ہمارا مقصد جوہری ہتھیار حاصل کرنا نہیں بلکہ جوہری توانائی حاصل کرنا ہے: ایران

ایران کے اعلٰی جوہری مذاکرات کار علی لاریجانی ارکان پارلیمان اور وزرائے دفاع کے اجلاس سے خطاب کریں گے۔

لاریجانی کا کہنا ہے کہ ان کے خیال میں ایران کے جوہری پروگرام پر ہونے والا تنازع مذاکرات کے ذریعے حل کیا جاسکتا ہے۔

سنیچر کو روسی صدر ولادیمیر پوتن نے اجلاس سے خطاب کے دوران امریکہ کو ’بہت خطرناک‘ قرار دیا اور اس پر دنیا میں ’تقریباً لامحدود‘ طاقت کے استعمال کے لیے شدید تنقید بھی کی۔

اقوام متحدہ نے ایران کے لیے اس ماہ کے اواخر تک کی ڈیڈ لائن مقرر کی ہے تاکہ وہ یورینیم کی افزودگی روک دے یا پھر وسیع تر اقتصادی پابندیوں کا سامنا کرے۔

میونخ میں ہونے والی اس کانفرنس کا انعقاد 1962 میں شروع ہوا تھا۔ اس کانفرنس میں ہر سال عالمی رہنما اپنے وقت کے اہم مسائل پر خیالات کا تبادلہ کرتے ہیں۔

روسی صدر کے خطاب سے قبل جرمنی کی چانسلر انجیلا مرکل نے اپنے خطاب میں کہا کہ عالمی برادری ایران کو ایٹمی ہتھیار حاصل کرنے سے روکنے کے لیے پرعزم ہے۔

ان کا کہنا تھا کہ ’ہم جس معاملے کی بات یہاں کررہے ہیں وہ بہت ہی حساس معاملہ ہے اور اسی لیے ہمیں نہایت شفاف طریقہ اختیار کرنا ہوگا جو اب تک ایران نہیں کرسکا ہے۔ اگر آئندہ بھی ایران ایسا کرنے میں ناکام رہا تو اس کے پاس عالمی برادری میں مزید تنہا رہ جانے کے علاوہ کوئی چارہ نہیں ہوگا‘۔

علی لاریجانی بار بار یہ کہہ رہے ہیں کہ ایران کا مقصد جوہری ہتھیار حاصل کرنا نہیں بلکہ جوہری توانائی حاصل کرنا ہے۔

اس دو روزہ کانفرنس کے دوران یورپی مندوبین علی لاریجانی سے غیر رسمی مذاکرات کریں گےجوکہ گزشتہ سال مذاکرات کی ناکامی کے بعد ایرانی مذآکرات کار سے ان کی پہلی ملاقات ہوگی۔