وسعت اللہ خان بی بی سی اردو ڈاٹ کام، بیروت

	احمد فرخ نے بتایا کہ یہاں روزانہ کوئی پچاس ساٹھ نئے لوگ آجاتے ہیں

قریباً ڈیڑھ ایکڑ پر پھیلا ہوا یہ پارک آج کل آس پاس کے بچوں کے لیئے بند ہے کیونکہ یہاں پر بیسیوں ایسے بچے اپنے بڑوں کے ساتھ موجود ہیں جن کا اب اس پارک کے علاوہ کوئی گھر نہیں۔ یوں سمجھئے کہ پارک کیا ہے چھوٹا سا جنوبی لبنان ہے۔

بش کو پیغام پہنچا دو  اور یہ جو بش ہے، میں نے سنا ہے کہ اس کے پاس بہت بڑی ذاتی زمین ہے۔ تو کیا اس کی جاگیر میں کوئی اس کی اجازت کے بغیر گھس سکتا ہے۔ اگر ایسا نہیں تو پھر اس نے کیسے اسرائیل کو ہماری زمین میں گھسنے، مکانوں کو تباہ کرنے اور بچوں کو قتل کرنے کی اجازت دے دی۔ پناہ گزین خاتون

صمیدون نامی ایک این جی او کے لڑکے لڑکیاں ان پناہ گزینوں کی ہر ممکن دیکھ بھال میں لگے ہوئے ہیں۔ ایک نوجوان کارکن احمد فرخ انگریزی جاننے کے سبب وہ چابی بن گیا جس سے اس پارک کا لسانی تالہ کھل گیا۔

	بی بی سی کے نمائندے وسعت اللہ حان

احمد فرخ نے بتایا کہ یہاں روزانہ کوئی پچاس ساٹھ نئے لوگ آجاتے ہیں۔ ہماری کوشش ہوتی ہے کہ کوئی خاندان پارک میں کھلے آسمان تلے زیادہ دن نہ رہے۔ جیسے ہی کوئی مناسب جگہ ملتی ہے ہم متاثرہ خاندانوں کو وہاں منتقل کردیتے ہیں۔ مگر اب بیروت کے اسکولوں میں بھی جگہ باقی نہیں ہے۔ اس لیئے یہاں سے کوئی اسی کلومیٹر شمال میں تریپولی تک جس بھی عمارت کے بارے میں ہمیں دوسری این جی اوز بتاتی ہیں کہ خالی ہے تو ہم ان میں سے کچھ خاندانوں کو وہاں روانہ کردیتے ہیں تاکہ پارک میں نئے لوگوں کے لیئے جگہ بن سکے۔

شروع کے دنوں میں لوگوں کو رفاہ حاجت اور نہانے دھونے کی خاصی تکلیف تھی کیونکہ پارک میں صرف دو واش روم تھے۔لیکن اب کوئی بیس کے لگ بھگ عارضی واش روم بنا دئیے گئے ہیں اور کئی واش رومز میں درخت کی مضبوط ٹہنیوں کو بھی شاور لٹکانے کے لئے استعمال کیا گیا ہے۔

احمد فرخ نے بتایا کہ مقامی لوگ جن میں ڈاکٹر، وکیل، اساتذہ اور دوکاندار سب ہی شامل ہیں اپنی جیب سے ہمیں پیسے دیتے ہیں تاکہ پناہ گزینوں کے لیئے کم از کم کھانے اور بستر کا انتظام ہوسکے۔

	یہ بچے ثنائیہ پارک میں بے گھری کا پہلا عملی سبق لے رہے

ایک درخت کے نیچے سیاہ چادر میں ملبوس ایک ادھیڑ عمر عورت اپنے دو بچوں کو کھانا کھلا رہی تھی اور ایک نسبتاً جوان عورت کوئی کتاب پڑھ رہی تھی۔

سیاہ پوش خاتون کا نام فاطمہ تھا اور یہ سب اسرائیل لبنان سرحد پر واقع گاؤں بنتِ جبیل سے آئے تھے جسے اسرائیلی اٹھائیس دن کے بعد بھی قابو میں نہیں لا سکے۔ فاطمہ نے بتایا کہ اس کا شوہر حزب اللہ میں شامل ہے۔ ’وہ خود محاذ پر ہے اور ہم اس لیئے گاؤں سے نکلے کیونکہ بنتِ جبیل میں لڑائی کے شروع میں جو گھر تباہ ہوئے تھے ان میں ہمارا گھر بھی شامل تھا‘۔

فاطمہ کے بقول یہ کوئی نئی ہجرت نہیں ہے۔ انیس سو چھیانوے میں بھی اسرائیلی توپوں نے گھر چھڑوا دیا تھا لیکن اس دفعہ تو وہ گھر بھی نہیں بچا۔

