Ўзбек футболида келишилган ўйинларга барҳам бериладими?
Ўзбекистон футбол федерацияси келишилган ўйинларга қарши “аёвсиз кураш” эълон қилган. Проффессионал футбол лигаси қошида тузиладиган ишчи гуруҳ келишилган ўйинлар ва унда иштирок этганликда гумон қилинганларни мониторинг қилиб боради.
Футбол журналистлари келишилган ўйинларга очилган курашни истеҳзо билан қабул қилишди. Улар бу каби гапларга ишонмаслигини билдиришмоқда.
“Ўзбекистон Футбол Федерацияси Ижроия қўмитаси келишилган ўйинларга қарши аёвсиз курашиш орқали футболда тозалаш ишлари олиб борилиши ҳақида Қарор қабул қилди”, - дея хабар беради Профессионал футбол лигасининг pfl.uz сайти.
Ўзбекистон Футбол Федерацияси президенти Мираброр Усмонов сўнгги вақтларда тотализатордан даромад кўриш мақсадида ЎФФ ва ПФЛ таснифидаги ўйинларнинг натижалари келишилаётганлиги ҳақида матбуотдаги мақолаларга тўхталган.
Усмонов жаноблари келишилган ўйинларга аввалдан курашиб келаётганини билдириб, бундай ишларни фош қилишда давлат органлари билан ишлашга таёрлигини таъкидлаб ўтган.
Футбол соҳасида мустақил журналист Бобомурод Абдулла келишилган ўйинлар муаммоси Ўзбекистонда кенг тарқалганини айтади.
“Биз журналистларнинг ўзаро тахминларига кўра, ўтган йилги чемпионатда жуда кўп ўйинлар аввалдан келишилиб ўйналди. Ҳаттоки, бир жамоанинг бош мураббийси биринчи давранинг ўзидаёқ, "бизнинг ҳомийларимиз пул бермаяпти, иккинчи даврада биздан яхши ўйин ва ғалабалар кутманглар", деб айтди. Бу нима дегани? Иккинчи даврада биз ютқизишга мажбурмиз, кимга очко керак бўлса, ўшаларга ўйинларни беришга мажбурмиз, деган маъно келиб чиқди”, дейди журналист.
Федерациянинг ушбу қарори ижтимоий тармоқларда ҳам кенг муҳокама қилинмоқда. Кимдир ушбу қарорни қўллашини билдираётган бўлса, яна биров қарорни киноя остига олган.
“Келишилмаган келишилган ўйинларга қарши курашиш ва келишилган ўйинларни тартибга солиш қўмитаси”, - дея ёзади твиттер фойдаланувчиларидан бири.
Келишилган ўйинлар бўйича бир неча мақола ва интервьюлар муаллифи журналист Фарҳод Норбўтаев бундай ўйинларга барҳам бериш учун вақт аллақачон етиб келганини айтаркан, бу иш билан футбол федерацияси шуғулланса бесамар бўлишини таъкидлайди.
“Коммиссига қайси ташкилотнинг аъзосини қабул қилишига боғлиқ. Агар федерациянинг ўзидан комиссия тузилса, мен ҳам ишонмайман. ФИФА келишилган ўйинлар бўйича Интерпол билан ҳамкорлик қилади. Демак, бирор ҳуқуқ-тартибот органи билан ҳамкорлик қилиш керак”.
Шунингдек, Федерация ижроия қўмитаси томонидан келишилган ўйинларда иштирок этган шахснинг футбол олдидаги хизматларидан қатъи назар, футболдан бутун умрга четлатилиши ҳақида ҳам қарор қабул қилинган
Журналист Бобомурод Абдулла, футбол федерациясининг келишилган ўйинларга кураша олишига кўзи етмаслигини билдиради.
“Очиқ очиқ, кундуз куни кўриниб турган ва федерация ишлаб чиққан қоида ва регламентларни бузган жамоага мана шу федерация раҳбарияти ҳеч нарса қилолмаган. “Бу фалончи команда, бу 50 йиллик жамоа” деб жазо чорасини кўрмаган. Бундай федерация ушланиши ва далил исботлаш қийин бўлган нарса билан қандай курашади, мен билмайман”, дейди у.
Ўзбекистон Футбол федерацияси бундан олдин миллий чемпионатда ҳакамларнинг пора олишига қарши кураш эълон қилган эди. Ҳакамларнинг пора олишига ьарҳам бериш мақсадида уларнинг ҳар бир ўйин учун оладиган маошлари кўтарилиб қўйилганди.
Бироқ футбол соҳасидаги журналистлар ушбу кураш самар бермаганини айтишади.
“Ҳакамларнинг сотилишига кураш эълон қилингани билан уларни сотиб олиш тўхтамади-ку. Судьяларнинг ставкаларини ҳам биламиз. 2009-2010 йилларда ҳакамлар 5-6 миллион сўм олиб юрган, энг лидер ҳакамлар 10-15 миллион сўм оларди. Ҳозир ўша сумма кўтарилган, холос”, - дейди Бобомурод Абдулла.
Журналист Бобомурод Абдулла келишилган ўйинларга қарши курашишиш ҳақидаги қарор мухлисларнинг ишончини қозониш учун "шунчаки пиар акция бўлиши мумкин", деб айтади.
“Федерация раҳбарияти кетаман, деб янги даврга қолди. Кетамиз, бошқа раҳбарият келади, деб кетмади. Ўша кетмаганлигини мухлисларнинг олдида унуттириш учун айтилган пиар акция бўлиши мумкин”, дейди журналист.
