پولیس نے مظاہرین کو یونیورسٹی کیمپس باہر سڑکوں پر نہیں نکلنے دیا

مظاہرین میں سے زیادہ تر طلباء کا تعلق اخوان المسلمین سے تھا جنہوں نے قاہرہ اور نیل ڈیلٹاکے تعلیمی اداروں میں مارچ کیا۔

پولیس نے مظاہرین کو یونیورسٹی کیمپس تک محدود رکھا اور ان کو سڑکوں پر آنے سے روک دیا۔

مصر کے اسلامک، لبرل اور قوم پرست ملک میں 24 سالوں سے جاری ایمرجنسی قوانین کا خاتمہ چاہتے ہیں۔ مظاہرین نے صدر حسنی مبارک سے صدارت چھوڑنے کا مطالبہ کیا۔

صدر حسنی مبارک 1981 میں انوار سادات کے قتل کے بعد ملک کے صدر بنے تھے اور وہ ستمبر میں ہونے والے انتخابات میں پانچویں مرتبہ کامیاب ہونے کی امید کر رہے ہیں۔ یہ پہلے انتخابات ہیں جن میں مخالف امیدواروں کو بھی انتخابات میں حصہ لینے کی اجازت دی جا رہی ہے۔

پولیس کے حوالے سے ملنے والی اطلاعات کے مطابق 4000 طلباء نے قاہرہ میں الاظہر یونیورسٹی کے کیمپس میں مارچ کیا

اس کے علاوہ قاہرہ کی شمس اور ہلوان یونیورسٹیوں کے ساتھ ساتھ نیل ڈیلٹا کی کفرالشیخ اور منصورہ یونیورسٹیوں سے بھی مظاہروں کی اطلاعات ہیں۔ .

کچھ طلباء نے اسٹوڈنٹس الیکشن پر سے حکام کے سکیورٹی کنٹرول کو ختم کرنے کا بھی مطالبہ کیا۔

شمس یونیورسٹی کے طالب علم خالد سلطان کا کہنا ہے کہ یہ سب اصلاحات کا ایک حصہ ہے ہم طلباء کے الیکشن کے عمل کو تبدیل کرنا چاہتے ہیں۔

امریکہ کے بڑھتے ہوئے دباؤ کے تحت مصر آہستہ آہستہ اصلاحات کی جانب بڑھ رہا ہے جس کے نتیجے میں حسنی مبارک نے پہلی مرتبہ انتخابات میں حریف امیدواروں کو شرکت کی اجازت دی ہے۔