ہزاروں فوجیوں اور پولیس کو بیرکوں کے باہر تعینات کر دیا گیا تھا

بنگلہ دیشی حکومت کے ایک ترجمان نے کہا ہے کہ بغاوت اب بالکل ختم ہوگئی ہے۔ اس سے قبل وزیر اعظم شیخ حسینہ واجد نے بنگلہ دیش رائفلز کے باغی سپاہیوں سے فوراً ہتھیار ڈالنے کو کہا تھا اور وارننگ دی تھی کہ اگر باغی سپاہیوں نے ایسا نہیں کیا تو ان کے خلاف سخت کارروائی کی جائے گی۔

قوم سے اپنے خطاب کے دوران وزیر اعظم شیخ حسینہ واجد نے باغی فوجیوں کو مخاطب کرتے ہوئے کہا تھا کہ ’اپنے ہتھیار ڈال کر فوراً بیرکوں میں واپس چلے جائیں۔‘ ان کا کہنا تھا کہ ’مجھے سخت کارروائی کرنے پر مجبور نہ کریں۔ میرے صبر کو حد سے زیادہ نہ آزمائیں۔‘

بنگلہ دیش میں سرحدوں کی حفاظت کی ذمہ دار بنگلہ دیش رائفلز کی مسلح بغاوت بدھ کے روز دارالحکومت ڈھاکہ کے باہر دیگر شہروں میں پھیل گئی تھی۔ جبکہ جمعرات کو ڈھاکہ میں باغی سپاہیوں نے ہتھیار ڈال دیے تھے اور یرغمال بنائے گئے افراد کو رہا کرنا شروع کر دیا تھا۔

دریں اثناء نو فوجی جوانوں کی لاشیں برآمد کی گئی ہیں جنہیں خیال کیا جاتا ہے کہ باغی سپاہیوں نے ہلاک کردیا تھا۔ فوجی حکام کا کہنا ہے کہ فوج کے کئی آفیسر ابھی لاپتہ ہیں۔

باغیوں نے کہا تھا کہ وہ عام معافی کے بدلے اپنے ہتھیار ڈال دیں گے اور یرغمال بنائے گئے فوجی افسروں کو رہا کر دیں گے۔ معاہدہ وزیر اعظم اور باغی افراد کے ایک چودہ رکنی وفد کے درمیان مذاکرات کے بعد طے پایا تھا۔

چٹاگونگ میں اپنے آپ کو بنگلہ دیش رائفلز کا جوان بتانے والے ایک شخص نے کہا ہے کہ انہوں نے فوج کو اپنے کیمپ میں گھسنے سے روکنے کے گولیاں چلائی ہیں۔ حالانکہ اس خبر کی سرکاری طور پر تصدیق نہیں ہوئی۔

جنوب میں کھلانہ علاقے میں باغی سپاہیوں نےایک سڑک کو روکا لیکن فائرنگ کی کوئی اطلاع نہیں ہے۔ شمالی مشرقی میں ضلع مولوی بازار کے پولیس چیف نے اے ایف پی نیوز ایجنسی کو بتایا ہے کہ وہاں باغی سپاہی اندھا دھن گولیاں چلا رہے تھے۔

بدھ کو شروع ہونے والی بنگلہ دیش رائفلز کی مسلح بغاوت کے دوران پچاس افراد ہلاک ہو گئے تھے۔ وزیر اعظم شیخ حسینہ کی جانب سے بنگلہ دیش رائفلز کے بغاوت کرنے والے سپاہیوں کو عام معافی کے اعلان کے بعد سے باغیوں نے ہتھیار ڈالنا اور عورتوں اور بچوں کو رہا کرنا شروع کر دیا تھا۔

جمعرات کو حالات اتنے سنگین ہوگئے تھے کہ بنگلہ دیش رائفلّ کے سپاہیوں نے کم سے کم بارہ شہروں میں فوجی بیرکوں پر قبضہ کرلیا تھا۔

وزیر اعظم نے باغی افراد سے وعدہ بھی کیا کہ ان کے مطالبات پر غور کیا جائے گا۔ باغیوں نے کہا تھا کہ وہ عام معافی کے بدلے اپنے ہتھیار ڈال دیں گے اور یرغمال بنائے گئے فوجی افسروں کو رہا کر دیں گے۔ مقامی میڈیا اس بغاوت کی وجہ جوانوں کی تنخواہوں اور کام کرنے کے ماحول سے بے اطمینانی بتا رہا ہے۔