لبنان میں ایک لاکھ کلسٹر بم کے ٹکڑے بکھرے ہوئے ہیں

اقوام متحدہ کے ماہرین کے مطابق اسرائیل کی طرف سے نوے فیصد بم جنگ کے آخری بہتر گھنٹوں میں استعمال کیئے گئے جب یہ واضح ہوچکا تھا کہ جنگ بند ہونے والی ہے۔

اقوام متحدہ کے رابط کار ژان ایگلینڈ نے کہا کہ جنگ کے آخری گھنٹوں میں کلسٹر بموں کا استعمال حیران کن اور غیر اخلاقی ہے۔

انہوں نے کہا کہ تمام بموں کو صاف کرنے میں ایک سال کا عرصہ بھی لگ سکتا ہے۔

	کلسٹر بم ایک بڑے کنستر کے بنئے ہوئے ہوتے ہیں

کلسٹر بم ایک بڑے کنستر کے بنے ہوئے ہوتے ہیں جو پھٹ جاتا ہے اور اس میں موجود بہت سے چھوٹے چھوٹے بم دور دور تک بکھر جاتے ہیں۔

ان کا استعمال خاصہ متنازع رہا ہے کیوں کہ یہ اپنے ہدف سے دور بھی گر سکتے ہیں۔

ماہرین نے کہا کہ ان بموں کی وجہ سے روزانہ شہری ہلاک اور زخمی ہو رہے ہیں۔

اقوام متحدہ نے اس سلسلے میں اسرائیل سے کوئی وضاحت طلب نہیں کی ہے۔

ادھر اسرائیلی وزیر دفاع کے ایک ترجمان نے کہا کہ تمام ہتھیار اور گولہ بارود بین الا قوامی قانون کے تحت استعمال کیئے گئے اور کوئی غیر قانونی ہتھیار استعمال نہیں کیا گیا۔

ژان ایگلینڈ نے کہا کہ جن ملکوں نے اسرائیلی فضائیہ کو کلسٹر بم مہیا کیئے تھے انہیں چاہیئے کہ وہ اب اسرائیل کے ساتھ ان کے بارے میں سنجیدہ مذاکرات کریں۔