پال رِنکن نامہ نگار سائنس، بی بی سی نیوز

امریکہ کے چاند پر پہنچنے کے پروگرام کے روح رواں ڈاکٹر وان بران کا خیال تھا کہ خلاء بازوں کو ابتدائی طور پر دو سال کے لئے اس سرخ سیارے پر بھیجا جائے گا اور واپسی پر وہ زہرہ (وینس) کے قریب سے گزرتے ہوئے آئیں۔

منصوبے کے تحت یہ کام انیس سو بیاسی تک ہو جانا تھا اور اس میں کمپیوٹرائزڈ راکٹ استعمال ہونا تھا۔ اس راکٹ کو زمین کے مدار میں رکھا جانا تھا جہاں سے اسے آٹھ سو ٹن بھاری خلائی گاڑی کو مریخ تک لیجانا اور واپس لانا تھا۔

پروفیسر وان بران کے اندازے کے مطابق اس منصوبے پر سالانہ چھ ارب ڈالر کے اخراجات ہونا تھے۔

لیکن ہوا یہ کہ انیس سو ساٹھ تک ذرائع ابلاغ اور سیاستدان اپنا اپنا خلاء کا شوق پورا کر چکے تھے اور اس وقت معاشی طور پر بھی یہ منصوبہ زیادہ پرکشش نہیں لگ رہا تھا۔ نتیجہ یہ ہوا کہ ڈاکٹر وان بران کی تجاویز پر کسی نے کان نہ دھرے۔

درمیانی عرصے سے تیزی سے گزرتے ہوئے خود کو موجودہ صدی میں لے آئیے۔

	صدر بش نے بھی انسان کو دوبارہ چاند پر بھیجنے کے ایک پروگرام کا اعلان کیا ہے

پھر سنہ دو ہزار چار میں امریکی صدر جارج ڈبلیو بُش نے بھی انسان کو دوبارہ چاند پر بھیجنے کے ایک پروگرام کا اعلان کیا جس کا اگلا مرحلہ مریخ پر پہنچنا ہے۔

بہت بڑا چیلنج

اگرچہ ڈاکٹر وان بران کے ابتدائی منصوبے کے بعد بھی انسان کومریخ پر بھیجے جانے کا خواب ہمیشہ زندہ رہا لیکن اس درمیانی عرصے میں کسی دوسرے منصوبے پر اس سنجیدگی سے غور نہیں ہوا۔

اس کی بڑی وجہ یہ ہے مریخ پر جانا ایک بہت بڑا چیلنج ہے۔ انسان کو وہاں اتارنا نہ صرف چاند پر جانے سے زیادہ مشکل ہے بلکہ اس کے اخراجات بھی کہیں زیادہ ہیں۔ آجکل کے پیش کیے جانے والے مختلف منصوبوں کے مطابق یہ اخراجات کم سے کم بیس ارب ڈالر اور زیادہ سے زیادہ چار سو پچاس ارب ڈالر تک ہو سکتے ہیں۔

ممکنہ اخراجات  جب بھی آپ کسی سے پوچھیں کہ مرخ پر جانے کا خیال کیسا ہے آپ کوئی یہی جواب ملتا ہے یہ زبردست خیال ہے لیکن مسئلہ اس وقت ہوتا ہے جب آپ ممکنہ اخراجات کی بات کرتے ہیں ڈاکٹر راجر

اسی طرح امریکی خلائی ادارے ناسا کے سربراہ نے حال ہی میں کہا تھا کہ ان کے خیال میں مریخ پر جانے کا خواب اگلے بیس برس تک شرمندہ تعبیرنہیں ہوگا۔

ہالینڈ میں قائم یورپی خلائی ایجنسی کے ایک اعلیٰ اہلکار سکاٹ ہوولینڈ کا کہنا تھا کہ ’میرے خیال میں بھی انسان کو مریخ پر اتارنے کا منصوبہ مستقبل بعید کی بات ہے۔ ابھی ہمیں بہت سی چیزوں کا جائزہ لینا ہے۔ ہمیں کئی چیزوں کے معاملے میں اپنی معلومات میں بہت اضافہ کرنے کی ضرورت ہے۔‘

اخراجات میں شراکت کا خیال

سکاٹ ہوولینڈ کا خیال ہے کہ مریخ پر اترنے کے منصوبے پر صرف اس صورت میں عمل ہو سکتا جب اس میں کئی ممالک شامل ہوں یعنی جب بڑے پیمانے پر بین الاقوامی تعاون موجود ہو۔

