رمادی اتحادی فوجوں اور عراقی حکومت کے خلاف سنی مزاحمتی کارروائیوں کا مرکز رہا ہے (فائل فوٹو)

پولیس کمانڈر نے بتایا ہے کہ اس حملے میں ایک پولیس چوکی کو نشانہ بنایا گیا۔

پولیس نے یہ بھی کہا ہے کہ دیوانیہ کے شہر میں بھی امریکی اور عراقی فوجوں اور شیعہ مہدی آرمی کے جنگجوؤں کے درمیان جھڑپیں ہوئی ہیں۔ ملک کے اس جنوبی شہر میں پولیس کے ذرائع کے مطابق جمعہ کی صبح ایک چھاپے کے بعد گاڑیوں کے سڑکوں پر آنے پر پابندی لگا دی گئی ہے۔

بی بی سی بات کرتے ہوئے پولیس حکام نے بتایا ک دیوانیہ میں ہونے والے حملوں میں کئی امریکی گاڑیوں کو تباہ کر دیا گیا ہے۔

گورنر کے دفتر کے ایک افسر کے مطابق حالیہ دنوں میں دیوانیہ میں کئی لوگ فرقہ وارانہ لڑائیوں میں مارے جا چکے ہیں۔

دیوانیہ میں پولیس اور شیعہ ملیشیا تنظیم دونوں کے ذرائع کے مطابق امریکی فوجوں نے شہر کے وسط میں مقتدیٰ الصدر کی حامی مہدی آرمی کے گڑھ پر ایک بڑا حملہ کیا ہے۔ شہر کے اس علاقہ میں مہدی آرمی کو خاصی حمایت حاصل ہے۔

اس حملے کے بعد علاقے میں زبردست لڑائی ہوئی جس میں شیعہ ملیشیا کے جنگوؤں کے علاوہ عام شہری بھی مارے گئے۔

اس دوران رمادی کے پولیس کمانڈر نے چوکی پر حملے کی تفصیل بتاتے ہوئے کہا ہے کہ شہر کے مغربی حصہ میں واقع اس چوکی پر دھماکہ اس وقت ہوا جب ایک چھوٹے ٹرک کو چوکی کے اندر مار دینے کے بعد اس میں بم دھماکہ کیا گیا۔اطلاعات کے مطابق اس حملے میں کئی پولیس اہلکار ہلاک ہوئے ہیں جبکہ تینتیس افراد زخمی بھی ہوئے ہیں۔

یہ حملہ ایک گنجان آباد علاقے میں ہوا ہے اس لیے خدشہ ہے کہ ہلاک ہونے والوں میں ایک بڑی تعداد عام شہریوں کی بھی ہو سکتی ہے۔

کچھ اطلاعات میں یہ بھی کہا جا رہا ہے کہ حملے میں استعمال ہونے بم سے کلورین بھی خارج ہوئی تھی۔

اس سے قبل انبار کے صوبے میں دس ایسے بم دھماکے ہو چکے ہیں جن میں کلورین گیس والے بم استعمال کیے گئے تھے۔

رمادی عراق پر حملے کے بعد سے اتحادی فوجوں اور عراقی حکومت کے خلاف سنی مزاحمتی کارروائیوں کا مرکز رہا ہے۔