اتوار کو بغداد میں دو بم دھماکوں میں سات افراد ہلاک ہوئے

امریکی فوج نے تازہ کمک کی آمد کی تصدیق کر دی ہے۔

تین ہزار دو سو فوجیوں کا یہ دستہ ان اکیس ہزار پانچ سو فوجیوں کی کمک کا ابتدائی حصہ ہے جو کہ امرکی صدر نے اسی ماہ کے اوائل میں عراق بھیجنے کا اعلان کیا تھا۔

امریکی فوجیوں کو عراقی دارالحکومت بھیجنے کا مقصد شہر میں جاری تشدد کے واقعات پر قابو پانے میں عراقی سکیورٹی فورسز کی مدد کرنا ہے۔ تاہم فوجیوں کی آمد کے باوجود بغداد میں بم دھماکوں، ہلاکتوں اور فرقہ وارانہ قتل و غارت کا سلسلہ جاری ہے۔

اتوار کو بغداد میں دو بم دھماکوں میں سات افراد ہلاک ہوئے ہیں۔ پہلا دھماکہ شیعہ اکثریتی علاقے کرادا میں ایک منی بس میں ہوا اور اس میں چھ لوگ مارےگئے جبکہ دوسرا دھماکہ وسطی بغداد میں ہوا۔اس کے علاوہ اتوار کی صبح بصرہ میں سڑک کے کنارے نصب بم پھٹنے سے ایک برطانوی فوجی بھی مارا گیا۔

خبر رساں ادارے ایسوسی ایٹڈ پریس کے مطابق کرادا میں دھماکہ مقامی وقت کے مطابق صبح آٹھ بج کر پندرہ منٹ پر ہوا۔ پولیس کا کہنا ہے کہ ممکنہ طور پر بم ایک تھیلے میں تھا جو کوئی مسافر بس میں چھوڑ گیا تھا۔

دھماکے کے عینی شاہد فارس مہدی نے ایسوسی ایٹڈ پریس کو بتایا کہ’ ہم اپنی دوکان کھول ہی رہے تھے جب ایک زوردار دھماکہ ہوا اور ہم نے ایک چھوٹی بس کو شعلوں میں گھرا دیکھا۔ ہم نے تین سوختہ لاشیں نکالیں اور شدید زخمی افراد کو ایک پک اپ کار میں ہسپتال منتقل کیا گیا‘۔

یاد رہے کہ گزشتہ کل کا دن عراق میں امریکی فوجیوں کے لیے برا ثابت ہوا تھا اور دو مختلف واقعات میں کل 18 امریکی فوجی مارے گئے تھے۔ بعقوبہ میں امریکی ہیلی کاپٹر کے ایک حادثے میں تیرہ امریکی فوجی مارے گئے تھے جبکہ ایک دوسرے واقعے میں پانچ امریکی فوجی ہلاک ہوئے تھے۔