Василий Уткин: “Узр сўрашни лозим деб топмайман”
Сурат манбаси, facebook
Россиялик таниқли футбол шарҳловчисининг жонли мулоқоти мазмунидан маълум бўлишича, ўзбекистонлик номдор ҳакам Равшан Эрматов ҳақидаги ҳақоратомуз твити фақат "оддий бир ишқибозликнинг эҳтироси бўлган, холос".
Василий Уткинга кўра, худди шу боис ҳам, "Равшан Эрматов эшакнинг ўғли", дейилган твитини "ҳақорат сифатида кўрмайди".
Унинг изоҳларидан хулоса қилинса, оддий бир ишқибоз сифатида бу қабила гапларни айтишга ҳақли бўлган.
Уткин буни, "Умрида ҳакамни ҳеч бўлмаса бир марта ҳақорат қилмаган ишқибознинг ўзи йўқ"лиги қабилидаги изоҳи билан оқлашга уринган.
Россиялик шарҳловчи, ўзининг таъбирида, "ўзбек ишқибозларининг қарғишларига юз тутиш ва саволларига жавоб бериш учун" кеча, 22 июнь куни ўзининг "Instagram"даги аккаунтида махсус жонли мулоқот уюштирган.
Ана шу мулоқоти чоғида Уткин шахсан ўзининг эътироф этишича, Аргентина-Хорватия учрашуви ортидан қилган ана шу твити учун икки мингга яқин "жавоб" олган.
21 июнь кунги бу учрашув ўзбекистонлик номдор ҳакам, жаҳон рекордчиси Равшан Эрматов бу йилги жаҳон чемпионатида бошқарган илк ўйини бўлган.
Муросасиз кечган ана шу учрашув чоғида Василий Уткин ўзининг "Twitter"даги аккаунтида "Равшан Эрматовни "эшакнинг ўғли", деган, уни "карточка бериш"га чақирган.
Бу учрашувда шундоқ ҳам берилган сариқ карточкаларнинг сони оз бўлмаган, ҳатто, Аргентина миллий терма жамоаси Бош мураббийси ҳам Эрматов томонидан бу каби жазога юз тутган.
Ўйин бу йил жаҳон чемпионлигига асосий даъвогарлардан бири сифатида кўрилаётган юлдуз Месси Аргентинасининг йирик(0:3) ҳисобдаги мағлубияти билан якунланган.
Нимчорак финалига чиқиш учун муҳим бўлган 3 очко учун курашда икки рақиб миллий терма жамоа аъзолари майдонда озмунча қўполликларга йўл қўйишмаган.
Уткиннинг бу твити ўша заҳотиёқ турли ижтимоий-мулоқот тармоқларида кескин акс-садо берган.
Аксарияти ўзбекистонликлардан иборат катта сондаги интернет фойдаланувчилари #УткинИзвинись, дегувчи хаштаг яратишгача боришган.
Шу соатларда ҳам Уткинга "қарши жавоб" берилган ва ундан узр сўрашини сўровчи бу каби комментларнинг кети узилмаган.
Изоҳ ва иддаолар
Уткин "эфирда экани чоғи ва ёки оммавий-ахборот воситалари учун нимадир ёзган вақтларидагина ўзининг шарҳловчи экани, қолган пайтда шунчаки футбол ишқибозидан фарқи йўқлиги"ни даъво қилган.
Худди шу ўринда "ўзининг турли ижтимоий-мулоқот тармоқларидаги аккаунтлари ҳам қолган оддий одамларникидан фарқ қилмаслиги"ни иддао қилган.
Россиялик шарҳловчи, худди шу боис ҳам, "қолган барча оддий ишқибозлар каби ҳақ-ҳуқуққа эга" эканини баён қилган.
"Шарҳловчилар ҳакамлардан кейин энг кўп сўкиш эшитадиган иккинчи одамлар бўлишлари", "ҳакам бўлишни танларкан", "Равшан Эрматов ҳам буни билгани"ни иддао қилган.
"Аммо ҳакамлардан фарқли тарзда шарҳловчи сифатида ўйинларнинг тақдирига таъсир ўтказишга имконсиз инсонлар бўлишлари, шу боис ҳам, гоҳида бунга ҳақсиз равишда ўзларининг ҳам ҳақоратларга юз тутиб туришлари"ни қўшимча қилган.
Шундай экан, 21 июнь куни қилган твити юзасидан узр сўрашни лозим, деб топмаслиги, бунинг шунчаки кўнгилни бўшатиб олиш бўлганини айтган.
Василий Уткинга кўра, "бу - Равшан Эрматовнинг ёмон ҳакам ёки ёмон одам эканини англатмайди".
"Ҳакам сифатида Равшан Эрматовнинг маҳоратига тан беради".
Уткин ўзининг жонли мулоқоти чоғида узоқ йиллар давомида "омма кўз ўнгидаги одам" бўлиб келишнинг масъулияти ҳақидаги эътирозларга ҳам жавоб бергандек бўлган.
Бунинг юки остида ўзи ҳам аёвсиз танқидларга тутиб турилиши, аммо уларга эътибор бермаслиги, аксинча, ўзи ҳам гоҳида худди шундай қилиб туришини айтган.
Унинг ошкора баён қилишича, оддий ишқибоз сифатида бундан кейин ҳам тилини тийиб туролмаслиги мумкин.
"Равшан Эрматов эшакнинг ўғли", дейилган твит юзасидан билдирилаётган юзлаб норози муносабатлар манзарасида Би-би-си Ўзбек Хизмати кеча жума куни расмий муносабатларини сўраб Ўзбекистон Футбол Ассоциацияси билан боғланган.
Уюшма вакили Диёр Имомхўжаев, "лозим бўлса, Уткинни узр сўратишлари, бунга куч-қудратлари етиши"ни айтиб, жавоб берганди.
Би-би-си Рус Хизмати ўрганишга имконли бўлган сўнгги маълумотларга кўра, ҳақоратомуз "твит"ини қилган пайтда Василий Уткин аллақачон эфирдан четлатилган, Россиянинг "Первый канал"идаги шарҳловчилик фаолиятига якун ясаган бўлган.
Би-би-си манбаларига кўра, бунга "Газпром-медиа" раҳбарияти ундаган, қарорнинг ўзи эса, Кремль орқали ўтган.
Россия мезбонлик қилаётган жаҳон чемпионатининг расмий "овози" бўлиши кутилаётган Уткин "Первый канал"да шарҳлаган энг сўнгги ўйин 15 июнь кунги Португалия-Испания учрашувига тўғри келган.
На-да Василий Уткиннинг ўзи ва на-да "Первый канал" эфирдан четлатилиш ва четлатиш қарори сабабига тўхталишган.
Уткин ортиқ "2018 йилги жаҳон чемпионатининг расмий шарҳловчиси бўлмаслиги"ни айтиш билан чекланган.
"Первый канал" эса, расмий баёнот билан чиққан эса-да, бу қарорнинг замиридан "фитна назарияси қидирмаслик"ни сўраб қолган.
BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek
