حزب اللہ فائر بندی کی پابندی کررہی ہے: الیاس المر

اپنے بیان میں، جسے حزب اللہ کے لیئے تنبیہ کہا جارہا ہے، وزیر دفاع نے کہا ہے کہ لبنان کی سرزمین سے فائر کیئے جانے والے راکٹ کو اسرائیل کے ساتھ ’تعاون‘ سمجھا جائے گا کیونکہ اسرائیل ایسے موقع کو جوابی حملے کے لیئے استعمال کرلے گا۔ ساتھ ہی ان کا یہ بھی کہنا تھا کہ ان کے خیال میں حزب اللہ فائر بندی کی پابندی کررہی ہے۔

الیاس المر نے کہا ہے کہ لبنان کی سرزمین سے اسرائیل کی طرف راکٹ فائر کرنے والے عناصر کے ساتھ فوج فیصلہ کن انداز میں نمٹے گی۔ ان کا کہنا ہے کہ ایسا کرنا اسرائیل کے ہاتھوں میں کھیلنے کے مترادف ہے۔

تجزیہ کاروں کا کہنا ہے کہ الیاس مر کے بیان میں دو پیغامات ہیں۔ ایک تو یہ کہ لبنانی حکومت موجودہ سیز فائر کی نزاکت سے پوری طرح سے آگاہ ہیں۔ اور دوسرا یہ کہ لبنانی حکام فائر بندی کے بارے میں اپنی ذمہ داری کا بھی احساس رکھتے ہیں۔

ایک ہی روز قبل وادی بقا میں اسرائیلی کمانڈوز کے آپریشن سے علاقے میں سیز فائر کے استحکام کے بارے میں تشویش پیدا ہوگئی ہے۔

دریں اثناء لبنانی وزیر اعظم فواد سینیورا نے دارالحکومت بیروت کے تباہ شدہ نواحی علاقوں کا دورہ کیا ہے۔ انہوں نے علاقے کی صورتحال دیکھ کر اسرائیلی کارروائی کو ’انسانیت کے خلاف جرم‘ قرار دیا ہے۔ یہ علاقہ حزب اللہ کا گڑھ سمجھا جاتا ہے۔ وزیر اعظم کے اس بیان کو مقامی افراد کے لیئے حمایت کا اظہار خیال کیا جارہا ہے۔