Равшан Эрматов ҳакамлик қилган ўйинда Мексика кейинги босқичга чиқди

Бу – ўзбекистонлик номдор ҳакам бу йилги жаҳон чемпионатида бошқарган иккинчи учрашув эди.

Кеча душанба куни “А” гуруҳида саралаш босқич беллашувларининг якуний тур учрашувлари бўлиб ўтган, мезбон Бразилия ва Мексика нимчорак финалида тўп суриш ҳуқуқини қўлга киритишганди.

Дастлабки икки учрашувлари ортидан, бу гуруҳдан кейинги босқичга чиқажак икки миллий терма жамоанинг тақдири номаълум қолаётгани якуний тур беллашувларининг аҳамиятини янада оширганди.

Гуруҳнинг кеча бўлиб ўтган ҳар икки учрашувида йирик ҳисоблар қайд этилган: мезбон Бразилия Камерунни 4:1, Мексика эса, Хорватияни 3:1 ҳисобида мағлуб этганди.

Ўз ўрнида эслатиб ўтиш жоиз, бу – Мексиканинг ўз тарихида кетма-кет еттинчи бор жаҳон чемпионатининг нимчорак финалига чиқиши бўлади.

11 метрлик жарима тўпи даъвоси рад этилганидан қисқа вақт ўтмай, Мексика 72-дақиқада ўйинда ҳисобни биринчи бўлиб очишга муваффақ бўлган ва 3:1 ҳисоби фақат 2-бўлимда киритилган тўплар ҳисобигагина қайд этилганди.

Равшан бундан аввал Эквадор ва Швейцария ўртасидаги “Е” гуруҳининг дастлабки учрашувини бошқарган ва илк ҳамкамлигиданоқ кўпчилик футбол аҳлининг олқишларига сазовар бўлганди.

Осиё қитъаси қолиб, Ғарбнинг етакчи футбол шарҳловчилари ҳам Равшаннинг ўйиннинг тақдирини ҳал қилган энг нозик пайтда берган қарорини “қойилмақом” бўлганини айтиб, унинг ўша учрашувдаги фаолиятига жуда ижобий баҳо беришганди.

Ўз ўрнида эслатиб ўтиш жоиз, бу – ўзбекистонлик таниқли ҳакам бутун собиқ Шўролар Иттифоқини кетма-кет иккинчи бор намоён этаётган жаҳон чемпионати бўлади.

Бу йилги жаҳон чемпионати эса, бошқа бир Осиё қитъаси вакили, япониялик ҳакам Юичи Нишимура бошқарган дастлабки учрашувдан бошлабоқ ҳакамларнинг фаолияти билан боғлиқ жиддий машмашаларга сабаб бўлмоқда.

Хорватия томони мезбон Бразилияга қарши ўйинда япониялик ҳакам йўқ ердан ўз дарвозаларига 11 метрлик жарима тўпи белгилаб, “адолатсизлик” қилганини айтишган, хорват оммавий-ахборот воситалари “уят”, дея бонг уришганди.

Хорватия Бош мураббийси, “Агар, 11 метрлик жарима тўпи шундай бўладиган бўлса, ортиқ футбол ўйнашимизнинг ҳожати йўқ”, - дея қисқа қилиб хулоса қилган бўлса, терма жамоанинг айрим сара ўйинчилари, “"Бразилияни зиддиятли пенальти билан сийлаган бу каби ҳакам жаҳон чемпионатида иштирок этмаслиги керак”лигини айтиб чиқишганди.

Бунинг ортидан, Аргентина миллий терма жамоасининг муддатидан илгари нимчорак финалига чиқишини таъминлаган “F” гуруҳининг 2-тур учрашуви ҳам рақиб Эрон томонининг жиддий эътирозларига сабаб бўлганди.

Эрон миллий терма жамоаси Бош мураббийи Карлуш Кейрош, “ўйиннинг тақдирини ҳал қилган икки шахсдан бири ягона тўп муаллифи Мессидан кейин фақат сербиялик ҳакам бўлгани”ни баён қилганди.

“Бу киши қандай қилиб бугун кечаси ёки умрининг охиригача тинчгина ухлай оларкан? Бутун ҳурматларимни бажо этган ҳолда, мен бу инсон билан юзма-юз гаплашиб олишни жуда истардим. Нима учун у бизни бу куйга солди?”, - деганди яққол ғалаба қозониш имкониятлари бўлган ўйинни бой беришлари ортидан жаноб Кейрош.

Ўз ўрнида таъкидлаб ўтиш жоиз, гуруҳ босқич саралаш беллашувларининг шу пайтга қадар бўлиб ўтган қирққа яқин учрашувлари ортидан Равшан Эрматов тўплаган баллари бўйича(7.8) worldreferee.com веб саҳифаси рўйхатида голландиялик Бьорн Куперс ва туркиялик Жунайд Чақирлар билан бирга юқори ўнликда биринчи ўринни бўлишиб турибди.

Ҳозирча Бразилиядаги жаҳон чемпионатида қилган ҳакамликлари ортидан, интернет нашри таснифида юқори ўнликдан жой олган ҳакамлар орасида Равшандан бошқа Осиё қитъаси вакили йўқ.

Осиёнинг 2012 йилги “Энг зўр ҳаками” Юичи Нишимура эса, ҳозирча очилиш учрашуви билан кифояланмоқда, холос.

Аммо Юичи Нишимура Бразилиядаги жаҳон чемпионатида Равшан билан бирга Осиё қитъасини намоён этаётган тўртта бош ҳакамдан бири бўлади.

Бу икковлондан ташқари Бенжамин Вильямс (Австралия) ва Абдулла Шукралла (Баҳрайн)лар бошчилигидаги ҳакамлар гуруҳи ҳам Бразилиядаги жаҳон кубоги ўйинларини бошқаришмоқда.

Равшан Эрматов 2010 йилги жаҳон чемпионатининг илк учрашувини очиб берган ва бир биринчиликнинг ўзида ярим финали дохил беш беллашувга ҳакамлик қилиш билан номи халқаро рекордчилар рўйхатига ҳам кирган.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02