امریکہ کے بعد ایشیا میں حصص کی قیمتیں گر رہی ہیں

وزارت خزانہ، سنٹرل بینک فنانشیل سروسز کمیشن نے کہا کہ اس پیکج کے تحت سو ارب ڈالر کی مالیت کے قرضوں کو حکومتی تحفظ فراہم کیا جائے گا۔

اس کے علاوہ حکومت بینکوں کوتیس ارب ڈالر کی رقم بھی مہیا کرائے گی اور اس کے علاوہ چھوٹے کاروباروں کو بھی مزید امداد فراہم کی جائے گی۔

جنوبی کوریا کی معیشت ایشیا کی تیسری اور دنیا کی تیرہویں سب سے بڑی معیشت ہے۔ ایکسپورٹ کے شعبے میں جنوبی کوریا کو خاص کامیابی ملی ہے اور اس نے جہاز رانی، گاڑیوں کی صنعت اور الیکٹرانکس کے شعبے میں خاص طور پر اپنی پہچان بنائی ہے۔

ایک بیان میں حکومت نے کہا کہ آئندہ برس تیس جون تک بینکوں کے ذریعہ لیے جانے والے تمام غیر ملکی قرضوں کو تین سال کے لیے گارنٹی فراہم کی جائے گی تاکہ مالی منڈیوں میں خوف کا جو ماحول ہے، اس دور کیا جاسکے۔

اس کے علاوہ انڈسٹریل بینک آف کوریا چھوٹے کاروباروں کو ساڑھے سات سو ملین ڈالر کے قرضے فراہم کرے گا۔

جنوبی کوریا کی کرنسی وان ہے جس کی ڈالر کے مقابلے میں قدر صرف اس سال ہی تیس فیصد گر گئی ہے۔

لیکن حکومت کا کہنا ہے کہ مالی بحران کے باوجود معیشت کی بنیادیں ٹھوس ہیں اور اس کے پاس وافر مقدار میں غیر ملکی زرمبادلہ موجود ہے۔