Амнести Интернэшнл: Тожикистон фуқароларини таъқиб қилишни тўхтатсин!
Сурат манбаси, mehr
Тожикистон полицияси мамлакатда бошланган янги "ахлоқий кампания" доирасида фоҳишабозлик ва бачабозлик билан шуғулланиб келганликда гумон қилинган юзлаб фуқароларни ушлаган.
Душанбеда ярим тунда ўтказилган рейд натижасида жинсий тижоратга алоқадорлик билан ушланганлар орасида хомиладор аёллар ҳам борлиги айтилган.
Гувоҳларга кўра, улар калтакланган, сўнгра полиция машинасига солиб кетилган.
Халқаро Амнистия ташкилоти ушбу ҳодиса юзасидан баёнот чиқариб, Тожикистон ҳукуматини "ахлоқий жиноят"ларда айбланган шахсларга нисбатан таъқиб ва босимларни тўхтатишга чақирган.
"Бу жамоатчилик ахлоқини таъминлаш деб айтилган бўлсада, аслида инсонларни камситиш ва уларга ҳақоратли қўпол муносабат ҳисобланади", дейди Amnesty Internationalнинг Оврўпо ва Марказий Осиё бўйича лойиҳалари директор ўринбосари Денис Кривошеев.
Халқаро ташкилот баёнотида айтилишича, ушланганларга нисбатан таҳдид, калтаклаш ва мажбурий даволаш масканларига жўнатиш каби усуллардан милиция ходимлари кенг кўламда фойдаланишлари ва уни суистеъмол қилиш ҳоллари мавжуд.
10 июнда ўтган охирги рейдда яна 70 га яқин киши ушланган. Уларнинг кўпи ҳеч бир айблов эълон қилинмасдан 36 соатдан кейин қўйворилган. Бироқ яна 30 кишининг тақдири номаълум, дейилади Амнести Интернэшнл баёнотида.
Зобитлар қўлга олинганларни турли тиббий ташҳислар топширишга мажбур қилганлар. Баъзиларининг айтишича, милиция ходимлари томонидан уларга жинсий ҳақорат ҳолатлари содир этилган. Лекин воқеанинг тафсилотлари келтирилмаган.
Халқаро Амнистия Тожикистонда жинсий жиноятларда айбланиб ушланганларга озодлик эвазига жинсий хизмат кўрсатиш талаби ҳам қўйилгани ҳақида маълумотлар борлигини айтади. Шунингдек, полицияга етказилган фуқаролардан бармоқ излари олинган, суратга туширилган, сўнгра қўйиб юборилган.
"Полиция одамларни ҳеч қандай ордер ва ҳимоячисиз ҳибсда ушлаб туриши мумкин эмас", дейди Денис Кривошеев.
Ҳукумат одамларни ҳибсга олар экан, уларнинг нафсониятига тегмаслик лозим, ҳуқуқлари ҳимояси таъминланиши керак, дейилади халқаро Амнести Интернэшнл ташкилоти чиқарган ҳужжатда.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002
