حالیہ ہفتوں میں علیحدگی پسندوں کے خلاف کارروائی کے دوران کم از کم پچاس ترک فوجی ہلاک ہو چکے ہیں

ترک فوج کا دعویٰ ہے کہ شمالی عراق کے اندر اس کارروائی سے کم از کم ساٹھ مبینہ عسکریت پسند کرد باغی ہلاک ہوئے ہیں۔ گزشتہ جمعے کو ترک وزیر اعظم طیب رجب اردوگان نے ترک فوج کو عراق کی سر زمین میں گھس کر کرد باغیوں کے خلاف کارروائی کا اختیار دے دیا تھا۔

ترک فوج کی ویب سائٹ پر جاری کیے گئے ایک بیان میں یہ واضح نہیں کیا گیا کہ کرد علیحدگی پسندوں کے خلاف کس نوعیت کا فوجی آپریشن ہوا نہ ہی یہ ذکر کیا گیا ہے کہ اس آپریشن کے لیے ترک فوج نے اپنی سرحدی حدود میں رہتے ہوئے کارروائی کی یا انہیں سرحد پار عراق کی حدود میں داخل ہونا پڑا۔

بیان میں کہا گیا ہے کہ انٹیلجینس کے ذریعے علیحدگی پسند کرد تنظیم کردستان ورکرز پارٹی کے مسلح کارکنوں کی نشاندہی کے بعد ان پر بھاری فائرنگ کی گئی۔ ترک فوج کا بڑا آپریشن حکومت کی جانب سے اس اعلان کے بعد ہوا ہے جس میں کہا گیا تھا کہ فوج کو کرد علیحدگی پسندوں کے خلاف کارروائیوں کی کھلی اجازت دی دی گئی ہے۔

ترک وزیراعظم طیپ اردوگان نے کرد علیحدگی پسندوں کے خلاف اس تازہ آپریشن کا دفاع کرتے ہوئے کہا ہے کہ ترک فوج اس معاملے میں پوری ذمہ داری کے ساتھ اپنے فرائض سرانجام دے رہی ہے۔

	ترک فوج نے یہ نہیں بتایا کہ کارروائی کس طرح کی گئی

طیب اردوگان نے ترک حزبِ مخالف کی جانب سے ان الزامات کو مسترد کیا ہے کہ حکومت نے کرد باغیوں کے خلاف بڑی فوجی کارروائی کرنے میں تاخیر کی ہے۔

ترک وزیرِ اعظم نے کہا کہ ’حزبِ اختلاف اتحاد و اتفاق کی اس گھڑی میں رکاوٹیں کھڑی کرنے میں مصروف ہے۔ یہ رویہ انتہائی غلط ہے۔ آپ کو اچھی طرح علم ہے کہ ہم اس مرحلے میں ذرا بھی نہیں رکے اور ہماری یہی کوشش رہی ہے کہ پہلے اس مسئلے کے حل کے لیے سیاسی طریقۂ کار اختیار کیا جائے۔‘

عراق کے شمالی پہاڑی علاقوں میں تین ہزار کے قریب کرد علیحدگی پسندوں نے پناہ لے رکھی ہے۔ امریکہ اور عراق کا اصرار ہے کہ ترکی ایسی کسی بھی کارروائی سے باز رہے جس سے عراق کے قدرے پرامن کرد خطے میں بدامنی پھیلنے کا اندیشہ ہو۔ تاہم ترکی میں عوامی سطح پر کرد علیحدگی پسندوں کے خلاف فوجی کارروائی کو بھرپور حمایت حاصل ہے۔ حالیہ ہفتوں میں علیحدگی پسندوں کے خلاف کارروائی کے دوران کم از کم پچاس ترک فوجی ہلاک ہو چکے ہیں۔