عبادالحق بی بی سی ارود ڈاٹ کام، لاہور

	گوجرانوالہ میں پہلے بھی پولیس سٹیشن پر بم حملہ ہو چکا ہے

گوجرانوالہ پولیس کے مطابق پیر کی رات کو نامعلوم افراد تھانہ سیٹلائیٹ کے عقب میں واقع ایس ایچ او کے گھر دستی بم پھینک کر موقع سے فراد ہوگئے۔

پولیس کے مطابق دستی بم سے پولیس کانسٹیبل کی بیرکوں اور تھانے کے کچھ حصوں کو نقصان پہنچا اور جہاں پر یہ دستی بم گرا وہاں پر گڑھا پڑگیا ۔تاہم دھماکے کی وجہ سے کوئی جانی نقصان نہیں ہوا۔

پولیس سٹیشن پر دستی بم کے حملے فوری بعد پولیس کے اعلیْ حکام موقع پر پہنچ گئے۔

بم ڈسپوزل کے مطابق ابتدائی تحقیقات میں یہ بات سامنے آئی ہے کہ دھماکے کے لیے آدھ کلو کے قریب دھماکا خیز مواد استعمال کیا گیا ہے اور یہ مواد چھوٹے دستی بم پر مشتمل تھا۔

پولیس کے مطابق ابھی اس واقعہ کا مقدمہ درج نہیں کیا گیا۔

ادھر پیر کی رات لاہور میں ایس ایس پی آپریشن کے دفتر کے قریب سے چار بم بر آمد ہوئے جن کو بم ڈسپوزل کے عملے نے ناکارہ بنا دیا۔

پولیس نے پیر کی رات کو ان بموں کی اطلاعات ملنے پر علاقے کا گھیراؤ کر کے تلاشی لی جس پر چار بم برآمد ہوئے۔ بم ڈسپوزل کے مطابق یہ بم تین سے چار کلو وزنی تھے اور ان پھٹنے سے بڑا نقصان ہوسکتا تھا۔

پولیس نےمقدمہ درج کرکے ملنے والے ان بموں کے بارے تفتیش شروع کردی ہے۔