خلائی طیارے کی مریخ کی بھیجی جانے والی اس تصویر میں ایک ہموارسطح پر کچھ پتھر دکھائی دے رہے ہیں

مریخ پر جانے والا یہ خلائی طیارہ ’مارز فینکس لینڈر‘ زمین سے سرخ سیارے تک کا اڑسٹھ کروڑ کلومیٹر کا سفر طے کر کے اتوار کو رات گئے مریخ کے شمالی حصے میں اترا تھا۔

ناسا کو زمین پر بھیجی جانے والی ان تصاویر سےتحقیقی طیارے کی لینڈنگ کی مزید تفصیل معلوم ہوئی ہے۔ پہلی تصویرمیں فینکس کے بحافظت مریخ پر اترنے کے بعد مریخ کے ’آرکٹیک میدان‘ کی شبیہہ ہے جس کو اس سے قبل کبھی اتنے قریب سے نہیں دیکھا گیا۔

مریخ سے آنے والی تاریخی تصویر

سائنسدانوں کا کہنا ہے کہ اس مِشن سے یہ واضح طور پر پتا چل سکے گا کہ آیا کبھی مریخ پر زندگی کے کوئی آثار موجود رہے ہیں یا نہیں۔

مریخ پر اترنے والا یہ خلائی روبوٹ ایسے مشینی ہاتھ سے لیس ہے جو مریخ کی سطح کے اندر پانی یا برف کی موجودگی کا پتا چلائے گا۔

	فینکس نےسورج سے توانائی حاصل کرنےوالے پینل کھولے لیے ہیں

اس خلائی سیارے کے دس ماہ طویل سفر کے آخری سات منٹ مشکل ترین لمحے تھے۔

اکیس ہزار کلو میٹر فی گھنٹہ کی رفتار سے مریخ کی فضا کے کنارے پر پہنچنے کے بعد اس خلائی سیارے نے حفاظت سے اترنے کے لیے کئی ایک پینترے بدلنا تھے۔

آخری مرحلے پر اس خلائی سیارے کا پیرا شوٹ کھلنا تھا تاکہ اس کی رفتار کم ہو سکے اور یہ بالکل محفوط حالت میں مریخ کی سطح کو چھو سکے۔

ناسا کی ’جیٹ پروپلشن‘ لیباٹری میں انجنیئروں اور مینیجروں نے طیارے کے مریخ کی سطح پر بحفاظت اترنے کی خوشی میں تالیاں بجائیں۔

اس طیارے کے فلائٹ کنٹرولر نے اعلان کیا کہ ’فینکس اتر گیا ہے۔۔ مریخ کے شمالی علاقے میں خوش آمدید۔‘

برطانیہ کی طرف سے امپیریل کالج لندن کے ڈاکٹر ٹام پک اس ٹیم میں شامل ہیں۔

انہوں نے بی بی سی کو بتایا کہ اس مشن کا مقصد مریخ کی سطح کے نیچے اس حصہ تک پہنچا جائےجہاں یقینی طور پانی کی موجودگی کا پتا چل سکے۔

انہوں نے کہا کہ اس سے قبل مریخ کے گرد گھومنے والے خلائی سیاروں کی مدد سے اس جگہ کے بارے میں معلومات حاصل کر لی گئی تھیں اور انہیں یہ معلوم ہے کہ سطح کے نیچے دس سنٹی میٹر یا اس سے کم گہرائی پر برف اور پانی موجود ہے۔

انہوں نے کہا کہ پانی کی موجودگی انتہائی اہمیت کی حامل ہے کیونکہ زندگی کا دارومدار اس پر ہے۔

مریخ پر خلائی طیارے کا اترنا انتہائی مشکل کام ہے۔ انیس سو اکہتر سے اب تک اس طرح کے گیارہ تجربات ہو چکے ہیں لیکن صرف پانچ میں کامیابی ہو سکی۔