وسعت اللہ خان بی بی سی اردو ڈاٹ کام، بیروت

	اسرائیل کے تیس ہزار فوجی لبنان میں جاری فوجی کارروائی میں حصہ لے رہے ہیں۔

ادھر اسرائیل کے تیس ہزار فوجی لبنان میں ایک بڑی فوجی کارروائی میں مصروف ہیں۔ اطلاعات کے مطابق اسرائیل کو حزب اللہ کی طرف سے سخت مزاحمت کا سامنا ہے اور اس نے ایک ہیلی کاپٹر کو مار گرانے کے علاوہ اسرائیل کے چوبیس فوجی ہلاک اور ساٹھ سے زیادہ زخمی کر دیئے ہیں۔

مشرق وسطی : خصوصی ضمیمہ

اسرائیلی حملے: تصویری ضمیمہ

اسرائیل نے اتوار کی صبح جنوبی لبنان کے شہر طائر پر حملے میں ایک چار منزلہ عمارت تباہ کردی۔ بی بی سی کے نامہ نگار جم میور کے مطابق حملے کے نتیجے میں اپنے تین بچوں سمیت ایک عورت اور ان کی آیا کچل کر ہلاک ہوگئے۔ حملوں میں علاقے کے تقریباً تمام پٹرول پمپس کو نشانہ بنایا گیا ہے۔

سکیورٹی کونسل کی طرف سے لبنان میں جنگ بندی سے متعلق قرار داد منظور کیئے جانے کے ایک روز بعد سیکرٹری جنرل نے کہا کہ اسرائیل اور لبنان کے وزیراعظم نے انہیں یقین دلایا ہے کہ سوموار کے روزگرینچ وقت کے مطابق صبح پانچ بجے جنگ بند ہو جائے گی۔

اقوام متحدہ کے سیکرٹری جنرل نے کہا کہ ان کی خواہش ہے کہ لڑائی فوراً بند ہو جائے لیکن انہیں یقین دلایا گیا ہےکہ لڑائی سوموار کو بند ہو جائے گی۔

لبنان کے لیے امن فوج  فرانس اور اٹلی لبنان میں امن فوج بھیجنے کے لیئے تیار ہیں لیکن وہ اپنی فوج کے دائرہ اختیار کے بارے میں مزید وضاحت چاہتے ہیں۔

ادھر فرانس اور اٹلی نے تصدیق کی ہے کہ وہ لبنان میں امن فوج بھیجنے کے لیئے تیار ہیں لیکن وہ اپنی فوج کے دائرہ اختیار کے بارے میں مزید وضاحت چاہتے ہیں۔

حکومت لبنان نے لڑائی کی روک تھام کے متعلق اقوام متحدہ کی قرارداد نمبر1701 کی منظوری دے دی ہے اور اتوار کو کابینہ کا ایک اور اجلاس طلب کیا ہے جس میں جنوبی لبنان میں حزب اللہ کی جگہ لبنانی فوج کی تعیناتی کی تفصیلات طے کی جائیں گی۔

حزب اللہ کے رہنما حسن نصر اللہ نے ٹیلی ویژن پر خطاب میں اقوام متحدہ کی قرار داد کو بادلِ ناخواستہ قبول کرنے کا اعلان کیا ہے لیکن انہوں نے واضح کیا کہ اگر اسرائیل نے جارحانہ کارروائیاں جاری رکھیں تو حزب اللہ اس کا بھر پور جواب دے گی۔

ادھر جنوبی لبنان میں گزشتہ چندگھنٹوں میں اسرائیلی فوج اور حزب اللہ میں شدید لڑائی کے نتیجے میں مقامی عرب ٹی وی چینل کے مطابق سترہ اسرائیلی فوجی ہلاک اور ساٹھ سے زیادہ زخمی ہوئے ہیں لیکن اسرائیلی فوجی ذرائع نے گیارہ اسرائیلی فوجیوں کے مرنے اور ستر کے زخمی ہونے کی تصدیق کی ہے۔

اسرائیل نے حزب اللہ کے چالیس چھاپہ ماروں کو ہلاک کرنے کا بھی دعوی کیا ہے۔ حزب اللہ نے اسرائیلی فوجی ہیلی کاپٹر بھی مار گرایا ہے لیکن یہ واضح نہیں ہوسکا ہے کہ اس ہیلی کاپٹر پر کتنے اسرائیلی فوجی سوار تھے۔

