ریاض سہیل بی بی سی اردو ڈاٹ کام، کراچی

	’ریجن میں پہلے ہی پاکستانی سٹاک مارکیٹ کم قیمت پر چل رہی ہے‘

کراچی سٹاک ایکسچینج پیر کو چوبیس پوائنٹس کی کمی پر بند ہوا تھا۔ منگل کو بازار کا آغاز تین سو پوائنٹس کی کمی سے ہوا مگر چند گھنٹوں کے بعد مارکیٹ میں بہتری آنا شروع ہوئی اور کے ایس سی ہنڈریڈ انڈیکس نوے پوائنٹس کی کمی کے ساتھ تیرہ ہزار ساتھ سو انسٹھ پوائنٹس پر بند ہوا۔

کراچی اسٹاک کے تجزیہ نگار مزمل اسلم کا کہنا ہے کہ خطے کی مارکیٹ کے بحران کو دیکھتے ہوئے سرمایہ کاروں نے سوچا کہ کہیں غیر ملکی سرمایہ کار شیئرز فروخت نہ کر دیں اور مارکیٹ میں شیئرز کی قیمت نہ گر جائے اس لیے مارکیٹ میں فروخت کا رجحان دیکھنے میں آیا۔

انہوں نے بتایا کہ بازارِ حصص میں بہتری کی وجہ یہ ہے کہ ریجن میں پہلے ہی پاکستان کی سٹاک مارکیٹ کم قیمت پر چل رہی ہے اس لیے اگر تھوڑی بھی فروخت ہوتی ہے تو مارکیٹ پرکشش بن جاتی ہے اور پاکستان کی ایسی کئی کمپنیاں ہیں جن میں غیر ملکی سرمایہ کاری بھی آرہی ہے اس لیے مارکیٹ سنبھل گئی ہے۔ اس صورتحال میں پاکستان نے یہ دکھایا ہے کہ وہ دنیا کی مارکیٹوں سے الگ ہے۔

تجزیہ نگاروں کا کہنا ہے کہ اگر خطے کے بازارِ حصص میں انیس سو اٹھانوے والا بحران آ جاتا ہے تو اس کے شدید اثرات پاکستان کی مارکیٹ پر بھی پڑیں گے۔

یاد رہے کہ انیس سو اٹھانوے میں بھی ایشیا میں کرنسی اور سٹاکس کا بحران پیدا ہوا تھا جس دوران پہلے مرحلے میں غیر ملکی سرمایہ کاروں نے سٹاک مارکیٹ سے سرمایہ نکال لیا تھا جس سے کرنسی کی قدر کم ہوئی تھی اور معشیت میں گراوٹ آ گئی تھی۔