 | | | صدر بش مالیاتی امدادی بل پر دستخط کر رہے ہیں |
امریکہ میں جاری مالیاتی بحران سے نمٹنے کے لیے سات سو ارب ڈالر کے ’بیل آؤٹ پیکج‘ کی کانگریس سے منظوری کے باوجود صدر جارج بش نے خبردار کیا ہے کہ امریکی معیشت کو مشکلات کا سامنا رہے گا۔ انہوں نے یہ بات امریکی ایوان نمائندگان کی جانب سے اس بِل کی منظوری کے بعد اس پر دستخط کرتے ہوئے کہی ہے۔ صدر بش کا کہنا تھا کہ ’یہ مشکل دور گزرنے میں وقت لگے گا اور اس کے لیے پرعزم کوشش کرنا ہوگی‘۔ امریکی ایوانِ نمائندگان نے جمعہ کو یہ ترمیم شدہ بل ایک سو اکہتر ووٹوں کے مقابلے میں دو سو تریسٹھ ووٹوں سے منظور کر لیا تھا۔ امریکی سینیٹ پہلے ہی اس بل کو منظور کر چکی ہے۔ بِل کو سینیٹ میں پچیس کے مقابلے میں چوہتر ووٹوں سے منظور کیا گیا تھا۔ بل کی منظوری کا خیر مقدم کرتے ہوئے صدر بش نے کہا کہ یہ امریکی معیشت کے’خراب موسم‘ میں بہتری لانے کے لیے نہایت ضروری ہے۔انہوں نے کہا کہ وہ اس منصوبے میں حکومتی کردار اور اس کی لاگت کے حوالے سے پائی جانے والی تشویش سے واقف ہیں تاہم’ ان حالات میں یہ عمل واضح طور پر ضروری تھا‘۔ یاد رہے کہ ایوانِ نمائندگان نے اس سے پہلے اس بل کو مسترد کردیا تھا اور اس پر اعتراض کیا گیا تھا کہ مالیاتی اداروں کو اس طرح امداد فراہم کر کے بچانا ٹیکس دہندگان کے ساتھ زیادتی ہے۔ اس کے بعد بل میں ترامیم کی گئیں جن میں خاص طور پر مالیاتی اداروں کے سربراہوں اور اعلیٰ افسروں کی تنخواہوں کو محدود کیا گیا خاص طور پر اس وقت جب وہ کسی ادارے سے رخصت ہوں۔ اس کے علاوہ عام لوگوں کی بچتوں پر حکومت کی ضمانت کی حد کو ایک لاکھ ڈالر سے بڑھا کر ڈھائی لاکھ ڈالر کر دی گئی۔ ادھر بل کی منظوری کے باوجود نیویارک کے بازارِ حصص میں مندی کا رجحان رہا ہے جبکہ حکومتی اعدادوشمار سے یہ بات سامنے آئی ہے کہ امریکہ میں ملازتوں کے خاتمے کی شرح گزشتہ پانچ برس میں بلند ترین سطح پر پہنچ گئی ہے۔ | 
منصوبہ نامنظور، مارکیٹوں کا بُرا حال
