Россия, Путин: Ҳокимиятнинг 20 йили 20 суратда

Владимир Путиннинг ҳокимиятга келганига 20 йил тўлмоқда.

1999 йил 31 декабрда собиқ КГБ жосуси биринчи марта Россия президентига айланганида Оқ Уйда Билл Клинтон ўтирганди.

Шундан буён ўтган 20 йил мобайнида АҚШда президент уч марта, Британияда эса бош вазир беш марта ўзгарди.

Мирзиёев 'Путиннинг одами'ми?

Қозоғистон-Россия: Путин Назарбоевдан ўрнак оладими?

Глобал зиддиятлар ва ички можаролардан тортиб, спорт воқеаларию пропаганда суратларигача - Путиннинг ҳокимиятдаги 20 йилига назар ташлаймиз.

Россия 1999 йил октбярида иккинчи чечен урушини бошлаган пайт собиқ КГБ зобити бош вазир лавозимини эгаллаб турган эди.

Москва чеченларни бир неча турар-жой биноларини портлатишда айблаган.

Путин президентлигининг бошланишига Россиянинг жанубий республикасидаги уруш катта таъсир кўрсатган.

Россия кучлари Чеченистон пойтахти Грознийни қамал қилган. 2003 йилда БМТ Грознийни Ер юзида уруш натижасида энг кўп вайрон қилинган шаҳар деб атаган.

Йиллар давомида Россия жангариларнинг қақшатқич ҳужумларига саҳна бўлган. 2004 йилда Бесландаги мактабга уюштирилган ҳужумда аксари ёш болалар 330 киши ҳалок бўлган эди.

Президент Путин 2009 йилгача Чеченистондаги ҳарбий амалиётларни расман тугатмаганди.

Путин 2000 йил мартидаги сайловлардан сўнг расман президент лавозимини эгаллади.

Орадан бир неча ой ўтиб, "Курск" сувости кемасида портлаш юз берди.

Бутун экипаж аъзолари - 118 киши ҳалок бўлди.

2000 йил августида "Курск" кемаси чўккан пайт экипаж аъзоларининг оиласини ҳалокатдан хабардор қилишга бир неча кун кетган, Путин аввалига Сочидаги таътилини бекор қилмаганди.

Ўзининг ҳокимиятдаги биринчи ўй йилида Путин, гарчи ғарб раҳбарларининг ташқи сиёсатини танқид қилган бўлса-да, умумиятла, улар билан яхши муносабатда эди.

2006 йилда Россия илк бор ривожланган саккизлик - G8 саммитига мезбонлик қилди.

Россия конституциясига мувофиқ, Путин учинчи марта кетма-кет президентликка сайлана олмасди, шунинг учун 2008 йилда у тўрт йилга бош вазир лавозимини эгаллади.

Президент Дмитрий Медведев Путиннинг одами экани ва хўжайинининг ўрнини вақтинча эгаллаганига камчилик шубҳа қилган.

2008 йилда Грузия бўлгинчи Жанубий Осетия минтақасига қўшинлар юборган пайт Россия Грузияни ишғол қилади.

Ўша йил августидаги қисқа уруш ғарб учун бир сигнал эди, аммо Путиннинг ғарб раҳбарлари билан муносабатларини заҳарлаган нарса Россиянинг 2014 йилда Украина шарқига мудохаласи бўлди.

Россиянинг Қримни Украинадан аннексия қилиши Европа Иттифоқи ва АҚШнинг жазо чораларига сабаб бўлди. Россиянинг G8 га аъзолиги тўхтатилди.

Путиннинг Башир Ассадни қўллаш учун Сурияга Россия учоқлари ва ҳарбий техникасини юбориш қарори минтақадаги кучлар нисбатини ўзгартирган.

2016 йилда Дональд Трампнинг ғалабасидан сўнг АҚШ жосуслик хизматлари Россия сайлов кампаниясига аралашган, деган хулосага келган.

2018 йилда Британия Россияни Селисбури шаҳрида собиқ рус ҳарбий жосуси Сергей Скрипални заҳарлашда айблади.

Путин ҳамма вақт ўзи ва Россиянинг имиджини назорат қилган. Кремл эълон қилган суратларда у кучли шахс сифатида намоён бўлади.

Путин 2014 йилда Қишки Олимпиада ўйинлари, 2018 да эса, футбол бўйича Жаҳон чемпионатига мезбонлик қилган.

Сочи ўйинлари муваффақиятли ўтган, аммо допинг можаролари ҳали олдинда эди.

Жаҳон Допингга қарши кураш агентлиги ўтган ҳафта Россияни барча йирик спорт мусобақаларидан тўрт йилга четлатди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek