Ўзбекистон: “Сардоба” Қозоғистон кузатувида қайта тўлдирилади ва “Қўйлиқ” нега кўчирилмоқда? – Янгиликлар, O'zbekiston, yangilik
Сурат манбаси, Toshkent shahar hokimligi
- "Қўйлиқ" бозори кўчирилади;
- "Сардоба" қандай тўлдирилиши маълум қилинди;
- Бош прокуратура фуқароларга мурожаат билан чиқди;
- Америка Ўзбекистонга 300 минг доза вакцина ҳадя қилди;
- Ўзбекистонда янги телеканал иш бошлади;
"Қўйлиқ" кўчирилади
Пойтахт Тошкентдаги машҳур "Қўйлиқ" деҳқон бозори бошқа манзилга кўчирилади.
Тошкент шаҳар ҳокимлиги, шу билан бирга, бозорга туташ бўлган улгуржи савдо майдони ҳам кўчирилишини маълум қилган.
Мазкур қарорнинг сабаби пойтахтдаги йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш билан изоҳланмоқда.
Шаҳар ҳокимлиги бозор жойлашган манзилда йўл кенгайиши ва кўприк қурилиши ишлари режалаштирилганини қўшимча қилган.
Расмий хабарда "Қўйлиқ" қаерга кўчирилишига ойдинлик киритилмаган.
Ҳокимлик бу ҳақда тез кунда қўшимча маълумот берилишини билдирган.
Алоқадор мавзулар:
"Сардоба" қандай тўлдирилади?
Сурат манбаси, Prezident matbuot xizmati
"Сардоба" сув омбори Қозоғистон билан ўзаро келишув асосида қайта тўлдирилади, қўшни давлат жараённи онлайн кузатиб боради.
Бу ҳақда Kun.uz нашри сув хўжалиги вазири Шавкат Ҳамроев билан суҳбатдан олинган маълумотларга таяниб ёзмоқда.
Вазирнинг сўзларига кўра, сув сиғими 1 миллиард метр куб бўлган омборда, айни вақтда, 350 миллион метр куб сув сақланмоқда.
Сув омборини 600 миллион метр кубга қадар қайта тўлдириш режалаштирилмоқда.
"Бу режа қўшни давлат сув захираларига зарар етказмаган ҳолда амалга оширилади. Жараённи Қозоғистон томони онлайн кузатиб боради, чунки сув танқислиги муаммоси Қозоғистонни ҳам четлаб ўтмаган", дея вазир сўзларини келтирган нашр.
Ўтган йилнинг 1 май куни юз берган "Сардоба" фожиаси ортидан нафақат Ўзбекистондаги аҳоли манзилгоҳлари, балки Қозоғистоннинг чегарадаги қишлоқларига талафот етган эди.
Коррупцияга қарши муросасиз кураш
Сурат манбаси, Xabar.uz
Бош прокуратурада бошқарма бошлиғи ўринбосари лавозимида ишлаб келаётган шахс $29 минг миқдорида пора олаётган пайт қўлга олинган.
Бош прокуратуранинг хабар беришича, ходим 5 декабрь куни қурилиш компанияларидан бирининг раҳбаридан "гўёки тендерда ютишига ёрдам қилгани" эвазига пора олаётган вақт ушланган.
"Аниқланишича, А.Т. Олмалиқ ихтисослаштирилган прокурори лавозимида ишлаган пайтида, 2020 йил октябрь ойларида ўзига таниш бўлган қурилиш корхонаси раҳбари Д.А.ни Олмалиқ шаҳридаги 11-сонли ётоқхонани реконструкция қилиш бўйича қонуний ўтказилган тендерда қурилиш корхонаси гўёки унинг ёрдами билан ғолиб чиққанлигига ишонтирган ва моддий рағбат талаб қилиб келган", дейилади расмий хабарда.
Ушбу ҳолат ортидан Бош прокуратура жамоатчиликка мурожаат билан чиққан.
Мурожаатда прокуратура органларида коррупцияга қарши "муросасиз ва кескин кураш" олиб борилаётгани таъкидланиб, фуқаролар тизимдаги коррупцияни "таг-томири билан бартараф этишда фаол ҳамкорлик"ка чақирилади.
Бош прокуратура фуқаролардан прокуратура органлари ходимларининг коррупция билан боғлиқ хатти-ҳаракати ёки ҳаракатсизлиги кузатилган вақтда зудлик билан ишонч телефонларига қўнғироқ қилишни сўраган.
"Америка халқи сахийлиги"
Сурат манбаси, AQSh elchixonasi
АҚШ Ўзбекистонга 301 минг доза Pfizer вакцинасини етказиб берган.
Мамлакатнинг Ўзбекистондаги элчихонаси ушбу жўнатма "Америка халқининг сахийлиги шарофати билан" амалга оширилганини маълум қилган.
Ушбу ҳадя АҚШнинг глобал COVAX дастури доирасида дунё бўйлаб беғараз етказиб берилаётган 1,1 миллиард доза вакцинанинг бир қисми ҳисобланади.
Мазкур жўнатма билан АҚШнинг июль ойидан бери Ўзбекистонга етказиб берган вакциналари 5,3 миллион дозадан ошган.
Шунингдек, Америка элчихонаси АҚШ ҳукуматининг COVID-19 билан курашиш учун Ўзбекистонга кўрсатган моддий кўмаги $16 миллиондан ошганини тилга олган.
Яна бир янги телеканал
Сурат манбаси, Videograb
Ўзбекистонда 6 декабрь соат 9.00 да янги Foreign Languages (Хорижий тиллар) телеканали эфир юзини кўрган.
Телеканал МТРК тизимидаги Оилавий телеканали базасида ташкил этилган.
Ўзбекистон 24 телеканалининг хабар қилишича, янги телеканал аҳоли, айниқса, ёшлар ўртасида хорижий тилларни оммалаштиришни кўзловчи контентларни тақдим этиб боради.
Foreign Languages туну кун кўрсатувларни эфирга узатиб боради.
Эфир вақтининг уч соатдан кам бўлмаган қисми чет тилларини онлайн ўргатишга ажратилади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