	مریخ کی سطح پرخلاء بازوں کو شاید روبوٹس کی بھی مدد حاصل ہو

اسی طرح یورپی ممالک بھی اس قسم کے مختلف منصوبوں پر کام کر رہے ہیں جن کا مقصد انسان کے طویل مدت تک خلاء میں رہنے کے امکانات کا جائزہ لینا ہے۔

روس بھی کچھ ایسے ہی تجربات میں مصروف ہے۔ روس اگلے سال مارچ سے ایک خاص منصوبے پر کام شروع کر رہا ہے۔ ’مارس 500‘ نامی اس منصوبے کا مقصد چھ رضاکاروں پر ان حالات کا تجربہ کرنا ہے جو مریخ کے سفر پر کسی بھی خلاء باز کو پیش آئیں گے۔

بڑا مسئلہ بوریت ان لوگوں کا سب سے بڑا مسئلہ شاید بوریت ہو۔ پانچ سو دنوں تک ان کے پاس کرنے کو کچھ نہیں ہوگا جس کا نتیجہ یہ ہوگا کہ وہ ایک دوسرے کے اعصاب پر سوار رہیں گے برُونو گارڈینی

یورپی خلائی ایجنسی کے برُونو گارڈینی کے مطابق ’ ان لوگوں کا سب سے بڑا مسئلہ شاید بوریت ہو۔ پانچ سو دنوں تک ان کے پاس کرنے کو کچھ نہیں ہوگا جس کا نتیجہ یہ ہوگا کہ وہ ایک دوسرے کے اعصاب پر سوار رہیں گے۔‘

خلاء بازوں کا ایک دوسرے سے رویہ

ان باتوں سے لگتا ہے کہ ہم شاید کسی ٹی وی ریئلٹی شو کی بات کر رہے ہیں لیکن سائنسدانوں کا خیال ہے کہ اس منصوبے سے انہیں صحیح اندازہ ہو سکے گا کہ طویل مدت تک خلاء میں ایک تنگ جگہ پر رہنا کیسا ہوگا۔ اس کا ایک اہم پہلو یہ ہے کہ ایسے تجربات سے آپ خلاء بازوں کا صحیح انتخاب کر سکیں گے۔

خلاء بازوں کی نفسیات جاننا اپنی جگہ لیکن خلاء میں بھیجے جانے والے افراد کو نفسیاتی دباؤ کے علاوہ کئی دیگر مشکلات کا بھی سامنا کرنا پڑے گا۔

	سورج کی تیز شعاعیں بھی خلاء بازوں کے لیے مہلک ہو سکتی ہیں

یہ شعاعیں روشنی کی رفتار سے سفر کرتی ہیں اور باریک ذرات کی شکل میں خلائی گاڑی اور اس پر سوار انسانوں کے جسم میں بھی پیوست ہو سکتی ہیں۔ جسم میں سے گزرتے ہوئے یہ شعاعیں آپ کے ڈی این اے، آپکی جینز اور خلیوں کو بھی نقصان پہنچا سکتی ہیں۔

مسٹر ہوولینڈ کا کہنا ہے کہ ’ یہ بات مسئلہ پیدا کر سکتی ہے اور ہمیں خلاء بازوں کو ان شعاعوں سے بچانے کا انتظام کرنا ہوگا۔‘

پلاسٹک بہترین حل ہے

برُونو گارڈینی کے مطابق خلائی شٹل پر محض موٹی دھات چڑھانے سے ان شعاعوں سے نہیں بچا جا سکے گا، بلکہ اس طرح بات مزید بگڑ جائے گی کیونکہ ان شعاعوں کے دھات پر پڑنے سے جو توڑ پھوڑ ہوتی ہے اس سے مزید ذرات پیدا ہوتے ہیں۔

	پولی تھائیلین کی اینٹیں خلاء بازوں کو شعاعوں سے بچا سکتی ہیں

سائنسدانوں کا خیال ہے کہ چاہے ہم پوری خلائی گاڑی پر پلاسٹک کی تہہ نہ بھی لگائیں لیکن جس حصے میں خلاء بازوں کو رہنا ہے ہم اسے پلاسٹک لگا کر بچا سکتے ہیں۔

تاہم شعاعوں سے بچاؤ کے لیے پلاسٹک سے بہتر مواد بھی موجود ہے اور وہ پانی ہے۔ اس لیے ماہرین کا خیال ہے کہ خلائی شٹل پر پانی سے بھرے ٹینک رکھ کر اس کے مخصوص حصوں کو بچائے رکھنا زیادہ مؤثر ہوگا۔

