خالد شیخ محمد القاعدہ کے سینئر ترین رہنماؤں میں سے ایک تھے

محکمۂ دفاع یعنی پینٹاگون کی جانب سے جاری کردہ ایک بیان میں خالد شیخ محمد نے خود اپنے ہاتھوں ڈینئل پرل کے قتل پر ’فخر‘ کا اظہار کیا۔ پینٹاگون نے ڈینئل پرل کے قتل سے متعلق خالد شیخ محمد کے کچھ بیانات کو پرل کے اہل خانہ کے جذبات کا لحاظ رکھتے ہوئے ریلیز نہیں کیا ہے۔

ڈینیئل پرل کیس میں برطانوی شہری احمد عمر سعید شیخ کو پاکستان میں انسداد دہشت گردی کی عدالت نے سزائے موت سنائی تھی اور اس کے تین ساتھیوں کو عمر قید کی سزا سنائی گئی تھی۔

جمعرات کو پنٹاگون کی جانب سے جاری کردہ ایک عدالتی دستاویز کے مطابق خالد شیخ محمد نے گیارہ ستمبر کے حملوں کی منصوبہ بندی کا بھی اعتراف کیا۔ ’میں ابتداء سے انتہا تک 11/9 کا ذمہ دار ہوں۔‘

دستاویز کے مطابق خالد شیخ نےگوانتانامو بے کیمپ میں جاری سماعت کے دوران بگ بین اور لندن کے ہیتھرو ہوائی اڈے کو نشانہ بنانے سمیت دنیا بھر میں دہشتگردی کی انتیس کارروائیوں کی منصوبہ بندی کا بھی اعتراف کیا ہے۔

محکمۂ دفاع کے مطابق گوانتانامو بے کیمپ میں ہونے والی عدالتی کارروائی میں خالد شیخ محمد کو ایسا دشمن جنگجو قرار دیا گیا ہے جنہیں غیرمعینہ مدت تک حراست میں رکھا جا سکتا ہے۔ اس فیصلے سے خالد شیخ محمد پرگوانتامو بے میں خصوصی فوجی ٹرائبیونل کے تحت مقدمہ چلانے کی راہ ہموار ہوگئی ہے۔

	ڈینئل پرل کا پاکستان میں وڈیو کیمرہ کے سامنے بہیمانہ طور پر قتل کردیا گیا

پنٹاگون حکام کی جانب سے جاری کردہ دستاویز خالد شیخ کے عربی میں دیے گئے بیان کا ترجمہ کرنے اور اس میں سے خفیہ معلومات حذف کرنے کے بعد فراہم کی گئی ہے۔

اس کے مطابق خالد شیخ محمد نے1993 میں ورلڈ ٹریڈ سنٹر پر حملے، اور امریکن ائر لائن کے طیارے کو تباہ کرنے کی ناکام سازش کی ذمہ داری بھی قبول کی ہے۔ خالد شیخ نے یہ بھی تسلیم کیا ہے کہ انہوں نے پوپ جان پال دوئم اور امریکی صدر بل کلنٹن کو قتل کرنے کا منصوبہ بھی بنایا تھا۔

بی بی سی کے سکیورٹی نامہ نگار گورڈن کریرا کے مطابق خالد شیخ محمد کے اعتراف جرم میں کچھ نیا نہیں اور نائن الیون کے حوالے سے ان سے کی جانے والی تفتیش کی ایک دستاویز انٹرنیٹ پر بھی موجود ہے۔

نامہ نگار کے مطابق اہمیت اس بات کی ہے کہ خالد شیخ نے یہ اعترف ایک عدالتی کارروائی میں کیا ہے جس سے ان پر فوجی عدالت میں مقدمہ چلنے کے امکانات واضح ہو گئے ہیں۔