'Туркман газини Оврўпога етказиш учун ҳамма шароитлар мавжуд'
Туркманистон телевидениеси орқали чиқишида президент Гурбангули Бердимуҳаммадов Оврўпога туркман газини етказиш йўналишида мамлакат фаол ишлашга тайёр эканлиги ва бунинг учун ҳамма шароитлар мавжудлиги ҳақида айтди.
Туркман Президентига кўра, Туркманистондан Оврўпога табиий газни етказишнинг бир неча йўли бор.
"Бу йўллардан молиявий, тижорий ва инфраструктура назаридан энг мақсадга мувофиғи Каспий денгизи тубидан ўтувчи қувур йўлидир. Лекин шу билан бирга денгиз оша зичланган газни ташиш эҳтимолини ҳам кўриб чиқишимиз мумкин",- деди Туркманистон Президенти.
Газ ва нафт масалалари бўйича таҳлилчи Жон Робертсга кўра, Туркманистон Президентининг бу баёноти Оврўпо бозорларига туркман газини олиб чиқиш лойиҳасининг аниқ қирраларини омма ўнгида ошкорона тилга олганлиги билан муҳимдир.
Лекин айни вақтда жаноб Бердимуҳҳамадов аниқ режалар борми- йўқлиги ҳақидаги тафсилотларини бермади, дейди таҳлилчи.
"Аммо кўринишича Оврўпо ва Туркманистон туркман гази савдоси бўйича кенг камровли умумий бир тўхтамга келаётган кўринадилар", дея урғулади таҳлилчи.
"Туркманистон газни Оврўпога етказиш учун ҳамма шароитларга эга деган нуқтага келсак, газ миқдори нуқтаи назаридан бу ҳақиқатга яқин, лекин Туркманистоннинг аниқ бир лойиҳани ўртага олиб чиқа олиш учун маъмурий қобилияти етарли даража деб айтмаган бўлардим", - деди Жон Робертс.
2010 йил 18 ноябр куни Бакудаги саммитда Каспий денгизи туби орқали ўтувчи қувур йўли ушбу йўл ҳудудларидан ўтувчи мамлакатларнинг розилиги билан амалга оширилиши мумкинлиги ҳақида келишиб олинганди.
Таҳлилчи Жон Робертснинг айтишича, баъзи хабар агентликлари бераётган Туркманистон Каспий оша суюлтирилган газни ташиш эҳтимолини кўриб чиқаётгани ҳақидаги хабарлар ҳақиқатга яқин эмас, чунки гап суюлтирилган эмас, зичланган газ ҳақида кетмоқда.
Газни суюлтириш ва манзилга етказилгандан сўнг қайта газ ҳолатига келтириш миллионлаб доллар маблағни талаб қилувчи жараёндир, ва фақатгина ўта узоқ масофларга ташиш керак бўлганда ўзини оқлайди.
"Каспий узра атиги 500 кмча масофга газни ташиб ўтиш учун ва Озарбайжон ҳудудига етиб борганида яна қайта газ ҳолатига қайтарилиб, қувур орқали ташиб кетиш учун миллионлаб долларлик газни суюлтирувчи корхонларни қуриш иқтисодий жиҳатдан ўзини оқламайди, шунинг учун гап фақат суюлтирилган эмас зичланган газ ҳақида кетмоқда" , дея изоҳ берди Жон Робертс.
