Ўзбекистон Президенти энди 5 йил муддатга сайланади
Ўзбекистон парламентининг юқори палатаси - Сенат Президентлик муддатини етти йилдан беш йилга камайтирувчи конституциявий ўзгартиришни маъқуллади.
Бу ҳақдаги қарор Парламентнинг Тошкентда очилган қўшма сессиясида қабул қилинган.
Президентлик муддатининг камайтирилиши мамлакатда кечаётган демократик ислоҳотларнинг бир қисми экани урғуланмоқда.
Аммо бундан тўққиз йил муқаддам президентлик муддати беш йилдан етти йилга узайтирилган пайт ҳам худди шундай сабаб келтирилган эди.
Ўзбекистонда навбатдаги президентлик сайловлари 2014 йилда бўлиб ўтиши керак. Мамлакатни 22 йилдан бошқараётган Президент Каримов номзодини илгари суриш-сурмаслик ниятини ошкор этмаган.
Президентлик муддатини яна бир бор ўзгартиришдан мақсад нима бўлиши мумкин?
Ўзбекистонлик собиқ дипломат ва сиёсатшунос Тошпўлат Йўлдошевнинг Би-би-си билан суҳбатда айтишича, бу қадам Ўзбекистон ичидаги сиёсий ўйинларнинг бир кўриниши бўлиши мумкин.
Шарҳловчига кўра, жаноб Каримов ўз тажрибасидан келиб чиқиб Президентнинг қудратда узоқ муддат қолиши мамлакатда турғунликка олиб келишини англаб етган бўлиши мумкин.
Бу ўринда жаҳоннинг бошқа мамлакатларида кенг қўлланадиган тажриба, яъни Президентлик муддатининг 4-5 йил атрофида эканлиги назарда тутилаётган бўлиши мумкин, дейди Тошпўлат Йўлдошев.
Шарҳловчига кўра, бу галги конституциавий ўзгартиришлар жорий президентлик муддати Ислом Каримовнинг охирги муддати эканлиги нишонаси эмас. Чунки бу каби ўзгартиришлар ҳуқуқи Ўзбекистон Парламентига юкланган, лекин Ўзбекистонда Парлмаент мустақил эмас ва Президент нима айтса, шуни ҳамиша бажариб келган.
Унинг фикрича, бу янги ўзгартириш бўйича жорий Президентни яна бир муддатга сайланиш ҳуқуқи бор, дея даъво қилиниши ҳам мумкин.
