куни юз берган. Худди шу куни Стокгольм Туркия ва Швециянинг НАТОга киришига қарши намойишларга ҳам саҳна бўлган.

"Муқаддас китобимизга қилинган қабиҳ ҳужумни кескин қоралаймиз... Мусулмонларни нишонга олиб, муқаддас қадриятларимизни ҳақорат қилувчи Исломга қарши бу амалга сўз эркинлиги ниқоби остида йўл қўйилиши мутлақо қабул қилиб бўлмас ҳолатдир", - дея баён қилган Туркия Ташқи ишлар вазирлиги.

Туркия дунёнинг барча давлатларини Исломофобияга қарши аниқ қадамлар ташлашга чақирган.

Турк элчихонаси ташқарисида Туркияни қўллаб, намойиш ҳам ўтказилган.

Намойишларнинг ҳеч бири ноқонуний бўлмаган, ҳар уччови ҳам полициянинг рухсати билан уюштирилган.

Туркиянинг ўзида эса, икки юзга яқин намойишчи Қуръон нусхасининг ёқилишига жавобан Истанбулдаги консуллиги ташқарисида Швеция давлат байроғига ўт қўйишган.

Расмий муносабат

Швеция Ташқи ишлар вазири Исломофоб провокациялар даҳшатли эканини айтган.

Тобиас Биллстром, "Швецияда кенг қамровли сўз эркинлиги мавжуд экани, аммо бу Швеция ҳукумати ёки ўзининг билдирилган фикрларни қўллаб-қувватлашини англатмаслиги"ни таъкидлаган, твит қилган.

Reuters ахборот агентлигининг Палудандан изоҳ сўраб ёзган электрон мактуби ҳозирча бежавоб қолган.

Полициядан олган рухсатномасида эса, унинг намойиши Исломга ва гўёки Туркия президентининг Швециядаги сўз эркинлигига таъсир ўтказиш уринишига қарши экани айтилган.

Акс-садолар

Юз берган воқеълик Ислом дунёсида ҳам жиддий акс-садо берган.

Исломий Ҳамкорлик Ташкилоти, Кўрфаз араб давлатлари ҳамкорлик кенгаши, Саудия Арабистони, Бирлашган Араб Амирликлари, Қувайт, Иордания ва яна қатор бошқа араб мамлакатлари томонидан қораланган.

Қуръони Қарим нусхасига ўт қўйилишига Чеченистон президенти Рамзан Қодиров ҳам ўзининг Telegram каналида муносабат билдириб чиққан.

"Саудия Арабистони мулоқот, тоқатлилик ва бағрикенглик қадриятларини ёйишга чақиради, нафрат ва экстремизмни қабул қилмайди", - дейилади, жумладан, Саудия Арабистони Ташқи ишлар вазирлигининг баёнотида.

НАТОга аъзолик масаласи

Швеция ва Финландия ўтган йил, Россиянинг Украинага босқини ортидан НАТОга кириши учун ариза беришган.

Аммо уларнинг аризалари қондирилиши учун иттифоққа аъзо барча 30 давлатнинг бирдек розилиги тақозо этилади.

НАТОнинг ягона мусулмон аъзоси бўлган Туркия эса, Швеция бундан аввал ўз таъбирларидаги аксарияти курд жангариларидан иборат террорчилар ва ўзи 2016 йилги давлат тўнтаришига уринишда айбловчи гуруҳга қарши мавқеини аниқ белгилаб олсин, демоқда.

Расмий Анқара шанба куни эрталаб намойишларнинг олди олинмагани боис, Швеция Мудофаа вазирининг Туркияга режалаган ташрифини бекор қилганини маълум қилди.

Туркия Ташқи ишлар вазирлиги эса, ҳали жума куниёқ режадаги намойишлар юзасидан швед элчисига ўз норозилигини билдирган.

Финландия ва Швеция 2022 йилда Туркия билан уч томонлама махсус битим имзолашган.

Мазкур келишув икковлоннинг НАТОга аъзо бўлишида Анқаранинг эътирозларини бартараф этишга қаратилган.

Швеция ушбу меморандумнинг ўзига юкланган қисмини бажарганлигини айтади.

Бироқ Туркия бунга қаноат қилмаётир ва ўзи террорчи, деб кўрувчи 130 кишининг ҳам экстрадициясини талаб қилаётир.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek