گزشہ رات صدر بش نے عراق پالیسی پر حمایت کی اپیل کی تھی

خارجہ امور کی کمیٹی کے طرف سے مننطور کردہ قرارداد جس پر عمل درآمد کرنا صدر کے لیئے ضروری نہیں ہے،اب آئندہ ہفتے سینیٹ کے اجلاس میں رائے شماری کے لیئے پیش کی جائے گی۔

نئی عراق پالیسی کو موقع دیں: صدر بش

سینیٹ میں اب ڈیموکریٹ پارٹی کی اکثریت ہے اور گزشتہ رات سٹیٹ آف یونین خطاب میں صدر بش نے کانگریس کے دونوں ایوانوں سے اپیل کی تھی کہ عراق پر ان کی نئی حکمتِ عملی کو کامیابی کے لیے موقع فراہم کیا جائے۔

اگرچہ سینیٹ کمیٹی کی قرارداد پر عمل کرنا لازمی نہیں ہے لیکن بعض لوگوں کا خیال ہے کہ ہو سکتا ہے صدر بش اپنے فیصلے پر نظرِ ثانی کرلیں۔

اس قرارداد میں صدر بش کے اکیس ہزار پانچ سو اضافی فوجی عراق بیھجنے کے فیصلے کی مخالفت کی گئی ہے۔ ان میں سے پہلے ہی تین ہزار دو سو فوجی عراق پہنچ چکے ہیں۔

اس قرارداد کو پیش کرنے کی تجویز اس ماہ کے اوائل میں تین ممتاز سینیٹرز نے دی تھی اور یہ کہا تھا کہ صدر بش کا منصوبہ امریکی مفاد میں نہیں ہے۔ ساتھ ہی یہ بھی کہا گیا تھا کہ عراق کی سکیورٹی جلد ہی عراقیوں کے حوالے کی جائے۔ یہ تین رہنماجوزف بیڈن (ڈیموکریٹ) ، کارل لیون (ڈیموکریٹ) اور چک ہیگل (ریپبلیکن) ہیں اور عراق کی جنگ کے پرانے ناقد ہیں۔

اس قرارداد کے واحد ریپبلیکن حامی سینیٹر چک ہیگل کا کہنا تھا: ’بجائے اس کے کہ ہم بیس ہزار سے زائد فوجی عراق بھیج دیں، بہتر ہے پہلے ہمیں پکا پتہ ہو کہ ہم کر کیا رہے ہیں‘۔

اس قرارداد پر بحث سے قبل نائب صدر ڈِک چینی نے صدر بش کی پالیسی پر اعتراضات یہ کہتے ہوئے مسترد کر دیئے تھے: ’اس طرح ہم نہیں رکیں گے اور یہ کہ ایسا کرنا خود فوج کے نقطۂ نگاہ سے برا ہوگا۔‘