شمالی کوریا نے گزشتہ برس پہلی بار جوہری ٹیسٹ کیا تھا

محکمۂ خارجہ کے ترجمان سین میکورمیک کا کہنا تھا کہ امریکہ کو شمالی کوریا کے ری ایکٹر کے بند ہونے کی اطلاع تو مل گئی ہے لیکن اب وہ ایٹمی توانائی کے عالمی ادارے کی طرف سے اس خبر کی تصدیق کے انتظار میں ہے۔

بین الاقوامی ادارے کی ایک ٹیم یانگ بیون میں اس ری ایکٹر کی بندش کی نگرانی کر رہی ہے۔ یہ ری ایکٹر فروری میں ہونے والی ایک ڈیل کے تحت بند کیا گیا ہے۔

شمالی کوریا کی طرف سے اس جوہری پلانٹ کے بند ہونے سے کچھ گھنٹے قبل، شمالی کوریا نے تیل کی ایک بڑی کھیپ وصول کی جواس اقتصادی امداد کا ایک حصہ تھی جس کا وعدہ ری ایکٹر کو بند کرنے کے بدلے میں کیا گیا تھا۔

اقوامِ متحدہ کے ایٹمی توانائی کے ادارے کا عملہ شمالی کوریا سے یونگ بیون کے لیے روانہ ہوگیا ہے جہاں وہ ری ایکٹر کو باضابطہ طور پر بندی کر دے گا اور پورے پلانٹ کو سربمہر کرے گا۔

عالمی ادارے کے سربراہ محمد البرادعی نے اس پیش رفت کو سراہتے ہوئے کہا کہ جوہری تنازعات کو حل کرنے کا بہترین طریقہ مکالمہ ہے۔

انہوں نے کہا ’جتنا لوگ ایک دوسرے سے براہِ راست بات چیت کریں اتنا ہی اچھا ہے۔ خواہ وہ شمالی کوریا کے ساتھ ہو یا ایران کے ساتھ۔ میں امریکہ کو ایران کے ساتھ آمنے سامنے بات کرتے ہوئے دیکھنا چاہتا ہوں کیونکہ مکالمہ معاملوں کو سلجھانے کا ایک طریقہ ہے‘۔

امریکی دفترِ خِارجہ کے ترجمان کا کہنا تھا کہ امریکہ اس پیش رفت کا خیر مقدم کرتا ہے اور عالمی ادارے کی طرف سے ری ایکٹر کے بند کیے جانے کی تصدیق کے انتظار میں ہے۔

سول میں بی بی سی کے نامہ نگار کا کہنا ہے کہ اس کام کی تکمیل میں دو سے تین ہفتے لگ سکتے ہیں۔

جنوبی کوریا نے گزشتہ برس جوہری ٹیسٹ کیا تھا اور کہتا رہا ہے کہ امریکی حملے سے بچنے کے لیے اسے جوہری ہتھیار درکار ہیں۔

بدھ کو اس عمل کے اگلے مرحلے کے سلسلے میں بیجنگ میں مذاکرات ہوں گے جن میں امریکہ، جنوبی اور شمالی کوریا، روس، جاپان اور چین شریک ہوں گے۔