اسرائیل نے عندیہ دیا ہے کہ اس کی کابینہ اتوار کے روز اقوام متحدہ کی قرارداد کی توثیق کر دے گی جس کے بعد پیر کی صبح جنگ بندی پر عمل درآمد شروع ہو جائے گا۔

قرار داد مانیں گے  اقوام متحدہ کی قرار داد کو بادلِ ناخواستہ قبول کرتے ہیں لیکن اگر اسرائیل نے جارحانہ کارروائیاں جاری رکھیں تو حزب اللہ اس کا بھر پور جواب دے گی حسن نصراللہ

اس سے قبل اسرائیل نے نہایت تیزی کے ساتھ جنوبی لبنان میں اپنی فوج میں تین گنا اضافہ کر دیا ہے تاکہ جنگ بندی کے اعلان تک دریائے لیطانی کے تیس کلومیٹر کے علاقے پر قبضہ کیا جا سکے۔

اسرائیل نے پچاس ہیلی کاپٹروں کے ذریعے اپنے سینکڑوں فوجیوں کو حزب اللہ کی پوزیشنوں کے پیچھے اتار دیا ہے اور اس وقت تقریباً تیس ہزار اسرائیلی فوجی لڑائی میں حصہ لے رہے ہیں۔

اس فوجی کارروائی کو پچھلے تیس برس میں اسرائیل کی لبنان میں سب سے بڑی کارروائی قرار دیا جا رہا ہے۔اس دوران حزب اللہ کی جانب سے شمالی اسرائیل پر راکٹ گرنے کا سلسلہ جاری ہے اور آخری اطلاعات آنے تک حزب اللہ نے اسرائیلی علاقے میں ستر کے لگ بھگ راکٹ فائر کیئے ہیں۔

اسرائیل نے سلامتی کونسل کی قرار داد کی منظوری کے بعد لبنان پر اپنے فضائی حملے جاری رکھے جن کے نتیجے میں مزید بیس لبنانی شہری ہلاک ہوئے۔ان میں پندرہ شہری طائر کے نزدیک رشاف کے قصبے میں مارے گئے۔ اس کے علاوہ سیدون کے بجلی گھر پر حملہ کر کے اسے تباہ کر دیا گیا۔اس دوران ریڈ کراس کے لیئے دو سو ٹن امداد لے کر کل سہ پہر ایک بحری جہاز قبرص سے طائر پہنچ گیا۔

اقوام متحدہ کے خصوصی ایلچی برائے مشرقِ وسطیٰ الویرو ڈی ساتو نے کہا کہ جنوبی لبنان میں امن دستوں کی تعیناتی میں دس دن لگ سکتے ہیں

قرار داد کے خاص نکات  حزب اللہ ملیشیا کو دریائے لیطانی کے شمال میں جانا ہوگا۔لبنانی فوج اسرائیلی سرحد کے ساتھ تعینات کی جائے گی۔حزب اللہ کو غیر مسلح کرنے اور شیبا فارم سمیت تمام تنازعوں کے حل کی منصوبہ بندی کی جائے گی۔

خریاب کے مقام پر ایک پک اپ ٹرک پر حملے میں چار لبنانی شہری ہلاک ہوئے ہیں۔ لبنانی ریڈ کراس کے مطابق گزشتہ روز مرجعون سے اقوام متحدہ کی دو بکتر بند گاڑیوں کی نگرانی میں جو قافلہ ساڑھے تین سو لبنانی فوجیوں اور سپاہیوں کو لے کر 80 گاڑیوں کے ساتھ زاہلے جانے کے لیئے نکلا تھا اس پر رات گئے اسرائیلی طیاروں نے آٹھ میزائل داغے۔ جس وقت یہ میزائیل داغے گئے اس وقت تک اس میں ڈیڑھ ہزار کے لگ بھگ شہری گاڑیاں شامل ہوچکی تھیں۔ حملے میں 7 افراد زخمی اور 36 زخمی ہوئے۔ زخمیوں میں 24 لبنانی فوجی بھی شامل ہیں جبکہ پانچ گاڑیاں تباہ ہوگئیں۔