تندولکر نے تیرہ چوکوں کی مدد سے انسٹھ گیندوں پر اکہتر رن بنائے

انگلینڈ کو اب بھی سیریز میں بھارت پر تین۔دو کی برتری حاصل ہے۔

تفصیلی سکور کارڈ

سچن تندولکر اور سوروگنگولی کی سنچری اوپننگ شراکت اور یوراج سنگھ کی کی شاندار اننگز کی بدولت بھارت نے پہلے کھیلتے ہوئے مقررہ پچاس اوور میں چھ وکٹ کے نقصان پر تین سو چوبیس رن بنائے۔

اس کے جواب میں جب بارش کی وجہ سے امپائروں نے میچ کے خاتمے کا اعلان کیا تو انگلینڈ نے انتالیس اوورز میں آٹھ وکٹ کے نقصان پر دو سو بیالیس رن بنائے تھے جبکہ ڈک ورتھ لوئیس نظام کے تحت اسے دو سو اسّی رن بنانے تھے یوں بھارت نے اس میچ میں 38 رن سے فتح حاصل کی۔

بھارت کی جانب سے تندولکر اور گنگولی نے پہلی وکٹ کے لیے بیس اوور میں ایک سو پندرہ رن بنائے۔ تندولکر نے تیرہ چوکوں کی مدد سے انسٹھ گیندوں پر اکہتر رن بنائے۔ وہ جان لوئیس کی گیند پر وکٹ کیپر کے ہاتھوں کیچ ہوئے۔

بھارت کی دوسری وکٹ 150 کے مجموعی سکور پر گری جب گنگولی انسٹھ رن بنا کر پنیسر کا شکار بنے۔ تیسری وکٹ کے لیے گوتم گمبھیر اور یوراج سنگھ کی شراکت میں 94 رن بنے۔گوتم گمبھیر اکیاون رن بنا کر آؤٹ ہوئے جبکہ یوراج سنگھ نے ستاون گیندوں پر 72 رن کی شاندار اننگز کھیلی۔

انگلینڈ کی جانب سے گزشتہ میچ کے مین آف دی میچ سٹیورٹ براڈ اس میچ کے سب سے مہنگے بالر ثابت ہوئے اور انہوں نے دس اوور میں چوراسی رن دیے اور ایک وکٹ حاصل کی۔

انگلینڈ کی ٹیم کا آغاز اچھا نہ تھا اور ان کی پہلی وکٹ صرف سات رن پرگری جب الیسٹر کک اگرکار کی گیند پر کیچ ہوگئے۔ میٹ پرائر نے ابتدائی میچوں میں ناکامی کے بعد اس میچ میں چھیالیس رن کی اننگز کھیلی۔ تاہم کیون پیٹرسن ایک مرتبہ پھر ناکام رہے اور بنا کوئی رن بنائے آؤٹ ہوئے۔

انگلش ٹیم کے کپتان پال کالنگ وڈ نے اکیانوے رن کی ذمہ دارانہ اننگز کھیلی لیکن بار بار بارش کی وجہ سے کھیل کے متاثر ہونے اور دوسری جانب سے مسلسل گرنے والی وکٹوں کی وجہ سے وہ ٹیم کو فتح یاب نہ کروا سکے۔