عراق: سمارا میں کاربم حملہ 16 ہلاک
عراق میں حکام کا کہنا ہے کہ عراقی شہر سمارا میں ایک کار بم حملے کے نتیجے میں سولہ افراد ہلاک ہو گئے ہیں۔
شہر کی معروف مریادی سبزی منڈی میں ہونے والے حملے کے نتیجے میں چھبیس افراد زخمی ہو گئے۔
دھماکہ اس وقت ہوا جب لوگ سبزیوں اور پھلوں کی خریداری میں مصروف تھے۔
عراق میں ان دنوں فرقہ وارانہ تشدد کے واقعات میں اضافہ دیکھا گیا ہے اور بدھ کو بغداد کے شیعہ اکثریتی علاقوں میں سلسلہ وار بم دھماکوں میں اسی سے زیادہ افراد ہلاک ہو گئے تھے۔
سمارا میں کار بم دھماکہ ایسے وقت میں ہوا جب دکاندار بچ جانے والی سبزیوں اور پھلوں کو رعایتی نرخوں پر فروخت کرتے ہیں۔
حکام کے مطابق ہلاک ہونے والوں میں تین خواتین اور دو بچے بھی شامل تھے۔
یہ سبزی منڈی سمارا شہر کے مشرقی علاقے میں جعبریہ کے ضلعے میں واقع ہے۔
End of سب سے زیادہ پڑھی جانے والی
خبر رساں ادارے اے پی کے مطابق ایک اور کار بم دھماکہ جمعرات کو بغداد کے مضافات میں واقع ابو غریب کے علاقے میں ہوا جس کے نتیجے میں پانچ افراد ہلاک ہو گئے۔
عراق میں تشدد کے واقعات میں اضافہ سنی شدت پسندوں کی جانب سے کارروائیوں کے نتیجے میں دیکپنے میں آیا ہے جو اس سے پہلے پانچ سال میں نہیں دیکھا گیا۔
رائٹرز نے اقوام متحدہ کے اعدادوشمار کے حوالے سے بتایا ہے کہ اس سال صرف جولائی کے مہینے میں ایک ہزار سے زیادہ افراد مختلف تشدد کے واقعات میں ہلاک ہوئے جو کہ 2008 کہ بعد سے کسی بھی مہینے میں ہلاکتوں کی سب سے زیادہ تعداد ہے۔
