ایڈمرل فیلن نے کمیٹی کو بتایا کہ عراق کے بارے میں سابق امریکی حکمت عملی کارگر ثابت نہیں ہوئی

ایڈمرل ولیم فیلن نے امریکی سینیٹ کی ایک کمیٹی سے خطاب کرتے ہوئے
کہا ہے کہ عرا ق میں قلیل مدت میں جمہوریت قائم ہونے کی امیدیں غیرحقیقت پسندانہ ہیں اور شاید امریکہ کو اپنے نصب العین کا دوبارہ تعین کرنا ہوگا۔ انہوں نے عراق کے بارے میں ’نیا اور مختلف انداز‘ اپنانے کی بات
کی ہے۔

سینیٹ کی آرمڈ سروسز کی کمیٹی کے سامنے عراق کے حوالے سے کچھ نئی تصیلات بیان کرتےہوئے انہوں نے یہ مشورہ بھی دیا کہ امریکہ کو عراق میں ایک ہی وقت میں بہت کچھ حاصل کرنے کی کوشش سے گریز کرنا چاہیے۔

ان کا کہنا تھا کہ اگر انہیں اس نئے عہدے پر تعینات کیا جاتا ہے تو ان کی پہلی ترجیح یہی ہو گی کہ وہ عراق پر ایران کا اثر کم کریں۔

ان کا حالیہ بیان عراق میں عاشورہ کے موقع پر چالیس شیعہ مسلمانوں کی ہلاکت کے ایک دن بعد سامنے آیا ہے۔ بموں اور مارٹر حملوں میں سو سے زائد افراد زخمی بھی ہوئے تھے۔

واشنگٹن میں ایڈمرل فیلن نے کمیٹی کو بتایا کہ عراق کے بارے میں سابق امریکی حکمت عملی کارگر ثابت نہیں ہوئی۔ ان کا کہنا تھا کہ انہیں اس بات پر یقین ہے کہ عراق میں صورت حال تبدیل کی جا سکتی ہے لیکن وقت بہت کم ہے۔ ’اس سلسلے میں ہم جو کچھ بھی کرتے رہے ہیں اس نے صورت حال کو تبدیل کرنے میں کوئی کردار ادا نہیں کیا۔ صورت حال کے جائزے کے بعد مجھے یہی نظر آتا ہے کہ ہمیں کچھ مختلف کرنا ہے‘۔

ایڈمرل فیلن کا کہنا تھا کہ اس بات کی بھی کوئی ضمانت نہیں ہے تاہم کمیٹی ان کی بہترین صلاحیتوں پر انحصار کر سکتی ہے۔ ان کا یہ بھی کہنا تھا کہ انہیں خطے میں ایران کے اثر کو کم کرنے کوششوں کے ضمن میں حمایت درکار ہوگی۔ تاہم ان کا کہنا تھا کہ وہ مستقبل میں ایران کے ساتھ جنگ کے کسی منصوبے سے واقف نہیں ہیں۔

	امریکی صدر نے ایڈمرل فیلن کو مشرق وسطی کے نئے فوجی سربراہ کے طور پر نامزد کیا ہے

ایڈمرل فیلن اس وقت بحرالکاہل میں امریکی فوج کے سربراہ کی حیثیت سے خدمات سرانجام دے رہے ہیں۔ اگر ایڈمرل فیلن مشرق وسطیٰ میں امریکی فوج کے سربراہ کا عہدہ سنبھال لیتے ہیں تو وہ امریکی بحریہ کے پہلے افسر ہوں گے جو سینٹرل کمانڈ کی سربراہی کریں گے۔

وہ جنرل جان ابی زید کی جگہ لیں گے جو چار سال تک سینٹرل کمانڈ کے سربراہ کا عہدے سنبھالنے کے بعد اب ریٹائر ہو رہے ہیں۔ اگر ایڈمرل فیلن کی تعیناتی کی تصدیق کردی جاتی ہے تو وہ حال ہی میں عراق میں امریکی فوج کی کمان سنبھالنے والے جنرل ڈیوڈ پیٹریوس کے بھی افسر اعلیٰ ہوں گے۔