خلا بازوں کا انتخاب

ان مسائل کے علاوہ خلاء بازوں کے انتخاب میں اس بات کا بھی بڑا دخل ہو سکتا ہے کہ کچھ افراد پر شعاعوں کے برے اثرات دوسروں سے زیادہ ہوتے ہیں۔

وزن سے چھٹکارا  خلائی گاڑی کے اندر ہوا اور پانی کو دوبارہ قابل استعمال بنانے کے نظام سے اس وزن سے چھٹکارا مل جائے گا جو ان دو اشیاء کو ساتھ لیجانے میں درکار ہو سکتا تھا

لیکن خلاء بازوں کے حتمی انتخاب کے وقت جو دیگر باتیں سامنے رکھی جائیں گی ان کے پیش نظر اس بات کا امکان کم ہے مریخ پر بھیجے جانے والے تمام پہلےخلاء باز بوڑھے مرد ہوں گے۔

سفر کی طوالت

مریخ پر کشش ثقل زمین کی کشش ثقل کا تیس فیصد ہوتی ہے، لیکن کئی ماہ خلاء میں بے وزنی کی کیفیت میں گزارنے کے بعد مریخ کی سطح پر چلنے سے انسانی جسم پر شدید دباؤ پڑ سکتا ہے۔

ان تمام مسائل کا مطلب یہ ہے کہ مریخ تک سفر کا دورانیہ کم سے کم ہو۔ اس کا مطلب یہ ہے کہ انسان کو خلاء پر بھیجنے کے لیے جو راکٹ استعمال کیے جائیں گے ان کا نہایت طاقتور ہونا ضروری ہوگا۔

	ناسا نے جوہری ایندھن سے راکٹ چلانے کے تجربات بھی کیے ہیں

لیکن اس کا مطلب یہ بھی ہے کہ ہمیں وقت بچانے کے لیے بہت زیادہ ایندھن استعمال کرنا پڑے گا جس کے نتیجہ میں خلائی شٹل کا حجم اور وزن بھی بڑھانا پڑے گا۔ اور اس کے لیے مزید رقم درکار ہو گی۔

چھوٹی، تنگ خلائی گاڑی

مریخ کے سفر کے لیے جو طریقہ کار اپنایا جائے گا شاید اس میں ساز و سامان اور خلاء بازوں کو دو مراحل میں وہاں اتارا جائے گا۔ پہلے مرحلے میں سامان پہنچایا جائے گا جبکہ دوسرے مرحلے میں ایک تیز رفتار ہلکی خلائی گاڑی میں خلاء بازوں کو بھیجا جائے گا۔

اس سے ایندھن اور سفر کے وقت دونوں کی بچت ہو گی۔

خواب کی تعبیر  مریح پر انسانی قدم رکھنے کے خواب کی تعبیر سے پہلے ہمیں بہت سے مراحل سے گزرنا ہوگا۔ اور لگتا یہ ہے کہ حکومتوں کو اس مد میں پیسے لگانے کے کوئی خاص فائدے بھی نطر نہیں آ رہے ہیں

سائنسدان اس امکان کا بھی جائزہ لے رہے ہیں کہ خلاء باز اپنے لیے کچھ خوراک مریخ کی آب و ہوا میں ہی پیدا کر لیں۔ اس کے لیے درکار کاربن ڈائی آکسائیڈ (CO2) مریخ کے ارد گرد موجود میتھین گیس (CH4) سے حاصل کی جا سکے گی۔ یہی میتھین واپسی پر راکٹ کو چلانے کے لیے بھی استعمال کی جا سکے گی۔

لیکن یہ سچ ہے کہ مریح پر انسانی قدم رکھے جانے کے خواب کی تعبیر سے پہلے ہمیں بہت سے مراحل سے گزرنا ہوگا۔ اور لگتا یہ ہے کہ حکومتوں کو اس مد میں پیسے لگانے کے کوئی خاص فائدے بھی نطر نہیں آ رہے ہیں۔

بقول سکاٹ ہوولینڈ کے: ’ میں بچپن سے ہی اپالو مشن جیسی چیزوں سے متاثر رہا ہوں، اس لیے میرے لیے تو انسان کے مریخ پر اترنے کا محض خیال ہی جوش دلانے کے لیے کافی ہے، لیکن مسئلہ یہ ہے کہ اس خواب کی تعبیر کی لیے درکار رقم کی منظوری میرے ہاتھ میں نہیں۔‘