سونامی سے متاثرہ افراد کو مدد کی اشد ضرورت ہے

سونامی سے ہونے والی تباہی کے متعلق اپنے پہلے جائزے میں اے ڈی بی نے کہا کہ اقتصادی ترقی پر اس کا اثر بہت کم پڑے گا کیونکہ زیادہ تر شہر اور فیکٹریاں تباہی سے بچ گئی ہیں۔

لیکن بینک کے مطابق کم آمدنی والے افراد پراس کا بہت برا اثر پڑے گا۔

امیر ممالک کے گروہ پیرس کلب نے بدھ کو سونامی سے متاثرہ ممالک کے قرضوں کی وصولی ایک سال کے لیے منجمد کر دی تھی۔

اس اقدام کا مقصد جنوبی ایشیا کی حکومتوں کو بجٹ مہیا کرنا ہے تاکہ وہ ساحلی علاقوں کی ازسرِ نو تعمیر کر سکیں۔ لیکن ابھی سری لنکا، سیشیلیز اور انڈونیشیا ہی نے اس بات کا اشارہ کیا ہے کہ وہ قرضوں کی وصولی میں تاخیر کے لیے رضامند ہیں۔

دوسرے ممالک نے کہا ہے کہ وہ اقتصادی طور پر اس قابل ہیں کہ نقصان برداشت کر سکیں۔

اے ڈی بی کے چیف اکانومسٹ افضل علی نے کہا کہ اس قدرتی تباہی کا سب سے گہرا اثر غربت پر پڑ سکتا ہے۔

اقوامِ متحدہ کے مطابق امداد دینے والے ممالک نے اگلے چھ مہینوں میں 717 ملین ڈالر کی امدادای رقم دینے کا وعدہ کیا ہے۔