حمادہ ابو قمر بی بی سی نیوز، غزہ شہر

غزہ تباہی کو دیکھ کر کہا جا سکتا ہے کہ یہاں سکریپ کا کاروبار منافع بخش ہوگا: نامہ نگار

اقوامِ متحدہ کے اندازوں کے مطابق اب تک غزہ کے 50800 مکین گھروں سے محروم ہو گئے ہیں جبکہ 400000 افراد کو پینے کا پانی دستیاب نہیں۔ اقوامِ متحدہ کا یہ بھی کہنا ہے کہ غزہ کی تعمیر پر اربوں ڈالر خرچ ہوں گے۔

نامہ نگار کہتے ہیں کہ اسرائیلی کارروائی سے عمارتیں ایسے ملیا میٹ ہوئی ہیں جیسے تھی ہی نہیں اور اب تک ملبے سے لاشیں نکل رہی ہیں۔

اسرائیلی کارروائی سے ہونے والی تباہی کا اندازہ اب ہونا شروع ہوا ہے جب اسرائیلی فوج جنگ بندی کے بعد علاقے سے جا رہی ہے۔

اسرائیل نے کہا ہے کہ وہ ایک سو تینتالیس امدادی ٹرک اور ساٹھ ہزار لیٹر ایندھن غزہ جانے کی اجازت دے دے گا۔

ریڈ کراس کی عالمی کمیٹی کے ترجمان کا کہنا ہے کہ طبی رسد لے کر دس ایمبولینسیں غزہ گئی ہیں۔

اس سے قبل اسرائیلی ترجمان مارک راگیو نے بی بی سی سے بات کرتے ہوئے کہا تھا کہ دوائیں، خواراک، توانائی فراہم کرنے والی اشیاء کی جتنی ضرورت ہوئی غزہ بھیجی جائیں گی۔

تاہم بی بی سی کے لیے یہ تصدیق ممکن نہیں ہو سکی کہ آیا خوراک اور ایندھن غزہ پہنچا یا نہیں۔

فلسطینی میڈیکل ذرائع کہتے ہیں کہ اسرائیلی کارروائی میں 1300 فلسطینی ہلاک جبکہ 5500 زخمی ہوئے ہیں۔ ستائیس دسمبر کو اسرائیلی کارروائی شروع ہونے سے لیکر اب تک تیرہ اسرائیلی مارے گئے ہیں۔

اسرائیل نے سنیچر کو جنگ بندی کا اعلان یہ کہہ کر کیا تھا کہ اس کے جنگی مقاصد پورے ہوگئے ہیں۔ حماس نے بھی بعد میں جنگ بندی کا اعلان کر دیا تھا۔

بی سی سی کے ایک نامہ نگار نے جنہوں نے جبالیہ کا سفر کیا بتایا ہے کہ اس علاقے میں جہاں سے اسرائیلی کارروائی کا آغاز ہوا تھا، عمارتوں کی عمارتیںں ملیا میٹ ہو چکی ہیں۔

نامہ نگار کہتے ہیں کہ غزہ کی تباہی کا یہ عالم ہے کہ اب وہاں ٹوٹی ہوئی لکڑی اور سکریپ کا کام شاید منافع بخش ہو۔

اقوامِ متحدہ کے سیکریٹری جنرل بان کی مون منگل کو غزہ جا کر خود نقصان کا اندازہ کریں گے تاہم اسرائیلی حکام کہتے ہیں کہ ’ان کا یہ دورہ تبدیل بھی ہو سکتا ہے۔‘