پارک میں ایک بنچ پر ایک بڑے میاں اکیلے بیٹھے بہت دم لگا کر سگریٹ کے کش لے رہے تھے۔ انہوں نے اپنا نام بتانے سے انکار کردیا۔ بس یہ بتایا کہ ان کا تعلق سیدا کے نزدیک ال عون نامی گاؤں سے ہے۔ بیوی اور چار بچوں کے ساتھ کسی ٹرک میں بیٹھ کر یہاں آ گئے۔ دس دن ہوگئے، بغیر چھت کے یوں لگ رہا ہے جیسے اجنبیوں کے درمیان فٹ پاتھ پر بیٹھے ہوں۔ ’بس اب میں سوچ رہا ہوں کہ بہت ہوگیا۔ اگلے چند دن اور دیکھوں گا اس کے بعد امن قائم ہویا نہ ہو میری بلا سے۔ میں دوبارہ اپنے گاؤں جاؤں گا۔ اگر شہر میں اسی طرح رہنا ہے تو گاؤں کی موت اس سے بہت اچھی ہے‘۔

ان بڑے میاں سے ذرا آگے پانچ مرد بستر بچھائے تاش کھیل رہے تھے۔احمد فرخ نے ان سے پوچھا کہ کیا آپ بی بی سی سے کچھ بات کرنا پسند کریں گے۔ پانچوں نے ایک ساتھ ہاتھ ہلا دئیے جس کا مطلب تھا نہیں۔ ان میں سے ایک بہت دیر تک احمد سے عربی میں کچھ کہتا رہا، جس کا لبِ لباب یہ تھا کہ ہم اس لیئے بات نہیں کرنا چاہتے کیونکہ اگر منہ سے برطانیہ، امریکہ یا اسرائیل کے لیئے کوئی فحش کلامی ہوگئی تو اس بے چارے کی نوکری جائے گی اور اسے عربی نہیں آتی۔ احمد نے مجھے مشورہ دیا کہ ان سے بات نہ کرنا زیادہ بہتر ہے۔

ثنائیہ پارک کے عین وسط میں ایک بڑا سا فوارہ ہے۔ آج کل خشک پڑا ہے۔ اس کے اندر ایک پچاس پچپن برس کی خاتون غالباً اپنے پوتے کے ساتھ کھیلتے ہوئے اسکے پیچھے چھوٹے چھوٹے قدموں سے بھاگ رہی تھیں۔ احمد نے ان سے بات کی۔ وہ اسے کچھ سمجھانے لگیں۔ میں نے مائیکروفون آگے کردیا۔ انہوں نے ہاتھ سے جھٹک دیا۔ احمد نے مجھے بتایا کہ یہ ملکہ برطانیہ پر بڑے غصے میں ہیں۔ میں نے کہا کوئی مسئلہ نہیں یہ اپنے جذبات کا اظہار کر سکتی ہیں۔

	یہاں کے لوگ میڈیا والوں سے بہت تنگ ہیں

خاتون نے مجھے یہ پیغام ریکارڈ کروایا کہ ’ملکہ الزبتھ کو کہہ دو کہ وہ ٹونی بلیئر کو کیوں لگام نہیں دیتی۔ کیا اسے نہیں معلوم کہ وہ کیا کرتا پھر رہا ہے۔ کیا ملکہ ٹی وی پر مرنے والے بچوں کی تصویریں نہیں دیکھتی۔ اگر اس کے پاس ٹی وی ہے تو رات کو نیند کیسے آ جاتی ہے۔ اور یہ جو بش ہے، میں نے سنا ہے کہ اس کے پاس بہت بڑی ذاتی زمین ہے۔ تو کیا اس کی جاگیر میں کوئی اس کی اجازت کے بغیر گھس سکتا ہے۔ اگر ایسا نہیں تو پھر اس نے کیسے اسرائیل کو ہماری زمین میں گھسنے، مکانوں کو تباہ کرنے اور بچوں کو قتل کرنے کی اجازت دے دی‘۔

اسی ثنائیہ پارک کے ایک کونے میں گھاس کے ایک قطعے پر مجھے چھوٹے چھوٹے بچے ایک دائرے میں بیٹھے دکھائی دئیے۔ ایک سوشل ورکر ماریا ان بچوں کو پڑھاتی ہے۔ ماریا نے بچوں کو کاغذ کی ایک ایک شیٹ اور دو دو رنگین پنسلیں بانٹ دیں

گاؤں کی موت اچھی۔۔  بس اب میں سوچ رہا ہوں کہ بہت ہوگیا۔ اگلے چند دن اور دیکھوں گا اس کے بعد امن قائم ہویا نہ ہو میری بلا سے۔ میں دوبارہ اپنے گاؤں جاؤں گا۔ اگر شہر میں اسی طرح رہنا ہے تو گاؤں کی موت اس سے بہت اچھی ہے۔ پناہ گزین شخص

اسی دائرے میں ایک بچی کاغذ پرگھر بنانے کی کوشش کررہی تھی۔اس نے بتایا کہ میرا نام دعا ہے۔ میں پانچ سال کی ہوں۔ میں ایلیمنٹری کلاس میں پڑھتی ہوں۔ مجھے اس پارک میں رہنا اچھا لگتا ہے۔ لیکن ابھی مجھے گھر یاد آرہا ہے۔ میں اپنا گھر بنا رہی ہوں۔

دعا اور دعا کی طرح کے دوسرے بچے ان دنوں ثنائیہ پارک میں بے گھری کا پہلا عملی سبق لے رہے ہیں۔ میں سوچ رہا ہوں کہ جب یہ بڑے ہوں گے تو کس طرح کے بڑے ہوں گے۔